ເຄີຍສົງໄສບໍ່ວ່າເບີແປກທີ່ໂທເຂົ້າໂທລະສັບຂອງເຮົາແມ່ນໃຜ? ໃນຍຸກທີ່ການຫຼອກລວງທາງໂທລະສັບເພີ່ມຂຶ້ນຢ່າງຕໍ່ເນື່ອງ ແລະ ການຮັບສາຍຈາກເບີແປກອາດຈະເປັນສັນຍານອັນຕະລາຍທີ່ພວກເຮົາຕ້ອງລະວັງພວກມິດສາຊີບທີ່ໃຊ້ວິທີຕ່າງໆເພື່ອໂທຫາຜູ້ຄົນໂດຍບໍ່ເລືອກໜ້າໃນການຫຼອກລວງເອົາຂໍ້ມູນ ຫຼື ເງິນ ເຊິ່ງເລື່ອງທີ່ພວກເຂົາໃຊ້ອ້າງໃນການຕົວະແມ່ນມັກຈະເຮັດໃຫ້ຜູ້ຟັງຕົກໃຈ, ຫຼົງເຊື່ອ ແລະ ຮີບຮ້ອນປະຕິບັດຕາມຈົນໂອນເງິນໄປໂດຍບໍ່ຮູ້ຕົວ.
ການຮູ້ທັນກົນໄກຂອງພວກມິດສາຊີບແມ່ນເປັນສິ່ງສຳຄັນ ແລະ ຈຳເປັນ. ພວກເຮົາມາເບິ່ງນຳກັນວ່າພວກເຂົາໃຊ້ວິທີໃດໃນການຫຼອກລວງ, ເຮົາຈະປ້ອງກັນຕົນເອງແນວໃດໄດ້ແດ່ ແລະ ການຕິດຕັ້ງແອັບທີ່ຊ່ວຍກວດໄດ້ວ່າໃຜໂທມາ ເປັນເຄື່ອງມືທີ່ຊ່ວຍເພີ່ມຄວາມປອດໄພ ແລະ ຄວາມສະດວກໃນການໃຊ້ໂທລະສັບ.
ຮູບແບບການຫຼອກລວງທີ່ພົບເລື້ອຍໆ
ຈຸດປະສົງຫຼັກຂອງພວກເຂົາແມ່ນເພື່ອເຮັດໃຫ້ເຮົາເກີດຄວາມຕົກໃຈ, ກັງວົນ ແລະ ບໍ່ມີເວລາຄິດໄຕ່ຕອງ, ພວກສະແກມເມີ (Scammer) ນັ້ນມັກຊອກຫາວິທີກົນໂກງມາຫຼາກຫຼາຍຮູບແບບເຊັ່ນ:
- ສວມຮອຍເປັນທະນາຄານ: ອ້າງວ່າບັນຊີຂອງເຮົາມີບັນຫາ ແລະ ຕ້ອງການແກ້ໄຂດ່ວນ.
- ສວມຮອຍເປັນບໍລິສັດໂທລະຄົມມະນາຄົມ ຫຼື ໄຟຟ້າ: ບອກວ່າເບີຂອງເຮົາໝົດອາຍຸ ຫຼື ໄຟບ້ານເຮົາມີບັນຫາຈະຖືກຕັດ.
- ໂທມາຂໍຄວາມຊ່ວຍເຫຼືອສຸກເສີນ: ປອມຕົວເປັນຍາດພີ່ນ້ອງ ຫຼື ໝູ່ເພື່ອນ ທີ່ກຳລັງປະສົບເຫດສຸກເສີນ ແລະ ຕ້ອງການເງິນ.
- ໂຊກລົ້ມທັບ: ສະແກມເມີໂທ ຫຼື ສົ່ງຂໍ້ຄວາມມາບອກວ່າເຮົານັ້ນກາຍເປັນຜູ້ໂຊກດີ ຈະໄດ້ຮັບລາງວັນໃຫຍ່ ມັກຕົວະເອົາຂໍ້ມູນຂອງເຮົາໄປໃຊ້ໃນທາງທີ່ບໍ່ດີ.
- ຊັກຊວນລົງທຶນ: ໂທມາໂນ້ມນ້າວໃຫ້ລົງທຶນກັບສິ່ງທີ່ອ້າງວ່າຈະໃຫ້ຜົນຕອບແທນສູງ.
ວິທີງ່າຍໆໃນການປ້ອງກັນຕົນເອງ
- ບໍ່ຮັບສາຍເບີທີ່ບໍ່ຮູ້ຈັກ: ຖ້າເຮົາບໍ່ແນ່ໃຈວ່າແມ່ນເບີໃຜ ຄວນຫຼີກລ້ຽງການຮັບສາຍ.
- ຢ່າໂອນເງິນ ຫຼື ໃຫ້ຂໍ້ມູນສ່ວນຕົວ: ບໍ່ຄວນບອກຂໍ້ມູນທີ່ສຳຄັນ ຫຼື ໂອນເງິນຜ່ານໂທລະສັບໂດຍເດັດຂາດ ຖ້າບໍ່ມີການກວດສອບທີ່ໜ້າເຊື່ອຖື.
- ຕິດຕັ້ງແອັບກວດເບີໂທ: ໃຊ້ແອັບທີ່ເຊື່ອຖືໄດ້ ເພາະແອັບເຫຼົ່ານີ້ຈະຊ່ວຍກວດສອບວ່າເບີທີ່ໂທເຂົ້າມາແມ່ນຂອງໃຜ, ບໍ່ວ່າຈະເປັນເບີຂອງມິດສາຊີບ, ສິນເຊື່ອ ຫຼື ເບີທົ່ວໄປ, ເຊິ່ງຈະຊ່ວຍເພີ່ມຄວາມປອດໄພໃຫ້ກັບໂທລະສັບຂອງທ່ານໄດ້ຫຼາຍ.
ແອັບທີ່ໜ້າສົນໃຈ
- Truecaller: ເປັນແອັບທີ່ຊ່ວຍກວດເບີໂທທີ່ບໍ່ຮູ້ຈັກ ແລະ ສາມາດ ລະບຸຊື່ຜູ້ໂທ, ກວດຈັບເບີສະແກມເມີ (Scammer) ແລະ ປ້ອງກັນຂໍ້ຄວາມສະແປມ (Spam SMS) ໄດ້ໂດຍອັດຕະໂນມັດ. ແອັບນີ້ໃຊ້ຖານຂໍ້ມູນຈາກຜູ້ໃຊ້ທົ່ວໂລກຊ່ວຍໃຫ້ການກວດສອບມີຄວາມຖືກຕ້ອງສູງ. ຄວນລະວັງເລື່ອງຄວາມເປັນສ່ວນຕົວຂອງຂໍ້ມູນ ເພາະແອັບຈະຮ້ອງຂໍການເຂົ້າເຖິງລາຍຊື່ຕິດຕໍ່ຂອງເຮົາ.
- Whoscall: ຊ່ວຍກວດສອບເບີໂທທີ່ບໍ່ຮູ້ຈັກໄດ້ທັນທີ ແລະ ເປັນອີກໜຶ່ງແອັບທີ່ມີຖານຂໍ້ມູນທີ່ໃຫຍ່ ຊ່ວຍໃຫ້ເຮົາຮູ້ວ່າເບີທີ່ໂທເຂົ້າມາແມ່ນຂອງໃຜ, ເປັນເບີທຸລະກິດ ຫຼື ເບີຂອງພວກເບີສະແກມເມີທີ່ສ້າງຄວາມລຳຄານ. Whoscall ຍັງມີຄຸນສົມບັດໃນການບລັອກເບີທີ່ບໍ່ຕ້ອງການ ແລະ ກວດຈັບຂໍ້ຄວາມສະແປມໄດ້ຢ່າງມີປະສິດທິພາບ.
- Hiya: ແອັບນີ້ສາມາດກວດສອບເບີໂທທີ່ບໍ່ຮູ້ຈັກໄດ້ແບບ Real-time ສາມາດບອກໄດ້ວ່າເບີທີ່ໂທມາແມ່ນເບີທຸລະກິດ, ເບີສ່ວນຕົວ ຫຼື ເບີສະແກມເມີ ເຊິ່ງຊ່ວຍໃຫ້ເຮົາຕັດສິນໃຈໄດ້ວ່າຄວນຮັບສາຍ ຫຼື ບໍ່. Hiya ຍັງມີຟັງຊັນປ້ອງກັນການໂທແບບສະແປມ (spam calls) ແລະ ສາມາດປ້ອງກັນຂໍ້ຄວາມທີ່ຈະມີເນື້ອຫາຫຼອກລວງໄດ້ອີກດ້ວຍ.
- Nomorobo: ແອັບນີ້ເນັ້ນໄປທີ່ໃນການບລັອກການໂທແບບ robocall ແລະ telemarketing ທີ່ໜ້າລຳຄານ. Nomorobo ມີຖານຂໍ້ມູນທີ່ໃຫຍ່ ແລະ ອັບເດດຢູ່ສະເໝີ ເພື່ອໃຫ້ສາມາດກວດຈັບເບີສະແກມເມີໄດ້ຢ່າງມີປະສິດທິພາບ.
- Mr. Number: ເປັນແອັບທີ່ສາມາດບລັອກການໂທ ແລະ ຂໍ້ຄວາມຈາກເບີສະເພາະ, ຈາກລະຫັດພື້ນທີ່ ຫຼື ບລັອກການໂທທັງໝົດທີ່ມາຈາກຕ່າງປະເທດໄດ້. ນອກຈາກນີ້, ຍັງສາມາດອ່ານຄຳເຫັນຈາກຜູ້ໃຊ້ຄົນອື່ນໆກ່ຽວກັບເບີທີ່ໂທເຂົ້າມາໄດ້ອີກດ້ວຍ.
ການເລືອກໃຊ້ງານແອັບໃດກໍຕາມ ເຮົາຄວນເລືອກແອັບທີ່ເໝາະສົມກັບຄວາມຕ້ອງການຂອງເຮົາທີ່ສຸດ ເພື່ອໃຫ້ການປ້ອງກັນເປັນໄປຢ່າງມີປະສິດທິພາບ.
