ການບໍ່ມີເຈົ້ານັ້ນແຫຼະບໍ່ປົກກະຕິ ຟັງ ຢູ່ພຸ້ນ (Over There) ຈາກ uknowhatimean ສົ່ງຕໍ່ຄວາມຄິດຮອດຜ່ານບົດເພງ
ມັນເປັນຄວາມຄຸ້ນເຄີຍ ແລະ ເປັນສິ່ງທີ່ເຮັດໃຫ້ຈື່ໄດ້ດີ ໃນທຸກສະຖານທີ່ທີ່ໄດ້ໄປກັບເຈົ້າ ພາບທີ່ເຫັນແມ່ນມີເຈົ້າຢູ່ທຸກບ່ອນ.
ນີ້ແມ່ນຂໍ້ຄວາມຂອງຄວາມຮູ້ສຶກຄິດຮອດເຖິງຄົນທີ່ໄດ້ເລີກກັນໄປແລ້ວແມ່ນບໍ? ພໍ ມ່ວນ ໄດ້ຟັງຍິ່ງຮູ້ສຶກຄິດຮອດເລື່ອງທີ່ມັນເກີດຂຶ້ນໃນເພງນີ້ “ຢູ່ພຸ້ນ (over there)” ຮ້ອງໂດຍ “uknowhatimean” ແລະ ເພງນີ້ຍັງເປັນອີກໜຶ່ງເພງທີ່ຢູ່ໃນອະລາບ້ຳ “Tredmil” ຂອງລາວ.
uknowhatimean ແມ່ນສິລະປິນທີ່ມີເອກະລັກດ້ານການຖ່າຍທອດຄວາມຮູ້ສຶກມຸມມອງຄວາມຮັກ ແລະ ຄວາມຄິດຮອດ ມັກຈະແວະວຽນມາໃຫ້ເຮົາໄດ້ຍິ້ມ ທີ່ໄດ້ຖ່າຍທອດເປັນບົດເພງທີ່ມີເນື້ອຮ້ອງ-ແຣັບ ທີ່ກົງກັບໃຈຄົນຟັງ.
ໃນຄວາມສຳພັນຮັກທີ່ມັນບໍ່ໄດ້ມີແຕ່ຄວາມສົມຫວັງພຽງຢ່າງດຽວ ແລະ ຫຼາຍຄົນອາດຈະເຄີຍເຈິມາກັບໂຕທີ່ຈິງ, ເຖິງວ່າຈະເລີກກັນໄປດົນ ແຕ່ສິ່ງທີ່ເຄີຍເຮັດດ້ວຍກັນ ຫຼື ບ່ອນທີ່ໄປດ້ວຍກັນ ມັນກໍ່ເກີດຄວາມຜູກພັນ ແລະ ເໝືອນເປັນພາບສາຍຊ້ຳຢູ່ຢ່າງນັ້ນ.
“ມີຄົນມາທັກຖາມວ່າຊ່ວງນີ້ຂ້ອຍບໍ່ປົກກະຕິ ນັ້ນມັນບໍ່ມີເຈົ້ານັ້ນແຫຼະບໍ່ປົກກະຕິ” ໃນເນື້ອຮ້ອງນີ້ເປັນຄຳເວົ້າທຳມະດາ ແຕ່ເປັນສິ່ງທີ່ມັນບໍ່ຄືເກົ່າເລີຍ ເພາະການບໍ່ມີເຂົາ, ມັນເຮັດໃຫ້ທຸກຢ່າງແປກໆໄປໝົດ.
ໃນສ່ວນຂອງ MV ຍັງໄດ້ນຳເອົາບັນຍາກາດງານແຕ່ງດອງໃນຊ່ງຕົ້ນປີ 2001 ມາເຜີຍໃຫ້ເຫັນບັນຍາກາດເກົ່າໆສຸດຄລາສສິກ ຊວນເຮັດໃຫ້ເກີດຄວາມຄິດຮອດຄືກັບຄວາມໝາຍຂອງເພງ.