ຍ້ອນກັບໄປເກືອບ 20 ປີກ່ອນ, ເຊື່ອເລີຍວ່າໜຶ່ງໃນເພງທີ່ຢູ່ໃນຄວາມຊົງຈຳຂອງຜູ້ຄົນ ບໍ່ວ່າຈະເປັນຄູູ່ຮັກທີ່ໃຊ້ເພງນີ້ໃນວັນພິເສດ ຫຼື ຄົນທີ່ເຄີຍມີຊ່ວງເວລາດີໆໃນຍຸກນັ້ນຄົງໜີບໍ່ພົ້ນເພງ “ຫວານ” ຂອງວົງ CELLS ແນ່ນອນ ເຊິ່ງເປັນຕຳນານບົດເພງທີ່ສ້າງປະກົດການໃນວົງການເພງລາວມາແລ້ວ. ເຖິງແມ່ນວ່າການເວລາຈະຜ່ານມາເປັນສິບໆປີ, ເພງນີ້ກໍຍັງໄດ້ຮັບຄວາມນິຍົມ ແລະ ຖືກນຳມາຫຼິ້ນໃນງານຕ່າງໆຢ່າງຕໍ່ເນື່ອງ.
ນີ້ອາດເປັນຍ້ອນຫຼາຍປັດໄຈທີ່ເຮັດໃຫ້ເພງນີ້ຍັງຄົງສົດໃໝ່ ແລະ ຢູ່ໃນໃຈຂອງຜູ້ຟັງຢ່າງເຮົາຢູ່ສະເໝີ ດ້ວຍເນື້ອເພງທີ່ຟັງງ່າຍເຂົ້າເຖິງກຸ່ມຜູ້ຟັງທຸກຍຸກເປັນອາລົມພື້ນຖານທີ່ຄົນທຸກຍຸກທຸກສະໄໝສາມາດເຂົ້າໃຈໄດ້ ແລະ ທຳນອງທີ່ເໝາະກັບບັນຍາກາດ.
ເຖິງແມ່ນວ່າເພງຈະປ່ອຍອອກມາດົນແລ້ວ ແຕ່ໃນຍຸກໂຊຊຽວມີເດຍຄອງເມືອງ ບໍ່ວ່າຈະເປັນ TikTok, Facebook ແລະ YouTube ແພລດຟອມເຫຼົ່າເປັນຕົວຊ່ວຍພາເພງເກົ່າໆກັບມາເປັນກະແສໄດ້ສະເໝີຖ້າມີຄົນຈັບມາໃຊ້ໃນວິດີໂອ ຫຼື ແຊອອກໄປກໍເຮັດໃຫ້ເພງໄດ້ຮັບຄວາມສົນໃຈອີກຄັ້ງ ແລະ ນີ້ກໍເປັນອີກໜຶ່ງປັດໄຈທີ່ຍັງເຮັດໃຫ້ເພງຫວານຍັງເປັນທີ່ນິຍົມໃນຍຸກປັດຈຸບັນ.
ເພງທີ່ຜູ້ຟັງທັງລາວ ແລະ ໄທ ຕົກຫຼຸມຮັກ
ຫວານ ປ່ອຍອອກມາເມື່ອ 18 ປີກ່ອນ (2007) ໃນອາລະບຳ ແຊວ ພາຍໃຕ້ສັງກັດ ສະໜາມຫຼວງມິວສິກ ທີ່ຂຶ້ນກັບ GMM Grammy ແລະ ພາບຈຳຂອງເພງນີ້ແມ່ນ ເອັມວີເພງທີ່ໄດ້ນາງເອກ “ແປ້ງ ອອນຈິຣາ ແຫຼມວິໄລ” ມາສະແດງ.
ເນື່ອງຈາກຜົນງານນີ້ທີ່ຢູ່ພາຍໃຕ້ສັງກັດຂອງໄທ, ການມາຂອງເພງນີ້ໄດ້ປ່ຽນພາບລັກຂອງເພງລາວວ່າມີຄວາມທັນສະໄໝ ສ້າງຄວາມແປກໃໝ່ໃຫ້ວົງການເພງ ແລະ ເຮັດໃຫ້ຄົນໄທຫັນມາຟັງເພງລາວຫຼາຍຂຶ້ນ.
ເພງ ຫວານ ໃນສື່ຕ່າງໆ
ຄວາມດັງຂອງເພງນີ້ໄດ້ຖືກສານຕໍ່ ແລະ ຈັບໄປເປັນເພງປະກອບຮູບເງົາຮ່ວມສ້າງລະຫວ່າງລາວໄທ “ສະບາຍດີ 2 ບໍ່ມີຄຳຕອບຈາກປາກເຊ” ເຊິ່ງເຂົ້າສາຍເມື່ອປີ 2013 ນຳສະແດງໂດຍ ເຣ ແມັກໂດນັລ ແລະ ຄຳລີ່ ພິລາວົງ.
ນອກຈາກນັ້ນ ເພງນີ້ຍັງຖືກນຳໄປ cover ໃນຫຼາຍໆເວີຊັນ ແຕ່ເວີຊັນທີ່ເປັນທີ່ຮູ້ຈັກ ແລະ ມີຜູ້ຟັງຫຼາຍ ເປັນຂອງ Kanomroo ເຊິ່ງປ່ອຍອອກມາໃນປີ 2018 ທາງ YouTube ທີ່ມີຍອດວິວສູງເຖິງ 8 ລ້ານຄັ້ງ.
ຣີບູດອີກຄັ້ງໃນຍຸກ LPOP ໂດຍ MVIIZ
ເຖິງວ່າ ເພງ ຫວານ ໄດ້ມີຫຼາຍສິລະປິນໄດ້ນຳໄປໃຊ້ ແລະ ໂຄເວີໃນແບບຫຼາຍເວີຊັນ, ແຕ່ທີ່ໜ້າຈັບຕາທີ່ສຸດໃນຕອນນີ້ແມ່ນ girl group ລາວ MVIIZ ໄດ້ປ່ອຍເພງນີ້ໃນເວີຊັັນຂອງຕົວເອງໂດຍທີ່ເຮົາຮູ້ກັນຢູ່ແລ້ວວ່າ ເພງນີ້ ຕົ້ນສະບັບເປັນເພງແນວ Rock, Pop ເມື່ອຖືກນຳມາໂຄເວີໂດຍ MVIIZ ສິລະປິນ L-POP ທີ່ມັກແຈກຄວາມສົດໃສໃນຜົນງານເພງຢູ່ແລ້ວນັ້ນ ແປວ່າເຮົາຈະໄດ້ເຫັນເພງຫວານໃນມຸມມອງໃໝ່ອີກຢ່າງແນ່ນອນ.
ຜົນງານທີ່ສົດໃສຂອງສາວໆ MVIIZ ສາມາດມີແຜນປ່ອຍອອກມາໃນວັນທີ 28 ກຸມພາ 2025 ທາງ YouTube ແລະ ທຸກແພລດຟອມສະຕຣີມມິງ.
ໂດຍ: ທີມບັນນາທິການ Muan