ຈະເປັນແນວໃດ ຖ້າວ່າ… OOPS ປ່ອຍເພງໃໝ່ໃນຮອບເກືອບ 2 ປີ ທີ່ຟັງແລ້ວຕ້ອງມີຄຳຖາມໃນໃຈ
ຫຼັງຈາກທີ່ຫ່າງຫາຍໄປດົນເກືອບ 2 ປີເຕັມ, ຕັ້ງແຕ່ປ່ອຍອາລະບຳ ຊົງລຸງ Volume 2 ໃນທ້າຍປີ 2023, ໃນທີ່ສຸດວົງດົນຕີອິນດີ້ຄຸນນະພາບ OOPS ກໍກັບມາພ້ອມກັບຜົນງານໃໝ່ທີ່ເຮັດໃຫ້ແຟນໆ ຕ້ອງຮ້ອງ ໂອ້ຍ…. ເພາະເປັນການປ່ອຍແບບບໍ່ມີການສົ່ງສັນຍານໃດໆລ່ວງໜ້າ ກັບເພງທີ່ມີຊື່ວ່າ “What If?“
ເຖິງຈະເປັນການກັບມາທີ່ກະທັນຫັນ, ແຕ່ຄວາມມ່ວນ ແລະ ສະເໜ່ຂອງ OOPS ຍັງຄົງຢູ່ຄົບຖ້ວນ. ເພງນີ້ຍັງຄົງໄວ້ເຊິ່ງເອກະລັກສະເພາະຕົວຂອງພວກເຂົາ ທີ່ສາມາດພາຜູ້ຟັງທຸກຄົນໄປສຳຫຼວດອີກມຸມໜຶ່ງຂອງຄວາມຮູ້ສຶກແບບເລິກໆ ຜ່ານສຽງດົນຕີທີ່ເປັນເອກະລັກ ແລະ ເນື້ອເພງທີ່ມີຄວາມໝາຍ.
“What If?” ເປັນເພງທີ່ຕັ້ງຄຳຖາມໃນໃຈຂອງຫຼາຍໆຄົນເມື່ອເຮົາຢູ່ໃນຄວາມສຳພັນທີ່ບໍ່ຊັດເຈນ, ໂດຍສະເພາະເມື່ອເຮົາສົງໄສວ່າ “ຈະເປັນແນວໃດ ຖ້າວ່າເຮົາສອງຄົນຫາກຄິດຄືກັນ?” ມັນເປັນຄຳຖາມງ່າຍໆ ແຕ່ກັບມີຄວາມໝາຍ ແລະ ເຮັດໃຫ້ເຮົາຕ້ອງຄິດນຳ. ເພງນີ້ຄ້າຍຄືການເຊີນຊວນໃຫ້ເຮົາໄປເປີດໃຈ ແລະສຳຫຼວດຄວາມຮູ້ສຶກຂອງຕົວເອງ ພ້ອມໄປກັບດົນຕີທີ່ຟັງງ່າຍ ແຕ່ເຕັມໄປດ້ວຍລາຍລະອຽດ.
ສຳລັບໃຜທີ່ຍັງບໍ່ຮູ້ຈັກວົງ OOPS BAND, ພວກເຂົາຖືເປັນອີກໜຶ່ງກຸ່ມສິລະປິນໃນວົງການເພງລາວທີ່ຄວນຄ່າແກ່ການຕິດຕາມ ເຊິ່ງເປັນວົງອິນດີ້ທີ່ມີສະມາຊິກ 5 ຄົນ ທີ່ສ້າງສັນຜົນງານມາຫຼາຍປີ ນັບຕັ້ງແຕ່ປີ 2014 ເປັນຕົ້ນມາ. ຜົນງານຂອງພວກເຂົາຫຼາກຫຼາຍ, ເຕັມໄປດ້ວຍແນວເພງ ແລະ ສະໄຕລ໌ທີ່ແຕກຕ່າງຈາກວົງອື່ນໆ ຢ່າງເຫັນໄດ້ຊັດ.
ໃນຕອນບ່າຍທີ່ກຳລັງເຮັດວຽກຢູ່ ຫຼື ຕອນທີ່ກຳລັງຂັບລົດ, ລອງໃຫ້ເພງຂອງ OOPS BAND ເປັນຕົວເລືອກທີ່ດີເລີຍ. ຢ່າລືມກຽມຫູຟັງແລ້ວກົດເຂົ້າໄປຟັງເພງໃໝ່ “What If?” ນຳກັນ.
ທ່ານສາມາດຕິດຕາມຜົນງານຂອງພວກເຂົາໄດ້ທີ່:
Facebook: OOPS
YouTube: OOPS BAND Official Channel