Weak Hero ແມ່ນຊີຣີສ໌ທີ່ຖືກດັດແປງມາຈາກ Webtoon ເຊິ່ງເປັນແນວແອັກຊັນ, ດຣາມ່າ ແລະ ຄວາມສຳພັນມິດຕະພາບລະຫວ່າງໝູ່ເພື່ອນໃນໂຮງຮຽນ ທີ່ມ່ວນຕ້ອງຂໍບອກເລີຍວ່າເລື່ອງນີ້ສາກຕໍ່ສູ້ແມ່ນມັນສຸດ ແລະ ນັກສະແດງຫຼັກຢ່າງພະເອກກໍສະແດງຄວາມຮູ້ສຶກອອກມາໃຫ້ອາລົມມືດມົນປົນອຶດອັດໄດ້ຢ່າງເລີກເຊິ່ງ.
ໃນຕອນທີ່ກຳລັງເບິ່ງຊີຣີສ໌ເລື່ອງນີ້ກໍເຮັດໃຫ້ຮູ້ສືກອິນຕາມສຸດໆ, ທັງເມື່ອຍ ແລະ ດິ່ງໄປກັບຊີນການສະແດງທີ່ຖ່າຍທອດຜ່ານຕົວລະຄອນທີ່ມີຊື່ວ່າ Yeon Si-eun ທີ່ງານສາຍຕາແມ່ນດີອາລົມທຸກຢ່າງລາວລ້ວນເລົ່າອອກມາຈາກທາງສາຍຕາທັງໝົດ ແລະ ເລື່ອງນີ້ຍັງໄດ້ສະທ້ອນບັນຫາການບູລລີ້ກັນໃນໂຮງຮຽນ ແລະ ການໃຊ້ຄວາມຮຸນແຮງໃນໂຮງຮຽນ.
Weak Hero Class 1
Yeon Si-eun ເປັນນັກຮຽນທີ່ມີຜົນການຮຽນດີເປັນອັນລະດັບ Top ໃນໂຮງຮຽນ ແລະ ເປັນຄົນທີ່ມີລັກສະນະບຸກຄະລິກມິດງຽບ, ຮັກການຮຽນ ແລະ ບໍ່ສົນໃຈໃຜເລີຍ ໃນແຕ່ລະມື້ລາວກໍມີແຕ່ນັ່ງຮຽນນັ່ງແກ້ໂຈດເລກຢ່າງດຽວ. ດ້ວຍຄວາມທີ່ເປັນເດັກຮຽນດີຈຶ່ງຖືກຫົວໂຈກປະຈຳຫ້ອງຢ່າງ Jeon Yeong-bin ໝາຍຫົວ.
Cast: Park Ji-hoon as Yeon Si-eun
ໃນມື້ໜຶ່ງທີ່ກຳລັງຈະເສັງເກັບຄະແນນ Si-eun ກໍຖືກ Oh Beom-Seok ລູກນັກການເມືອງດັງມີຖານະ ແຕ່ກໍມີນິໄສຄວາມຂີ້ຢ້ານ ແລະ ມັກເປໝູ່ໆ. ໄດ້ເອົາແຜ່ນຢາທີ່ເຮັດໃຫ້ເກີດອາການມືນເມົາ ແລະ ງ່ວງນອນມາຕິດທີ່ຫຼັງຄໍຂອງ Si-eun ໂດຍການກະທຳນີ້ແມ່ນເປັນຄຳສັ່ງຈາກ Yeong-bin, ເຮັດໃຫ້ໃນວິຊານັ້ນ Si-eun ເສັງບໍ່ໄດ້ຫຼາຍຂໍ້ຈົນເກີດອາການໃຈຮ້າຍ ແລະ ເຂົ້າໄປຕີ Yeong-bin ຈົນເຂົ້າໂຮງໝໍ.
Cast: Hong Kyung as Oh Beom-Seok
ເລື່ອງລາວກໍດຳເນີນໄປ Yeong-bin ກໍນຳລຸ້ນອ້າຍທີ່ເປັນນັກເລງ Jeon Seok-dae ເຂົ້າມາລຸມຕີ Si-eun ແລະ ກໍໄດ້ Ahn Su-ho ນັກມວຍເກົ່າທີ່ທັງຫຼໍ່ເກັ່ງຈົນໃຜໆກໍເກງໃຈ ແລະ Beom-seok ເຂົ້າມາຊ່ວຍໄວ້ເຮັດໃຫ້ທັງ 3 ໄດ້ເປັນໝູ່ກັນນັບຈາກນັ້ນມາ.
Cast: Choi Hyun-wook as Ahn Su-ho
ການຕໍ່ສູ້ຂອງພວກເຂົາຍັງບໍ່ຈົບເພາະຈາກການທີ່ມີບັນຫາກັບກຸ່ມນັກເລງເຮັດໃຫ້ຕ້ອງໄດ້ພົວພັນກັບພວກເວັບໄຊການພະນັນ, ເລື່ອງລາວຈະເປັນແນວໃດສາມາດເຂົ້າໄປຕື່ມໄດ້. ໃນພາກນີ້ໄດ້ເລົ່າໃຫ້ເຫັນປົມຂອງຕົວລະຄອນຫຼັກທັງ 3 ແລະ ຈຸດແຕກຫັກການຫັກຫຼັງກັນທີ່ຈະເຮັດໃຫ້ພວກເຮົາຕ້ອງອຶ້ງ.
ຄວາມປະທັບໃຈໃນມິຕິ ແລະ ປົມຂອງຕົວລະຄອນຕ້ອງຍົກ Class 1 ເພາະຕົວລະຄອນບໍ່ຫຼາຍ ແລະ ໄດ້ເຫັນເຖິງມຸມມອງການໄດ້ເດີນທາງໄປນຳຄວາມຄິດອາລົມທີ່ນັກສະແດງຖ່າຍທອດອອກມາ, ເຮັດໃຫ້ຮູ້ສຶກຜູກພັນກັບຕົວລະຄອນ ແລະ ເຂົ້າໃຈສະພາບແວດລ້ອມ-ສັງຄົມທີ່ຫຼໍ່ຫຼອມໃຫ້ເພວກເຂົາເປັນແບບນັ້ນ.
ໝາຍເຫດ: ເນື້ອຫາມີຄວາມຮຸນແຮງຄວນໃຊ້ວິຈາລະນະຍານໃນການເບິ່ງ
