ໃນການເຮັດວຽກກັບຄົນອື່ນ ເຮົາປະຕິເສດບໍ່ໄດ້ວ່າ ການສື່ສານ ເປັນຮາກຖານສຳຄັນທີ່ຈະເຮັດໃຫ້ວຽກທຸກຢ່າງເດີນໜ້າໄປໄດ້. ແຕ່ໃນຫຼາຍອົງກອນພົບວ່າ ການສື່ສານທີ່ບໍ່ມີປະສິດທິພາບ ກາຍເປັນໜຶ່ງໃນຕົ້ນຕໍຂອງຄວາມເຂົ້າໃຈຜິດ, ຄວາມຂັດແຍ້ງ ແລະ ການເຮັດວຽກທີ່ຫຼ້າຊ້າ.
ມື້ນີ້ເຮົາຈະພາໄປເບິ່ງນຳກັນວ່າ ການສື່ສານທີ່ບໍ່ມີປະສິດທິພາບໜ້າຕາເປັນແນວໃດ ແລະ ຈະຈັດການກັບມັນແນວໃດ ເພື່ອບໍ່ໃຫ້ມັນຝັງຮາກໃນອົງກອນ ແລະ ຍ້ອນກັບມາທຳລາຍເຮົາ.
???? ລັກສະນະຂອງການສື່ສານທີ່ບໍ່ມີປະສິດທິພາບມີຫຍັງແດ່?
- ສື່ສານບໍ່ກົງປະເດັນ:
ໃຊ້ພາສາທີ່ຄຸມເຄືອ, ຍືດຍາວ ຫຼື ພາອອກນອກປະເດັນ ເຮັດໃຫ້ຜູ້ຮັບສານສັບສົນ ບໍ່ເຂົ້າໃຈສິ່ງທີ່ຕ້ອງເຮັດ. ຕົວຢ່າງ: ຫົວໜ້າບອກຄົນໃນທີມວ່າ “ຢາກໃຫ້ວຽກອອກມາດີທີ່ສຸດເດີ” ໂດຍບໍ່ບອກຢ່າງຊັດເຈນວ່າ ວຽກຕ້ອງແລ້ວຕອນໃດ ຫຼື ຄຸນນະພາບທີ່ຄາດຫວັງແມ່ນຫຍັງ. ຜົນລັບທີ່ໄດ້ແມ່ນ ຄົນໃນທີມອາດຕີຄວາມກັນເອງ ເຮັດໃຫ້ວຽກບໍ່ເປັນໄປຕາມທີ່ຫົວໜ້າຄາດຫວັງ ຫຼື ເປົ້າໝາຍທີ່ຕັ້ງໄວ້. - ຂາດການຟັງຢ່າງຕັ້ງໃຈ:
ຫຼາຍໆຄັ້ງເຮົາມັກຈະເຈິການຟັງແບບ “ພໍເປັນພິທີ” ຫຼື ການຄິດຄຳຕອບລະຫວ່າງທີ່ອີກຄົນເວົ້າ ເຊິ່ງນີ້ສະແດງເຖິງການບໍ່ໃຫ້ກຽດ, ບໍ່ໃສ່ໃຈ ແລະ ອາດພາດຂໍ້ມູນທີ່ສຳຄັນ. ຕົວຢ່າງ: ລະຫວ່າງການປະຊຸມ, ເມື່ອຄົນໜຶ່ງກຳລັງເວົ້າເຖິງບັນຫາທີ່ເຈິ ແລະ ອະທິບາຍວິທີທີ່ສາມາດແກ້ໄຂໄດ້ ແຕ່ເພື່ອນຮ່ວມທີມຊໍ້າພັດຫຼິ້ນໂທລະສັບມືຖື ຫຼື ເວົ້າແຊກ, ຜົນລັບເຮັດໃຫ້ຜູ້ເວົ້າຮູ້ສຶກວ່າບໍ່ໄດ້ຮັບການຮັບຟັງ ແລະ ອາດບໍ່ກ້າເວົ້າໃນຄັ້ງຕໍ່ໄປ.
- ບໍ່ມີຊ່ອງທາງການສື່ສານທີ່ຊັດເຈນ:
ອັນນີ້ຄິດວ່າເປັນບັນຫາທີ່ຫຼາຍຄົນເຈິ ເມື່ອຊ່ອງທາງການສື່ສານໃນປັດຈຸບັນມີເປັນສິບໆ ທັງ WhatsApp, E-mail, LINE, Messenger ແລະ ອື່ນໆ ເຊິ່ງບໍ່ໄດ້ມີການຕົກລົງກັນວ່າຈະໃຊ້ຊ່ອງທາງໃດເປັນຫຼັກໃນການສື່ສານກັນ ເຮັດໃຫ້ຂໍ້ມູນກະແຈກກະຈາຍ. ຕົວຢ່າງ: ບາງຄົນສົ່ງຂໍ້ມູນຜ່ານ WhatsApp ບາງຄົນໃຊ້ Email ບາງຄົນໂທຫາກັນ ເຮັດໃຫ້ຂໍ້ມູນບໍ່ລວມສູນ ແລະ ຄົນໃນທີມຕາມບໍ່ທັນ. ຜົນທີ່ໄດ້ຮັບແມ່ນ ວຽກຕົກຫຼົ່ນ, ຕິດຕາມຍາກ ແລະ ເກີດຄວາມສັບສົນພາຍໃນທີມ.
- ຕອບກັບຊ້າ ຫຼື ບໍ່ຕອບເລີຍ:
ການເຮັດແບບນີ້ຈະເຮັດໃຫ້ເກີດຄວາມຫຼ້າຊ້າໃນຂະບວນການເຮັດວຽກ ແລະ ເຮັດໃຫ້ທີມບໍ່ໝັ້ນໃຈໃນກັນ ແລະ ກັນ. ຕົວຢ່າງ: ພະນັກງານສົ່ງຂໍ້ຄວາມຖາມຫົວໜ້າວ່າຄວນໃຊ້ແບບຟອມໃດ ສຳລັບໂປຣເຈັກໃໝ່ ແຕ່ບໍ່ໄດ້ຮັບຄຳຕອບເປັນເວລາຫຼາຍມື້. ຜົນລັບແມ່ນ ວຽກຊ້າ, ເສຍເວລາ ແລະ ຂາດຄວາມໝັ້ນໃຈໃນການເຮັດວຽກ. - ອາລົມມາກ່ອນເຫດຜົນ:
ເມື່ອຕ້ອງສື່ສານເລື່ອງທີ່ຍາກໆ, ການໃຊ້ອາລົມ ເຊັ່ນ: ໃຈຮ້າຍ, ປະຊົດ ຫຼື ງຽບໃສ່ກັນ ອາດເຮັດໃຫ້ສະຖານະການຍິ່ງເຮັ່ງຮ້າຍກວ່າເກົ່າ. ຕົວຢ່າງ: ເມື່ອມີຄວາມເຫັນບໍ່ກົງກັນ, ຜູ້ຈັດການເວົ້າດ້ວຍນໍ້າສຽງປະຊົດປະຊັນ ແລະ ຕຳໜິຄົນໃນທີມຢ່າງຮຸນແຮງ. ຜົນລັບກໍຄື ບັນຍາກາດໃນທີມເຄັ່ງຕຶງ, ຂາດຄວາມໄວ້ໃຈ ແລະ ບໍ່ກ້າສື່ສານອີກ.
✅ ວິທີແກ້ໄຂ ແລະ ປັບປຸງການສື່ສານໃນທີມໃຫ້ມີປະສິດທິພາບ
- ຝຶກການສື່ສານຢ່າງກົງໄປກົງມາ ແລະ ຊັດເຈນ:
ໃຊ້ພາສາທີ່ເຂົ້າໃຈງ່າຍ, ກົງປະເດັນ, ບໍ່ອ້ອມໂລກ ແລະ ຄວນສະຫຼຸບໃຫ້ຊັດເຈນວ່າໃຜຕ້ອງເຮັດຫຍັງ ຕອນໃດ. ຕົວຢ່າງ: ແທນທີ່ຈະເວົ້າວ່າ “ຟ້າວເຮັດແດ່ເດີ” ຄວນເວົ້າວ່າ “ລົບກວນສົ່ງລາຍງານນີ້ພາຍໃນວັນພະຫັດນີ້ ເວລາ 17:00 ໂມງເດີ”. ຜົນລັບແມ່ນ ຜູ້ຮັບສານເຂົ້າໃຈຊັດເຈນວ່າຄວນເຮັດຫຍັງແນວໃດ ແລະ ຕອນໃດ.
- ຟັງໃຫ້ຫຼາຍກວ່າເວົ້າ:
ການຟັງຢ່າງຕັ້ງໃຈ, ບໍ່ຂັດຈັງຫວະ ແລະ ສະແດງຄວາມເຂົ້າໃຈດ້ວຍການທວນສິ່ງທີ່ໄດ້ຍິນຄືນ ຈະຊ່ວຍຫຼຸດຄວາມເຂົ້າໃຈຜິດໄດ້ຫຼາຍ.
▸ ຕົວຢ່າງ: ເມື່ອທີມງານເລົ່າບັນຫາ ໃຫ້ຜູ້ຟັງທວນຄວາມເຂົ້າໃຈເຊັ່ນ “ສະຫຼຸບແມ່ນ ເຈົ້າຕິດເລື່ອງເອກະສານຈາກຝ່າຍບັນຊີແມ່ນບໍ່?”.
▸ ຜົນລັບແມ່ນ ຊ່ວຍໃຫ້ເກີດຄວາມເຂົ້າໃຈທີ່ກົງກັນ ແລະ ຜູ້ເວົ້າຮູ້ສຶກວ່າໄດ້ຮັບການຮັບຟັງຢ່າງແທ້ຈິງ.
- ກຳນົດຊ່ອງທາງການສື່ສານທີ່ຊັດເຈນ:
ຕົກລົງຮ່ວມກັນວ່າເລື່ອງຮີບດ່ວນຄວນໃຊ້ຊ່ອງທາງໃດ, ເລື່ອງທົ່ວໄປໃຊ້ຊ່ອງທາງໃດ ເພື່ອປ້ອງກັນການຕົກຫຼົ່ນຂອງຂໍ້ມູນ.
▸ ຕົວຢ່າງ: ທີມຕົກລົງກັນວ່າ ໃຊ້ WhatsApp ສຳລັບວຽກເລັ່ງດ່ວນ ແລະ ໃຊ້ Email ສຳລັບເອກະສານທີ່ຕ້ອງເກັບເປັນຫຼັກຖານ.
▸ ຜົນລັບແມ່ນ ຫຼຸດການສື່ສານທີ່ຜິດພາດ ແລະ ທຸກຄົນຮູ້ວ່າຈະຫາຂໍ້ມູນຈາກຊ່ອງທາງໃດ.
- ມີການອັບເດດການສື່ສານຢ່າງສະໝໍ່າສະເໝີ:
ບໍ່ປ່ອຍໃຫ້ທີມຕ້ອງເດົາເອງ. ຄວນມີການອັບເດດຄວາມຄືບໜ້າ ຫຼື ແຈ້ງບັນຫາໃຫ້ກັນຮູ້ຢ່າງວ່ອງໄວ.
▸ ຕົວຢ່າງ: ຫົວໜ້າທີມສົ່ງລາຍງານສະຖານະໂປຣເຈັກທຸກວັນສຸກຕອນບ່າຍ ແລະ ເປີດຊ່ອງໃຫ້ທີມຖາມ–ຕອບ.
▸ ຜົນລັບ: ທີມຮູ້ຄວາມຄືບໜ້າ ບໍ່ຕ້ອງຄາດເດໄາ ແລະ ປັບແຜນໄດ້ທັນເວລາຫາກມີການປ່ຽນແປງ.
- ສ້າງວັດທະນະທຳການສື່ສານທີ່ປອດໄພ:
ໃຫ້ພະນັກງານຮູ້ສຶກວ່າເຂົາເຈົ້າສາມາດນຳສະເໜີ ຄວາມຄິດເຫັນ ຫຼື ເວົ້າເຖິງບັນຫາໄດ້ ໂດຍບໍ່ຖືກຕັດສິນ ຫຼື ເມີນເສີຍ.
▸ ຕົວຢ່າງ: ມີເວລາລົມກັນແບບເປີດໃຈທຸກສອງອາທິດ ເພື່ອໃຫ້ທຸກຄົນສາມາດສະເໜີຄວາມຄິດເຫັນ ຫຼືເວົ້າເຖິງສິ່ງທີ່ຕິດຄ້າງໃຈ.
▸ ຜົນລັບ: ເຮັດໃຫ້ທີມກ້າສື່ສານ, ເປີດໃຈ ແລະ ໄວ້ວາງໃຈກັນຫຼາຍຂຶ້ນ.
ສະຫຼຸບ:
ການສື່ສານທີ່ບໍ່ດີ ເປັນຄືກັບສົມຜົນ ສື່ສານພາດ = ເສຍເວລາ + ເສຍໃຈ + ເສຍວຽກ ເຊິ່ງທຳລາຍທັງວຽກ ແລະ ຄວາມສຳພັນໃນທີມ ແຕ່ຖ້າວ່າເຮົາມີຄວາມຕັ້ງໃຈຈະເຂົ້າໃຈກັນ, ລອງຝຶກການເວົ້າ ແລະ ການຟັງໃຫ້ດີຂຶ້ນ, ກຳນົດວິທີການສື່ສານໃຫ້ຊັດເຈນ ແລະ ເປີດໃຈຍອມຮັບຄວາມຄິດເຫັນຈາກກັນ ແລະ ກັນ ກໍຈະສາມາດປ່ຽນການເຮັດວຽກໃຫ້ເປັນພື້ນທີ່ແຫ່ງຄວາມຮ່ວມມື ແລະ ເຕີບໂຕໄປພ້ອມກັນໄດ້.
ຖ້າໃຜມີວິທີການໃນສື່ສານທີ່ດີ ແລະ ມີປະສິດທິພາບຢາກແບ່ງປັນກັບເຮົາ ກໍສາມາດຄອມເມັ້ນບອກກັນໄດ້ເດີ.
