ຟັງ ແດນຈໍາປາ ຈາກ GEMI9PK ເພງທີ່ເລົ່າກ່ຽວຄວາມງາມຂອງປະເທດລາວ
Highlights
- GEMI9PK ຈາກ Highbros ສົ່ງຜົນງານໃໝ່ “ແດນຈໍາປາ” ທີ່ນຳເອົາກິ່ນອາຍດົນຕີພື້ນເມືອງລາວມາປະສົມປະສານກັບແນວເພງ Pop ແລະ Afrobeats ສະໄໝໃໝ່ຢ່າງລົງຕົວ.
- ເປັນເພງທີ່ໄດ້ຮັບແຮງບັນດານໃຈຈາກຄວາມງົດງາມຂອງປະເທດລາວ ໂດຍສື່ສານເຖິງຄວາມສາມັກຄີ ແລະ ຄວາມຮັກທີ່ເຊື່ອມໂຍງທຸກຄົນເຂົ້າຫາກັນຜ່ານທ່ອນຮຸກທີ່ຕິດຫູ ແລະ ຈັງຫວະທີ່ຟັງງ່າຍ.
- ຈາກຄວາມມັກໃນເກມ GTA San Andreas ແລະ ສິລະປິນລະດັບໂລກຢ່າງ Mike Shinoda ແລະ Eminem, GEMI9PK ໄດ້ຖ່າຍທອດຈິດວິນຍານຮິບຮັອບມາສ້າງສັນເປັນບົດເພງທີ່ສະທ້ອນເຖິງຕົວຕົນ ແລະ ຄວາມອົບອຸ່ນຂອງສັງຄົມລາວ.
GEMI9PK ສິລະປິນແຣັບເປີຈາກສັງກັດ Highbros ຕ້ອນຮັບບຸນປີໃໝ່ລາວໂດຍການປ່ອຍເພງໃໝ່ທີ່ມີຊື່ວ່າ “ແດນຈໍາປາ Dan Champa” ອອກມາໃຫ້ພວກເຮົາໄດ້ຟັງກັນແລ້ວ.
ເພງນີ້ມີກິ່ນອາຍດົນຕີແບບດັ້ງເດີມຂອງລາວປະສົມປະສານກັບແນວເພງແບບປັອບ (Pop) ແລະ ແອບໂຟຣບີດ (Afrobeats) ເຊິ່ງໄດ້ຮັບແຮງບັນດານໃຈຈາກວັດທະນະທຳ, ປະເພນີຂອງແຕ່ລະຊົນເຜົ່າ ແລະ ຄວາມງົດງາມຂອງປະເທດລາວ.
ເປັນເພງທີ່ຟັງແລ້ວເຮັດໃຫ້ຮູ້ສຶກດີ ແຖມຍັງມີຄວາມໝາຍທີ່ຊ່ວຍເຕືອນໃຈຄົນຟັງວ່າ ເຖິງພວກເຮົາຈະມີຄວາມແຕກຕ່າງກັນ ແຕ່ຄວາມຮັກຄືສິ່ງທີ່ເຊື່ອມໂຍງພວກເຮົາທຸກຄົນໄວ້ນຳກັນ.
ເພງ ແດນຈໍາປາ ມີຈັງຫວະດົນຕີທີ່ຟັງງ່າຍລ່ຽນໄຫຼ ເປັນການປະສົມປະສານລະຫວ່າງສຽງດົນຕີສະໄໝໃໝ່ ແລະ ທ່ອນຮຸກ (Hook) ທີ່ຕິດຫູ. ເພງນີ້ຍັງໄດ້ສື່ສານເຖິງຄວາມຈິງໃຈ ຄວາມຮັກແສນອົບອຸ່ນ ແລະ ການຮັກແພງກັນຂອງຄົນລາວ.
ເສັ້ນທາງດົນຕີຂອງ GEMI9PK ມີຈຸດເລີ່ມຕົ້ນທີ່ໜ້າສົນໃຈຫຼາຍ ເຊິ່ງລາວແມ່ນແຣັບເປີທີ່ມີຄວາມສົນໃຈໃນວັດທະນະທຳຮິບຮັອບ (Hip-hop) ໃນເກມ GTA San Andreas.
ລາວກໍມັກທີ່ຈະແຕ່ງໂຕຮຽນແບບຕາມໂຕລະຄອນໃນເກມທີ່ມີຊື່ວ່າ Sean (Sweet), ສ່ວນແຣັບເປີທີ່ລາວມັກ ແລະ ເປັນແຮງບັນດານໃຈກໍແມ່ນ Mike Shinoda ຈາກວົງ Linkin Park ແລະ Eminem ໃນການຊຸກດັນໂຕເອງຈົນກາຍມາເປັນສິລະປິນທີ່ຖ່າຍທອດເອກະລັກຂອງລາວໃນປັດຈຸບັນ.