ສ້າງຜົນງານ Art Toy ສິລະປະດ້ວຍແສງແຫ່ງຄວາມຫວັງ ຈາກຈິນຕະນາການຂອງ PhoudDoodle

ມື້ນີ້ມ່ວນຈະພາມາຮູ້ຈັກ Phoudthasone Souksompheng ຫຼື ພຸດ, ຊື່ໃນວົງການງານສິນກໍຄື PhoudDoodle ເຊິ່ງຫຼາຍໆຄົນຄົງຈະຄຸ້ນເຄີຍ ແລະ ຮູ້ຈັກກັນດີໃນວົງການສິລະປະ. ດ້ວຍຮູບແບບການແຕ້ມທີ່ມີເອກະລັກສະເພາະຕົວໃນສະໄຕລ໌ລາຍເສັ້ນແບບ Doodle Art ທີ່ພໍເບິ່ງແລ້ວໃຫ້ຄວາມຮູ້ສຶກເຖິງຄວາມມ່ວນຊື່ນ, ຄວາມຄິດ ແລະ ຈິນຕະນາການ. ການມີອິດສະຫຼະໂດຍບໍ່ຈໍາເປັນຕ້ອງມີໂຄງຮ່າງກົດເກນທີ່ຕາຍຕົວ.

ປັດຈຸບັນ, ພຸດ ແລະ ກຸ່ມຜູ້ສ້າງສິລະປະໄດ້ຮ່ວມແຮງໃຈກັນສ້າງຜົນງານ Art Toy ກຸ່ມທຳອິດໃນລາວ. ພາຍໃຕ້ຄັອນເຊັບ “ແສງແຫ່ງຄວາມຫວັງ”, ເຊິ່ງຜົນງານດັ່ງກ່າວມີຊື່ວ່າ “ທ້າວ ຈິນຕະນາການ” ກໍໄດ້ຈັດສະແດງທີ່ງານ LAO ART WEEK 2024 ທີ່ຜ່ານມານີ້ເອງ.

Art Toy ຄືການສະແດງອອກທາງສິລະປະອີກຢ່າງໜຶ່ງທີ່ສິລະປິນໄດ້ປະສົມປະສານຄວາມມ່ວນຊື່ນທາງສິລະປະ ແລະ ຂອງຫຼິ້ນເຂົ້ານຳກັນ, ສະທ້ອນອາລົມຄວາມຮູ້ສຶກ, ເລື່ອງລາວ ແລະ ປະສົບການ. ໂດຍຜົນງານຂອງພຸດລາວໄດ້ເຮັດອອກມາໃນຮູບແບບຂະໜາດທີ່ບໍ່ໃຫຍ່ຫຼາຍ ແລະ ຈຳນວນຈຳກັດ. ເພື່ອການເກັບສະສົມ, ວາງສະແດງ ແລະ ຊື່ນຊົມໃນຖານະທີ່ເປັນງານສິລະປະ.

ໃນສ່ວນຂອງແຮງບັນດານໃຈໃນການສ້າງ Art toy ຂອງພຸດແມ່ນມາຈາກການທີ່ລາວໄດ້ມີໂອກາດໄປເບິ່ງງານວາງສະແດງສິລະປະຢູ່ປະເທດໄທຊ່ວງປີ 2023 ແລະ ໄດ້ໄປຊົມງານຂອງສິລະປິນທີ່ລາວຊື່ນຊົມທີ່ໄດ້ເຮັດ Art Toy ອອກມາ ແລະ ຮູ້ສຶກໄດ້ເຖິງຄວາມມີຊີວິດຊີວາຂອງ characters ທີ່ໄດ້ຖ່າຍທອດອອກມາ, ຮູ້ສຶກໄດ້ວ່າງານປະເພດ Art Toy ນີ້ສາມາດເຂົ້າເຖິງໄດ້ງ່າຍ, ມີຄວາມມ່ວນສາມາດຊົມໄດ້ໃກ້ຊິດ, ເບິ່ງໄດ້ຫຼາຍມຸມຫຼາຍອົງສາ, ຮູ້ສຶກວ່າໄດ້ຮັບແຮງບັນດານໃຈທີ່ໜ້າຈົດຈຳ ແລະ ໜ້າສົ່ງຕໍ່ຫຼາຍ. ພຸດເລີຍຢາກສ້າງ ແລະ ສົ່ງຕໍ່ຄວາມຮູ້ສຶກໃນແຮງບັນດານໃຈເຫຼົ່ານີ້ໃຫ້ທຸກຄົນທີ່ມາຊື່ນຊົມຜົນງານ.

“Art Toy ຜົນງານຊຸດທຳອິດຂອງພຸດນັ້ນມີຄາແຣັກເຕີທີ່ເປັນສັນຍະລັກຂອງຈິນຕະນາການ ແລະ ຕົວແທນຂອງເດັກນ້ອຍຜູ້ໜຶ່ງທີ່ເປັນໂຕສີຂາວພ້ອມທີ່ຈະຮອງຮັບຕໍ່ເຕີມສີສັນຈາກຈິນຕະນາການອັນບໍລິສຸດ ແລະ ຄວາມຮູ້ສຶກດີໆຂອງມອນສເຕີໃນຈັກກະວານດູໂດ້ຂອງພຸດ. ຕົວຄາແຣັກເຕີຈະຂີ່ດາວເປັນຕົວແທນໃຫ້ກັບຄວາມຫວັງໃນດຳເນີນຊີວິດຂອງພວກເຮົາທຸກຄົນ, ບໍ່ວ່າເຮົາຈະຢູ່ໃສ? ເຮັດອາຊີບຫຍັງ? ລ້ວນແລ້ວແຕ່ຕ້ອງການຄວາມຫວັງສະເໝີ ຖ້າພວກເຮົາໄດ້ຄວາມຫວັງຈາກຄົນອື່ນ, ຈາກສັງຄົມ, ສະພາບແວດລ້ອມທີ່ພ້ອມເຮັດໃຫ້ເຮົາເຕີບໂຕກໍຈະດີຂຶ້ນຫຼາຍ. ແຕ່ຖ້າທຸກຢ່າງບໍ່ເອື້ອອຳນວຍພວກເຮົາກໍຈົ່ງສ້າງຄວາມຫວັງຂຶ້ນມາດ້ວຍຕົວເອງ, ຖ້າພວກເຮົາບໍ່ມີຄວາມຫວັງ, ບໍ່ມີກຳລັງໃຈ, ເຮົາກໍຈະບໍ່ສາມາດທີ່ຈະໄປເຖິງສຸດປາຍທາງແຫ່ງຄວາມປາດຖະໜາໄດ້” ພຸດກ່າວໄວ້.

Facebook: Phoudthasone Souksompheng

Art Toy ຖືວ່າເປັນສິ່ງໃໝ່ຫຼາຍສຳຫຼັບຕົວພຸດ ແລະ ປະເທດລາວເຮົາ, ພຸດລາວໄດ້ຮັບໂອກາດສ້າງ Art Toy ນີ້ຍ້ອນວ່າໄດ້ມີລຸ້ນອ້າຍທີ່ມີອຸປະກອນ ແລະ ຄວາມຮູ້ທາງດ້ານພິມ 3 ມິຕິ. ເຮັດໃຫ້ພຸດລາວບໍ່ໄດ້ກັງວົນຫຼາຍ, ແຕ່ກໍໄດ້ສຶກສາຫາຄວາມຮູ້ ແລະ ປະສົບການທາງດ້ານຂະບວນການຂັດພື້ນຜິວໃຫ້ລຽບນຽນຂອງ Art Toy ລວມໄປເຖິງການລົງສີທີ່ໄດ້ຈັບ Air brush ໃໝ່ໆ ລວມໄປເຖິງສີທີ່ໃຊ້ສະເພາະທາງ, ສ່ວນອຸປະສັກຫຼັກຂອງພຸດນັ້ນແມ່ນກ່ຽວກັບດ້ານຄວາມຮູ້, ປະສົບການຂອງເທັກນິກຕ່າງໆ ແລະ ເວລາ(ເພາະມີເວລາຈຳກັດ).

ງານສິລະປະເປັນຂອງສາກົນ, ມີພາສາຂອງຄວາມຮູ້ສຶກທີ່ທຸກຄົນສາມາດເຂົ້າເຖິງໄດ້ ແລະ ງານຂອງລາວນັ້ນແມ່ນມີແນວຄວາມຄິດຂອງຜູ້ຄົນຢູ່ໃນຜົນງານ, ທຸກຄົນສາມາດຈິນຕະນາການໄດ້ໃນດ້ານບວກ ແລະ ພະລັງງານທາງເສີມສ້າງກຳລັງໃຈພາຍໃນຜົນງານ Art Toy ຂອງພຸດນີ້.

ພຸດຕ້ອງການສື່ຖືງຜູ້ຄົນໃນຜົນງານ Art Toy ດ້ວຍການເລົ່າຜ່ານຜົນງານວ່າໃນສະພາບແວດລ້ອມປະເທດລາວໃນປັດຈຸບັນ, ບໍ່ວ່າຈະເປັນທາງດ້ານເງິນຕາທີ່ເຊື່ອມມູນຄ່າລົງ, ຄ່າຄອງຊີບເພີ່ມຂຶ້ນ ແລະ ບັນຫາຫຼາຍຢ່າງໃນລະບົບເສດຖະກິດຂອງເຮົາ. ເຮັດໃຫ້ຫຼາຍຄົນຮູ້ສຶກໝົດຫວັງກັບສະພາບເສດຖະກິດ ແລະ ບໍ່ສາມາດເພິ່ງພາອາໄສສິ່ງອື່ນໄດ້ ແລະ ຮູ້ສຶກບໍ່ມີກຳລັງໃຈ ໃນການປະເຊີນກັບບັນຫາຕ່າງໆ, ແຕ່ຖ້າເຮົາຍັງມີຄວາມຝັນ. ມີຄວາມປາດຖະໜາ, ມັນຈຳເປັນຫຼາຍທີ່ເຮົາທຸກຄົນຈະຕ້ອງໄດ້ສ້າງຄວາມຫວັງຂຶ້ນມາດ້ວຍຕົວເອງໂດຍບໍ່ຕ້ອງເພິ່ງພາສິ່ງອື່ນຫຼາຍຈົນເກີນໄປ.

ປຽບເໝືອນແສງຂອງດວງດາວເມື່ອທຸກຄົນມີແສງສະຫວ່າງໃນຕົວເອງແລ້ວ. ແສງສະຫວ່າງນັ້ນລ້ວນແຕ່ສ່ອງແສງນຳທາງໃຫ້ກັບຜູ້ອື່ນໄດ້ນຳຍິ່ງມີແສງນ້ອຍໆຂອງດາວຫຼາຍເທົ່າໃດ, ຄວາມຫວັງຂອງພວກເຮົາລ້ວນຕ້ອງເພີ່ມຂຶ້ນຢ່າງແນ່ນອນ.

ພຸດລາວມີເປົ້າໝາຍທີ່ຈະສ້າງສັນຜົນງານອອກມາເລື້ອຍໆ ແລະ ເຮັດໃຫ້ດີຂຶ້ນເລື້ອຍໆຄືການພັດທະນາຜົນງານຂອງລາວໃນອະນາຄົດ ແລະ ຈະນຳເອົາ Art Toy ຂອງລາວ ແລະ ຄົນລາວໄປສູ່ລະດັບເວທີສາກົນໃຫ້ໄດ້. ພຸດລາວໄດ້ຫວັງວ່າໃນອະນາຄົດຈະມີຄົນເຂົ້າມາສ້າງສັນ Art Toy ໃຫ້ຫຼາຍເພີ່ມຂຶ້ນ. ຍ້ອນວ່າສິລະປະ, ປະເພດນີ້ສາມາດເຂົ້າເຖິງຜູ້ຄົນໄດ້ໃກ້ຊິດຂຶ້ນ, ໄດ້ສະສົມງານສິລະປະໃນລາຄາທີ່ຈັບຕ້ອງໄດ້ ແລະ ໄດ້ເຂົ້າເຖິງສິລະປະຮູບແບບໃໝ່ທີ່ສາມາດຈັບຫຼິ້ນໄດ້ຢ່າງມ່ວນຊື່ນ.

ຄວາມສຳຄັນຂອງການນຳຄວາມຄິດສ້າງສັນເນື່ອງຈາກວ່າເປັນສິ່ງໃໝ່ ແລະ ລ້ວນແຕ່ເປີດໂອກາດໃຫ້ທຸກຄົນໃນສັງຄົມໄດ້ສຳຜັດຄວາມຮູ້ສຶກ, ການຄິດ ແລະ ເຊື່ອມໂຍງກັນໃນຮູບແບບໃໝ່ໆຢ່າງແນ່ນອນ. ດ້ວຍຮູບແບບການສ້າງສິລະປະໃໝ່ໆມາສູ່ສັງຄົມລາວຊ່ວຍໃຫ້ສັງຄົມມີການພັດທະນາຢ່າງຕໍ່ເນື່ອງ, ທັນສະໄໝ, ມີຄວາມຍືດຍຸ່ນ, ບໍ່ຢຶດຕິດສິ່ງເດີມໆຫຼາຍຈົນເກີນໄປ ແລະ ແນ່ນອນເປັນສິ່ງທີ່ໜ້າສົນໃຈ, ເປີດກວ້າງພ້ອມຮັບການປ່ຽນແປງ ແລະ ຮຽນຮູ້ຕະຫຼອດຊີວິດ.

ສຳລັບສິລະປິນລຸ້ນໃໝ່ທີ່ສົນໃຈຢາກສ້າງ Art toy ຫຼື ຢາກເລີ່ມຕົ້ນໃນວົງການສິລະປະສິ່ງທຳອິດເລີຍຄືຕ້ອງຫາຄວາມເປັນເອກະລັກຂອງຕົວເອງ, ເຝິກການອອກແບບຕົວລະຄອນ ແລະ ໃຊ້ຊອພແວຣ໌ໃນການປັ້ນ 3 ມິຕິ, ສຶກສາເທັກນິກ ແລະ ວັດສະດຸທີ່ຈະໃຊ້ການສ້າງ Art toy, ເລົ່າເລື່ອງລາວທີ່ໜ້າສົນໃຈຂອງຕົວເອງ, ບໍລິຫານຕົ້ນທຶນ ແລະ ສຶກສາຕະຫຼາດທາງດ້ານນີ້ ແລະ ທີ່ສຳຄັນແມ່ນຕ້ອງມ່ວນກັບມັນຄືຫົວໃຈຫຼັກໃນການສ້າງສັນຜົນງານ.

ຝາກຕິດຕາມຜົນງານສິລະປະ DoodleArt ແລະ Art Toy ຂອງພຸດທີ່ເປັນຄົນລາວ 100% ແດ່ເດີທຸກຄົນ, Art Toy ຊຸດນີ້ທີ່ອອກມານີ້ເປັນພຽງຊຸດທຳອິດ, ເປັນບາດກ້າວສຳຄັນ ແລະ ຍັງຈະມີຄໍເລັກຊັ່ນຊຸດຕໍ່ໄປທີ່ຈະອອກມາໃຫ້ທຸກຄົນຊື່ນຊົມກັນໃນອະນາຄົດອັນໃກ້ໆນີ້ອີກເດີ.

ຂໍໃຫ້ທຸກຄົນມີດາວແຫ່ງຄວາມຫວັງເປັນຂອງຕົວເອງ, ຮັກສາມັນໄວ້ ແລະ ໄປຄ້ວາຄວາມຝັນຂອງຕົວເອງໃຫ້ໄດ້ເດີ

ໂດຍ: ທີມບັນນາທິການ Muan