Google ອັບເດດເພີ່ມ Gemini AI ເຂົ້າໃນ Google Docs ແລະ Google Sheets
ຫຼ້າສຸດ Google ມີການອັບເດດເພີ່ມ Gemini ຜູ້ຊ່ວຍ AI ຂອງ Google ເຂົ້າໃນແພລັດຟອມ Google Docs ແລະ Google Sheets ແລ້ວ.
Google ຍັງໄດ້ລະບຸວ່າ Gemini ໃນ Google Docs ແລະ Google Sheets ນັ້ນ, ບໍ່ໄດ້ໃຊ້ຂໍ້ມູນສ່ວນຕົວຂອງຜູ້ໃຊ້ງານທີ່ມີຢູ່ເພື່ອເຝິກ, ພັດທະນາ AI ເພາະລະບົບແມ່ນໄດ້ຄວບຄຸມປ້ອງກັນໄພຄວາມສ່ຽງ ແລະ ຍັງມີຄວາມປອດໄພສູງ.
ເລີ່ມເປີດໃຫ້ໃຊ້ໃນບາງພື້ນທີ່ແລ້ວໂດຍສະເພາະຜູ້ໃຊ້ Google Workspace ເຊັ່ນ: ບັນຊີອົງກອນ ແລະ ສະຖາບັນການຮຽນ-ການສອນ. ສຳລັບຜູ້ໃຊ້ທົ່ວໄປອາດເລີ່ມທະຍອຍເປີດໃຫ້ໃຊ້ງານໄດ້ໃນໄວໆນີ້ ໂດຍສາມາດກົດເປີດໃນ Settings ເມື່ອມີຕົວເລືອກ.
ການເພີ່ມຟີເຈີຣ໌ Gemini AI ນີ້ແມ່ນເຮັດໃຫ້ຜູ້ໃຊ້ສະດວກສະບາຍຫຼາຍຂຶ້ນ, ເຮັດໃຫ້ການເຮັດບັນຊີ ຫຼື ວຽກການຂຽນຈະບໍ່ເປັນເລື່ອງຍາກອີກຕໍ່ໄປ, ມື້ນີ້ກັອດຈິເລີຍຈະພາທຸກຄົນມາເບິ່ງວ່າມີຫຍັງໃໝ່ເພີ່ມເຂົ້າມາກັນແດ່.
ໃນ Google Docs
– ຊ່ວຍຂຽນເອກະສານພື້ນຖານເຊັ່ນ: ຈົດໝາຍ, ບົດລາຍງານ, ບົດຄວາມ ແລະ ອື່ນໆ.
– ແນະນຳການແກ້ໄຂພາສາ ຫຼື ປັບປຸງໂຄງສ້າງເນື້ອຫາ.
– ສະຫຼຸບເອກະສານ ຫຼື ດຶງຂໍ້ມູນສຳຄັນອອກມາໄດ້.
– ຊ່ວຍຄິດໄອເດຍ/ຫົວຂໍ້ໃໝ່ໆ ໃນວຽກຂຽນ.
ໃນ Google Sheets
– ຊ່ວຍສ້າງສູດອັດຕະໂນມັດເຊັ່ນ: SUM, IF, VLOOKUP ແລະ ອື່ນໆ.
– ແນະນຳການຈັດຮູບແບບຕາຕະລາງໃຫ້ດູດີ ແລະ ອ່ານງ່າຍ.
– ວິເຄາະຂໍ້ມູນ ຫຼື ສ້າງກຣາຟໄດ້ໄວຂຶ້ນ.
– ຕັ້ງຄຳຖາມ ແລະ ໃຫ້ Gemini ຊ່ວຍຄຳນວນ ຫຼື ສະຫຼຸບໃຫ້.
ໂດຍ: ທີມບັນນາທິການ Gadzila