ຂອນແກ່ນ ມີດີກວ່າທີ່ຄິດ ຊວນເລາະຫຼັງ ມຂ. Columbo Craft Village ທີ່ສາຍສິນຕ້ອງບໍ່ພາດ!
ຢາກໄປທ່ຽວຂອນແກ່ນຫວາ? ໄປເຮັດຫຍັງຮອດບໍ່ມີແນວໃຫ້ຫຼິ້ນ… ເປັນຫຍັງຈະບໍ່ມີ! ຄວາມຄິດນີ້ ມ່ວນຊວນໄປ ຂໍຄ້ານສຸດໃຈເລີຍເດີ ເພາະທຸກເມືອງມັນມີສະເໜ່, ມີຄວາມພິເສດ ແລະ ມີບາງສິ່ງບາງຢ່າງເຊື່ອງຢູ່ຖ້າໃຫ້ເຮົາເຂົ້າໄປຄົ້ນຫາຢູ່ສະເໝີເລີຍທຸກຄົນ.
ຖ້າໃຜກຳລັງຫາບ່ອນພັກຜ່ອນ, ຢາກໜີຄວາມວຸ່ນວາຍໄປປ່ອຍໃຈຊິລໆ ແຕ່ບໍ່ມີເວລາເດີນທາງຫຼາຍ, ມ່ວນຊວນໄປ ມີບ່ອນໜຶ່ງທີ່ຢາກເລົ່າໃຫ້ຟັງ ເຊິ່ງເປັນຊຸມຊົນນ້ອຍໆທີ່ໄດ້ລວມເອົາຄົນທີ່ມັກສິລະປະສາຍຊິລມາຢູ່ຮ່ວມກັນ ສະຖານທີ່ແມ່ນຢູ່ເຂດຫຼັງມະຫາວິທະຍາໄລ ຂອນແກ່ນ (ຫຼືເອີ້ນສັ້ນໆວ່າ ຫຼັງ ມຂ.) ທີ່ຊື່ວ່າ Columbo Craft village.
ບ່ອນນີ້ຈະມີບ້ານໄມ້ນ້ອຍໆແສນອົບອຸ່ນ ແລະ ຄວາມຮົ່ມເຢັນຂອງຕົ້ນໄມ້. ພໍແຕ່ກ້າວຂາເຂົ້າໄປ, ສຳລັບໃຜທີ່ມັກງານສິລະປະ ຈະຮັບຮູ້ເຖິງພະລັງງານດີໆຈາກບ່ອນນີ້ທັນທີ ເຊິ່ງບັນຍາກາດຄ້າຍຄືເວລາມັນຈະໝຸນຊ້າລົງ.
ເລື່ອງທີ່ເພີນທີ່ສຸດແມ່ນກິດຈະກຳເຮັດມືທີ່ມີໃຫ້ເລືອກເຮັດແບບຕາມໃຈມັກ, ໃຜທີ່ມັກເລື່ອງສິລະປະ ກໍສາມາດໄປນັ່ງປັ້ນດິນເຜົາ, ເພັ້ນຈອກ-ເພັ້ນຈານ, ນັ່ງລະບາຍສີເທິງແຜ່ນຜ້າໃບ ຫຼື ຈະໄປນັ່ງຮ້ອຍລູກປັດເຮັດສາຍແຂນ, ສາຍຄໍເກ໋ໆໄວ້ໃສ່ເອງກໍໄດ້.
ນອກຈາກງານສິລະປະແລ້ວ, ຢູ່ບ່ອນນີ້ຍັງມີຮ້ານກາເຟ ແລະ ຮ້ານເຂົ້າໜົມ Homemade ນ້ອຍໆເຊື່ອງຢູ່ ພ້ອມທັງຮ້ານປຶ້ມ Somjing Book ໃຫ້ໄດ້ເລືອກອ່ານປຶ້ມດີໆ. ຖ້າໂຊກດີໄປຖືກມື້ທີ່ມີງານ, ບາງເທື່ອກໍຈະມີຕະຫຼາດນັດຂາຍຂອງເຮັດມື, ຂອງມືສອງ, ປຶ້ມເກົ່າ ຫຼື ກ້ອງຖ່າຍຮູບ.
ຈຸດເດັ່ນທີ່ຫຼາຍຄົນມັກກໍຄື ບັນດານ້ອງແມວປະຈຳບ້ານທີ່ມັກຈະຍ່າງມາທັກທາຍ ແລະ ນັ່ງເປັນໝູ່ເຮົາ ເຊິ່ງສະຖານທີ່ນີ້ໄດ້ໃຫ້ຄວາມຮູ້ສຶກວ່າການໄດ້ໃຊ້ເວລາກັບໃຜຈັກຄົນ ຫຼື ການທີ່ໄດ້ຢູ່ກັບໂຕເອງ, ໄດ້ປົດປ່ອຍຄວາມຄິດສ້າງສັນມັນດີສຸດໆໄປເລີຍທຸກຄົນ.
Columbo Craft village ເປີດຕັ້ງແຕ່ 11:00 ຫາ 18:00 (ປິດທຸກໆ ວັນອັງຄານ).
ຖ້າໃຜມີໂອກາດໄດ້ໄປ ຂອນແກ່ນ ແລ້ວຢາກຫາບ່ອນພັກຜ່ອນສະໝອງ, ບ່ອນນີ້ຖືວ່າເປັນອົກຊິເຈນຊັ້ນດີທີ່ຄວນໄປສຳຜັດດ້ວຍໂຕເອງເດີ.