Update

“ໃຫ້ຄິດກ່ອນຖ່າຍຮູບ” ເຄັດລັບການເລົ່າເລື່ອງຜ່ານກ້ອງຈາກໄວໜຸ່ມລາວທີ່ຄວ້າຫຼຽນເງິນລະດັບໂລກ ທີ່ງານ Higashikawa Youth Fest 2026

ໂດຍ: Khainapha Chanthathilath

21 September 2026● 17

✦ AI Summarized

Key Takeaways:

• ນັກຮຽນມັດທະຍົມປາຍຊາວລາວ 3 ຄົນ ຈາກທີມແຕ້ມແສງ (Tamsang Academy) ໄດ້ຮັບລາງວັນຫຼຽນເງິນ (ຮອງອັນດັບ 1) ໃນການແຂ່ງຂັນຖ່າຍຮູບລະດັບໂລກ ທີ່ປະເທດຍີ່ປຸ່ນ.
• ຜົນງານທີ່ຊະນະເລີດແມ່ນຊຸດພາບຖ່າຍຊື່ Small things still here, ສະທ້ອນເຖິງວິຖີຊີວິດ ແລະ ທຳມະຊາດ.
• ການແຂ່ງຂັນດັ່ງກ່າວແມ່ນເທດສະການແລກປ່ຽນພາບຖ່າຍສາກົນສຳລັບນັກຮຽນມັດທະຍົມປາຍ ຄັ້ງທີ 11, Higashikawa Youth Fest 2026.
• ນັກຮຽນໄດ້ຊະນະເລີດລະດັບຊາດຈາກໂຄງການ Tenkawa Laos Photo Contest ໂດຍມີຫົວຂໍ້ "ຄວາມງາມໃນທ້ອງຖິ່ນຂອງເຈົ້າ" ເພື່ອເປັນຕົວແທນໄປແຂ່ງຂັນ.
• ນອກຈາກປະສົບການຖ່າຍຮູບແລ້ວ, ນັກຮຽນຍັງໄດ້ຮຽນຮູ້ການຄິດກ່ອນຖ່າຍ, ເທັກນິກກ້ອງ, ການເລົ່າເລື່ອງ, ການປັບຕົວໃຊ້ຊີວິດຕ່າງປະເທດ ແລະ ມິດຕະພາບ.

ເປັນສິ່ງທີ່ເຮັດໃຫ້ຮູ້ສຶກປະທັບໃຈ ແລະ ໜ້າຍິນດີຫຼາຍ ກັບຄວາມສາມາດຂອງໄວໜຸ່ມມັດທະຍົມປາຍລາວເຮົາ. ເພາະພວກເຂົາທັງ 3 ຄົນ, ຫາກໍໄປລຸຍງານແຂ່ງຂັນຖ່າຍຮູບລະດັບໂລກຢູ່ ປະເທດຍີ່ປຸ່ນ ແລ້ວຄວ້າຫຼຽນເງິນກັບບ້ານມາໃຫ້ທຸກຄົນຊື່ນໃຈໄດ້.

ນັກຮຽນທັງ 3 ຄົນຈາກທີມ ແຕ້ມແສງ (Tamsang Academy) ເປັນຕົວແທນຈາກ ສປປ ລາວ ເຊິ່ງມີສະມາຊິກຄື: ສາວິກາ ພິມພິສານ, ໄຄແຜ່ນ ເສລີພົງໄຊ ແລະ ແໝ່ມໂມລີ້ ເວີນວິລາວົງ.

ພວກເຂົາໄດ້ຮ່ວມກັນສ້າງສັນຜົນງານພາບຖ່າຍຊຸດ Small things still here ຈົນສາມາດຄວ້າລາງວັນອັນດັບ 2 ໃນງານເທດສະການແລກປ່ຽນພາບຖ່າຍສາກົນສຳລັບນັກຮຽນມັດທະຍົມປາຍ ຄັ້ງທີ 11, Higashikawa Youth Fest 2026 ໃນປະເພດທີມ (Group Category) ມາໄດ້.

ເທັກນິກການເລົ່າເລື່ອງທີ່ເຮັດໃຫ້ຊະນະລາງວັນອັນດັບ 2

ພວກເຂົາທັງ 3 ຄົນ, ເລີ່ມຕົ້ນດ້ວຍການຊະນະເລີດການປະກວດລະດັບປະເທດຈາກໂຄງການ Tenkawa Laos Photo Contest ພາຍໃຕ້ຫົວຂໍ້ ຄວາມງາມໃນທ້ອງຖິ່ນຂອງເຈົ້າ ຈົນໄດ້ຮັບສິດເປັນຕົວແທນ ສປປ ລາວ ເດີນທາງໄປແຂ່ງຂັນຕໍ່ໃນງານ Higashikawa Youth Fest 2026 ຢູ່ເມືອງ ຮິກະຊິຄາວະ ແຂວງ ຮັອກໄກໂດ ປະເທດ ຍີ່ປຸ່ນ.

ພໍໄປຮອດຍີ່ປຸ່ນງານນີ້ບໍ່ແມ່ນເລື່ອງງ່າຍເລີຍ ເພາະກົດກະຕິກາໂຫດ ແລະ ທ້າທາຍຫຼາຍ ທຸກທີມມີເວລາພຽງ 3 ວັນເທົ່ານັ້ນ ໃນການລົງພື້ນທີ່ແທ້ທີ່ຕ້ອງໄດ້ ຖ່າຍຮູບ, ຄັດເລືອກຮູບ ແລະ ສົ່ງຜົນງານທີ່ສະທ້ອນເຖິງວິຖີຊີວິດ ແລະ ທຳມະຊາດຂອງເມືອງນັ້ນ.

ແຕ່ທີມໄວໜຸ່ມລາວເຮົາກໍສູ້ຊົນຈົນເຮັດຜົນງານຊຸດ Small things still here ເຂົ້າຕາກຳມະການສາກົນ ຄວ້າລາງວັນຫຼຽນເງິນ (Silver Award / ລາງວັນສະມາຄົມການທ່ອງທ່ຽວຮິກະຊິຄາວະ) ຫຼື ຮອງຊະນະເລີດອັນດັບ 1 ປະເພດທີມມາຄອງໄດ້ຢ່າງງົດງາມ ເຊິ່ງສິ້ນສຸດລົງໃນວັນທີ 22 ສິງຫາ 2026 ທີ່ຜ່ານມາ.

ສ່ວນອັນດັບ 1 ຫຼຽນຄຳ ເປັນຂອງໂຮງຮຽນມັດທະຍົມ Kangasala ຈາກຟິນແລນ ໃນຫົວຂໍ້ Life in black and white would be boring ແລະ ອັນດັບ 3 ຫຼຽນທອງ ເປັນຂອງໂຮງຮຽນ Taipei Municipal Zhong-zheng Senior High School ຈາກໄຕ້ຫວັນ ໃນຫົວຂໍ້ Welcome.

ບົດຮຽນຊີວິດ ແລະ ເທັກນິກການເລົ່າເລື່ອງຈາກໄວໜຸ່ມມັດທະຍົມລາວ

ພວກເຂົາທັງ 3 ຄົນໄດ້ເລົ່າຄວາມຮູ້ສຶກແບບເປີດໃຈວ່າ: “ໂຄງການນີ້ບໍ່ພຽງແຕ່ໃຫ້ປະສົບການຖ່າຍຮູບທີ່ດີ ແຕ່ເຮັດໃຫ້ຮູ້ຈັກຄິດກ່ອນຖ່າຍ, ໄດ້ຮຽນຮູ້ເທັກນິກກ້ອງ ແລະ ການເລົ່າເລື່ອງຈາກຜູ້ຊ່ຽວຊານ.

ສິ່ງທີ່ສຳຄັນທີ່ສຸດແມ່ນທັກສະການປັບຕົວໃຊ້ຊີວິດຢູ່ຕ່າງປະເທດ, ການໄດ້ເປີດມຸມມອງໃໝ່ໆ ແລະ ມິດຕະພາບທີ່ດີຈາກໝູ່ເພື່ອນຫຼາຍປະເທດທີ່ໄດ້ມາແລກປ່ຽນວັດທະນະທຳກັນ. ຂອບໃຈທຸກກຳລັງໃຈ ພ້ອມທັງຫວັງວ່າໂຄງການດີໆແບບນີ້ຈະມີຕໍ່ໄປເລື້ອຍໆ ເພື່ອໃຫ້ໄວໜຸ່ມລາວຮຸ່ນຕໍ່ໆໄປໄດ້ມີໂອກາດດີໆແບບນີ້ອີກ”.

ເຫັນແບບນີ້ແລ້ວ ຢາກໃຫ້ທຸກຄົນລອງຕິດຕາມຜົນງານ ແລະ ໂຄງການດີໆແບບນີ້ໄວ້ເລີຍ ເພື່ອຈະໄດ້ຮ່ວມສົ່ງກຳລັງໃຈ ແລະ ສະໜັບສະໜຸນໄວໜຸ່ມເກັ່ງໆຂອງເຮົາໃຫ້ໄດ້ໄປສະແດງສັກກະຍະພາບໃນເວທີສາກົນອີກໃນອະນາຄົດ.