|
Getting your Trinity Audio player ready...
|
ຫຼາຍໆຄົນຄົງຄຸ້ນເຄຍ ແລະ ຕ້ອງເຄີຍໄດ້ຟັງເພງຂອງນັກຮ້ອງສາວຄົນນີ້ “ນັດດາວ ທອນບັນດິດ”(Nutdao Thonebundit), ປັດຈຸບັນອາຍຸ 22 ປີ, ແຕ່ທຸກຄົນຮູ້ບໍ່ວ່າລາວບໍ່ໄດ້ພຽງແຕ່ຮ້ອງເພງ, ແຕ່ຍັງມີອາຊີບເປັນແມ່ຄ້ານຳອີກ, ຖືວ່າເປັນຄົນທີ່ບໍ່ເຄີຍຢຸດພັກ ແລະ ເຮັດຫຍັງຫຼາຍຢ່າງອີຫຼີ່.
ອີກບົດບາດໜຶ່ງທີ່ບໍ່ເວົ້າເຖິງເລີຍແມ່ນບໍ່ໄດ້, ເພາະເປັນປະເດັນຫຼັກທີ່ມ່ວນຈະເລົ່າໃຫ້ຟັງສຳລັບມື້ນີ້ກໍຄື ການເປັນໜຶ່ງໃນນັກສະແດງ ສຸກໃຈ It’s Okay the series ຂອງນັດດາວ, ເຊິ່ງມັນໄດ້ມີຄວາມທ້າທາຍຫຼາຍເພາະໄດ້ຮັບບົດເປັນຄົນທີ່ມີສະພາວະອາການຂອງ ”Panic disorder ຫຼື ໂລກວິຕົກກັງວົນ” ບົດບາດສຳຄັນໃນການຊ່ວຍຖ່າຍທອດບັນຫາສຸຂະພາບຈິດ.
ນັດດາວ ໄດ້ຮັບບົດເປັນ ດາ ໃນຊີຣີສ໌ ສຸກໃຈ ຜູ້ທີ່ມີຄວາມໂດດເດັ່ນ ແລະ ໝັ້ນໃຈໃນຕົວເອງ, ມັກຮັກໃນການຮ້ອງເພງແຕ່ມີເຫດບາງຢ່າງທີ່ບໍ່ຄາດຄິດເຮັດໃຫ້ເກີດອາການວິຕົກກັງວົນ. ສຳລັບບົດບາດນີ້ຖືວ່າມີຄວາມທ້າທາຍຫຼາຍເພາະຕ້ອງໄດ້ຫຼິ້ນເລື່ອງການໃຊ້ອາລົມດຣາມ່າຢ່າງໜັກ. ພໍນັດດາວໄດ້ຮັບຟັງເນື້ອຫາ ແລະ ບົດບາດນີ້ກໍຮູ້ສຶກວ່າມັກ ແລະ ຢາກລອງ, ເພາະເປັນສິ່ງທີ່ບໍ່ເຄີຍເຮັດມາກ່ອນ.
ຕົວລະຕອນດານັ້ນຈະມີອາການວິຕົກກັງວົນ, ແຕ່ກໍຍັງມີຈຸດແຂງຄືມີຄວາມກ້າຫານ ແລະ ຕ້ອງການທີ່ຈະຕໍ່ສູ້ໃນໃຈເລິກໆ, ເພື່ອຄວາມຮັກຂອງລາວທີ່ມີຕໍ່ຄອບຄົວ, ນັ້ນກໍຄື ເອື້ອຍສາ ຈຶ່ງເຮັດໃຫ້ດາສູ້ ແລະ ກ້າວຜ່ານມັນໄປໄດ້.
ນັດດາວໄດ້ແບ່ງປັນວິທີການສັງເກດອາການຂອງໂລກວິຕົກກັງວົນ ແລະ ໃຫ້ກຳລັງໃຈຄົນທີ່ກຳລັງພົບບັນຫາຢູ່ໃນຂະນະນີ້.
“ອາການໂລກແພນິກໃນເບື້ອງຕົ້ນແມ່ນຈະມີອາການໃຈສັ່ນ, ມືເຢັນ, ຕາມືດມົວ, ຫາຍໃຈບໍ່ທົ່ວທ້ອງ, ມືສັ່ນ, ໂຕສັ່ນ ແລະ ບາງເຄສອາດຈະເຖິງຂັ້ນໂຕແຂງເລີຍ. ເວລາທີ່ເຈິສະຖານະການທີ່ກະທົບຕໍ່ຈິດໃຈ ຫຼື ເຫດການທີ່ບໍ່ໂອເຄຕໍ່ໂຕເອງ ຫຼື ຕອນທີ່ຄິດເຖິງເລື່ອງທີ່ກັງວົນ ແລະ ຢ້ານກົວຢູ່.
ຖ້າຫາກມີອາການຢ່າງໃດຢ່າງໜຶ່ງໃນນີ້, ສິ່ງທີ່ຄວນເຮັດເບື້ອງຕົ້ນຄືປຶກສາໝໍເປັນອັນດັບທຳອິດ ແລະ ຢາກບອກທຸກຄົນວ່າ ທຸກຄວາມລົ້ມເຫຼວຄືສ່ວນປະສົມຂອງຄວາມສໍາເລັດ, ເຈົ້າເກັ່ງທີ່ສຸດແລ້ວເດີ ແລະ ຢາກບອກກັບຄົນທີ່ຕົກຢູ່ໃນສະຖານະການນີ້ວ່າທຸກບັນຫາມີທາງອອກສະເໝີ
” ນັດດາວໄດ້ກ່າວໄວ້.
ສຸດທ້າຍແລ້ວຂໍຝາກຜົນງານຂອງນັດດາວໄວ້ເພື່ອໃຫ້ທຸກຄົນໄດ້ໄປຕິດຕາມຕໍ່ໃນຊີຣີສ໌ເລື່ອງ ສຸກໃຈ It’s Okay the series. ໄປເປັນກໍາລັງໃຈໃຫ້ທຸກຕົວລະຄອນໃນຊີຣີສ໌ແດ່ເດີ ແລະ ຝາກຕິດຕາມຜົນງານໃໝ່ທີ່ນັດດາວຈະປ່ອຍໄວໆນີ້ທີ່ຊອ່ງ YOUTUBE NUTDAO ຂອບໃຈທຸກຄົນ.
ໂດຍ: ທີມບັນນາທິການ Muan
