Imel ສ້າງສີສັນແປກໃໝ່ ໃນເພງ Trust issues ດ້ວຍດົນຕີສະໄຕລ໌ City Pop

ມ່ວນຄິດວ່າຫຼາຍໆຄົນຄົງຢາກທີ່ຈະຮູ້ຈັກກັບສາວນ້ອຍສຽງຫວານຄົນນີ້ແນ່ນອນເລີຍ ເພາະເພງຂອງລາວຖືວ່າ Hit ຕິດກະແສສຸດໆ ແລະ ອົດທີ່ຈະແພງກັບຄວາມໜ້າຮັດສົດໃສນີ້ບໍ່ໄດ້, ທັງແນວເພງທີ່ສົດໃໝ່ບໍ່ຄືໃຜຕາມມາດ້ວຍເອກະລັກຂອງສາວນ້ອຍຄົນນີ້ Imel (ໄອເມລ) ຫຼື ດອນມະນີ ເທບມຸງຄຸນ ປັດຈຸປັດອາຍຸ 20 ປີ, ກຳລັງສຶກສາຢູ່ສະຖາບັນສຸດສະກະ.

ຕົວຕົນຂອງໄອເມລເປັນຄົນແປກຄົນໜຶ່ງ, ມັກເຮັດມັກເວົ້າຫຍັງແປກໆ ແລະ ເປັນຄົນອາລົມປ່ຽນງ່າຍແຮງ, ຢູ່ນິ່ງບໍ່ຄ່ອຍເປັນ, ມັກຊອກຫຍັງເຮັດຕະຫຼອດເວລາ ແລະ ມັກການຮຽນຮູ້ສິ່ງໃໝ່ໆ. ເວລາວ່າງກໍມັກຟັງເພງ, ຫຼິ້ນກີຕ້າ-ຮ້ອງເພງ, ເບິ່ງໜັງ, ແຕ້ມຮູບ ແລະ ຫຼິ້ນເກມ.

“ຈຸດເລີ່ມຕົ້ນໃນການມາເປັນນັກຮ້ອງຂອງໄອເມລ ຍ້ອນເປັນຄົນທີ່ມັກດ້ານດົນຕີຕັ້ງແຕ່ນ້ອຍເລີຍ ເພາະຄອບຄົວມັກດ້ານນີ້ ແລະ ຈຸດເລີ່ມຕົ້ນທີ່ຢາກຮ້ອງເພງຢາກຫຼິ້ນດົນຕີກໍຍ້ອນຄົນໃນຄອບຄົວ, ຕັ້ງແຕ່ຈື່ຄວາມໄດ້ກໍເຫັນພໍ່ມັກຟັງເພງ-ຫຼິ້ນດົນຕີ. ໄອເມລຊຶມຊັບຈາກພໍ່ໃນດ້ານດົນຕີ, ຈົນມາຮອດຕອນມໍຕົ້ນກໍເລີ່ມຢາກທີ່ຈະຈິງຈັງເລີຍຂໍໃຫ້ພໍ່ສອນ ແຕ່ພໍ່ກໍບອກໃຫ້ໄປຮຽນນຳອ້າຍ ແລະ ອ້າຍກໍສອນແຕ່ພື້ນຖານໃຫ້ທີ່ເຫຼືອກໍຮຽນດ້ວຍຕົວເອງ ພໍເວລາຜ່ານໄປກໍຮູ້ສຶກວ່າພັດທະນາຂຶ້ນໃດ, ແຕ່ເປົ້າໝາຍໄອເມລແມ່ນຢາກເປັນສິນລະປິນ.

ເວລາຜ່ານໄປຈົນຮອດຕອນໃກ້ຈະຮຽນຈົບຢູ່ໆກໍມີສິລະປິນລາວ 2 ຄົນ ທີ່ເຮັດໃຫ້ຮູ້ສຶກຕົກໃຈແຮງ, ຈົນຮູ້ສຶກວ່ານີ້ແມ່ນຄົນລາວຫວາ? ເພາະທັງສອງກໍເປັນສິລະປິນທີ່ສ້າງແຮງບັນດານໃຈເຮັດໃຫ້ມີແຮງກຳລັງໃຈສຸດໆເລີຍໃນ Gen ຂອງໄອເມລ ແລະ ນັ້ນກໍຄື Tanu ແລະ Gomen.

ຕອນນັ້ນໄອເມລກໍບໍ່ທັນໄດ້ເລີ່ມເຮັດຫຍັງມີແຕ່ພັດທະນາການຮ້ອງຂອງຕົວເອງ, ຈົນຮຽນຈົບມັດທະຍົມແລ້ວຈະໄປຮຽນຕໍ່ ແຕ່ກໍດ້ວຍບັນຫາຫຼາຍໆຢ່າງສຸດທ້າຍກໍໄດ້ມາຢູ່ກັບອ້າຍ ແລະ ເອື້ອຍທີ່ເປັນພີ່ນ້ອງກັນ, ໄດ້ມາຮູ້ວ່າອ້າຍຂອງໄອເມລເປັນໝູ່ກັບ Gomen. ອ້າຍກໍແນະນຳໄອເມລໃຫ້ Gomen. ຮູ້ຈັກ ຕໍ່ມາກໍຮູ້ຈັກກັບ Just” ພວກເຮົາໄດ້ເລີ່ມຕົ້ນເຮັດເພງນຳກັນຈົນໄດ້ເປັນເພງ Trust issues (ຄອຍຖາມ) ທີ່ເປັນເພງທຳອິດຂອງ Imel ເພງນີ້ຈະເປັນແນວ City Pop ອອກແນວສົດໃສ ແລະ ກໍໄດ້ Gomen. ແລະ Just” ເຂົ້າມາເພີ່ມສີສັນໃຫ້ກັບເພງ” ໄອເມລໄດ້ເລົ່າໃຫ້ທີມງານມ່ວນຟັງ.

ໃນຕອນທຳອິດທີ່ປ່ອຍເພງທຸກຄົນແມ່ນຄິດວ່າແນວເພງຂອງໄອເມລຈະແມ່ນມາທາງສາຍ pop, ແຕ່ໄອເມລບອກວ່າເປັນຄົນທີ່ມັກເພງຫຼາຍແນວເລີຍ ແລະ ຢາກທີ່ຈະທ້າທາຍຕົວເອງ, ຢາກເຮັດທຸກແນວທີ່ຕົວເອງມັກ ແລະ ອອກມາເປັນແບບຂອງຕົວເອງໃຫ້ທຸກຄົນໄດ້ລອງຟັງ ເຊິ່ງໃນອະນາຄົດພວກເຮົາອາດຈະເຫັນໄອເມລໄດ້ເຮັດເພງແນວ pop rock, R&B ຫຼື Indie Pop ກໍໄດ້.

ເປົ້າໝາຍຊີວິດໃນຕອນນີ້ຄືການໄດ້ລອງເຮັດໃນສິ່ງທີ່ມັກ, ໄດ້ລອງສິ່ງໃໝ່ໆທີ່ຕົວເອງຢາກເຮັດ ແລະ ຢາກເປັນຄົນທີ່ເວລາຄົນຄິດຫາສິລະປິນລາວຈະມີຊື່ Imel ໃນນັ້ນ. ແນວເພງຂອງໄອເມລທີ່ໄດ້ປ່ອຍອອກມາ ແລະ ຄິດວ່າມັນອາດຈະສ້າງຄວາມແປກໃໝ່ໃຫ້ແກ່ຄົນຟັງ, ເພາະດ້ວຍຄວາມທີ່ເປັນ City Pop ທີ່ເປັນເພງພາສາລາວ ແລະ ມັນອາດຈະສ້າງສີສັນແປກໃໝ່ໃຫ້ແກ່ເພງລາວເຮົາ.

ສຳລັບຜູ້ທີ່ເປັນແຮງບັນດານໃຈ ແລະ ແບບຢ່າງໃນດ້ານສະໄຕລ໌ດົນຕີຂອງໄອເມລ, ໃນສ່ວນນີ້ໄອເມລບອກວ່າຍັງບໍ່ສາມາດທີ່ຈະຕອບໄດ້ ເພາະວ່າຟັງເພງຫຼາຍຈົນບໍ່ຮູ້ວ່າຕົວເອງໄດ້ຈັບເອົາ Style ຂອງສິລະປິນໃດມາແດ່? ຂະໜາດມີຄົນຖາມວ່າມັກຟັງເພງແນວໃດກໍຍັງບໍ່ສາມາດຕອບໄດ້ຊັດເຈນ.

ໄອເມລໄດ້ເລົ່າໃຫ້ມ່ວນຟັງອີກວ່າ: “ຕັ້ງແຕ່ໄດ້ປ່ອຍເພງ Trust Issue ໄປສິ່ງທຳອິດທີ່ປ່ຽນໄປຄືເວລາອອກໄປຫຼິ້ນນຳໝູ່ ຫຼື ອ້າຍໆເອື້ອຍໆ, ດ້ວຍຄວາມທີ່ພວກເຂົາເປັນສິລະປິນກໍມັກຈະມີຄົນຂໍຖ່າຍຮູບແຕ່ຢູ່ໆກໍມີຄົນມາຂໍຖ່າຍໄອເມລ ເຊິ່ງບາງເທື່ອກໍງົງໆ ເອີ້ນເຮົາຫວາ? ອີຫຍັງປະມານນີ້, ແຕ່ກໍຮູ້ສຶກດີໃຈແຮງທີ່ມີຄົນຟັງ ແລະ ມີຄົນມັກເພງນີ້ ເພາະຕັ້ງໃຈເຮັດເພງນີ້ແຮງໃຊ້ເວລາກັບເພງນີ້ດົນສຸດໆກວ່າຈະໄດ້ປ່ອຍອອກມາໂດຍທີ່ບໍ່ຄິດວ່າຈະມີຄົນມັກ ແລະ ບໍ່ໄດ້ຄາດຫວັງຫຼາຍ. ພໍໄດ້ປ່ອຍຜົນງານເພງອອກໄປກໍຮູ້ສຶກຂອບໃຈ ແລະ ກໍດີໃຈທີ່ມີຄົນມັກຄົນຟັງຫຼາຍຂະໜາດນີ້”.

ສຸດທ້າຍນີ້ຂໍຝາກຜົນງານຫຼ້າສຸດ, ເພງ Trust issues (ຄອຍຖາມ) ແດ່ເດີ ແລະ ຝາກຕິດຕາມຜົນງານຕໍ່ໆໄປຂອງ Imel ແດ່ເດີອາດຈະມາໄວໆນີ້ ຂອບໃຈ.

ໂດຍ: ທີມບັນນາທິການ Muan