Muan Listen - ມ່ວນຊວນຟັງ

ແນ່ມ ປ່ອຍເພງວັນແມ່ ເປັນຕົວແທນໃຫ້ກຳລັງໃຈຄົນຫ່າງຄອບຄົວ ທີ່ຢາກກັບບ້ານໄປໃຫ້ແມ່ກອດຜ່ານບົດເພງ ແມ່ເອີ້ຍ

ໂດຍ: Khainapha Chanthathilath

11 March 2025● 213

ແນ່ມ ສາວປັອບສະຕາ ຫຼັງຈາກໄດ້ປ່ອຍເພງ ສະຕິ ຜົນງານເພງທີ່ສາມຂອງລາວໃນວັນທີ 7 ກຸມພາ 2025 ທີ່ຜ່ານມາ, ເນື້ອຫາເພງໄດ້ບອກເລົ່າເລື່ອງລາວ ແລະ ເຕືອນຕົວເອງໃຫ້ມີສະຕິກັບການໃຊ້ຊີວິດດ້ວຍການແຣັບສຸດເດືອດ ແລະ ໄດ້ແຣັບເປີຈາກຝັ່ງໄທ ຣາຊໂຢ ມາຊ່ວຍສ້າງໃຫ້ເພງມີມິຕິຫຼາຍຂຶ້ນ.

ຫຼ້າສຸດ ແນ່ມ ກໍໄດ້ປ່ອຍເພງທີ່ມີເນື້ອຫາສຸດຊຶ້ງກິນໃຈທີ່ເປັນເພງແຣັບໃນສະໄຕລ໌ຂອງລາວທີ່ປະສົມປະສານດົນຕີລາວ ແລະ ບົດກອນໃຫ້ພວກເຮົາໄດ້ອິນກັບເພງໃນວັນແມ່ທີ່ມີຊື່ວ່າ “ແມ່ເອີ້ຍ”.

ໃຜທີ່ກຳລັງພົບບັນຫາຊີວິດຢູ່ ພໍໄດ້ຟັງຄົງຮູ້ສຶກອົບອຸ່ນຫົວໃຈ ເພາະທຸກບັນຫາພວກເຮົາກໍມັກຈະຕັ້ງຄຳຖາມວ່າເປັນຫຍັງພວກເຮົາຕ້ອງຍອມລຳບາກແທ້ ທັງໆຊີວິດນີ້ພວກເຮົາກໍບໍ່ໄດ້ຕ້ອງການຫຍັງຫຼາຍເລີຍ ແລະ ພໍໄດ້ຖາມແມ່ກໍຈະໄດ້ຄຳຕອບທີ່ພວກເຮົາຮູ້ສຶກຄາໃຈມາໂດຍຕະຫຼອດ.

ເພງນີ້ໄດ້ເວົ້າເຖິງຄວາມສຳພັນອັນໃກ້ຊິດລະຫວ່າງແມ່ ແລະ ລູກ ທີ່ຜູ້ເປັນແມ່ຢາກໃຫ້ລູກນັ້ນມີອະນາຄົດໄກ ແລະ ສົ່ງລູກໄປທີ່ເມືອງໃຫຍ່ ໃຫ້ໄປຮຽນໄປເຮັດວຽກ ເພື່ອຢາກໃຫ້ລູກສະບາຍບໍ່ຕ້ອງລຳບາກໃນສະຖານທີ່ເຄີຍຢູ່ ໂດຍໄດ້ເລົ່າຜ່ານມຸມມອງທີ່ຜູ້ເປັນລູກໄດ້ສົງໄສ ແລະ ຕັ້ງຄຳຖາມເຖິງເຫດການຫຼາຍຢ່າງວ່າເປັນຫຍັງຄົນເຮົາຕ້ອງບໍ່ພໍໃຈໃນສິ່ງທີ່ມີຄືການພໍມີ ພໍກິນມັນກໍດີແລ້ວ ຈຳເປັນບໍ່ທີ່ຕ້ອງມີເງິນ ແລະ ຕ້ອງລວຍ, ພຽງແຕ່ຢາກຢູ່ກັບແມ່ພຽງເທົ່ານັ້ນ.

ນີ້ເປັນສິ່ງທີ່ຫຼາຍຄົນກໍຕ່າງສົງໄສ ແລະ ແມ່ນັ້ນກໍຈະມາບອກເຖິງເຫດຜົນທັງໝົດ ວ່າຊີວິດເຮົານັ້ນມັນກໍມີພຽງເທົ່ານັ້ນ ໃຫ້ຮຽນຕັ້ງໃຈມີຄວາມຮູ້ຈະໄດ້ທັນຄົນ ແລະ ພັດທະນາຕົນເພື່ອຕົວຂອງລູກເອງທັງນັ້ນ.

ເພງ ແມ່ເອີ້ຍ ຖືວ່າເປັນເພງທີ່ໃຫ້ກຳລັງໃຈຄົນທີ່ຢູ່ຫ່າງຄອບຄົວໃຫ້ສູ້ ແລະ ເປັນເພງທີ່ເປັນຕົວແທນບອກເລົ່າຄວາມຫວັງດີຈາກຜູ້ເປັນແມ່ໄດ້ດີເລີຍ.

ໂດຍ: ທີມບັນນາທິການ Muan