ຮູ້ຈັກ AiiLA ສິລະປິນໜຸ່ມຈາກຫຼວງນໍ້າທາ ຜູ້ຢາກສົ່ງຕໍ່ຄວາມເປັນລາວສູ່ສາຍຕາໂລກດ້ວຍສຽງເພງ

ເມື່ອເວົ້າເຖິງສິລະປິນຮຸ່ນໃໝ່ຂອງລາວທີ່ກຳລັງສ້າງສັນເສັ້ນທາງດົນຕີໃນແບບຂອງຕົວເອງ, ຊື່ຂອງ AiiLA ເຊິ່ງເປັນສິລະປິນຜູ້ມີເຊື້ອສາຍໄທດຳຈາກແຂວງຫຼວງນໍ້າທາ ຄົງເປັນໜຶ່ງໃນຊື່ທີ່ຫຼາຍຄົນເຄີຍເຫັນຜ່ານຫູຜ່ານຕາກັນມາແລ້ວ.

ດ້ວຍສຽງທີ່ເປັນເອກະລັກ ເຕັມໄປດ້ວຍພະລັງ ແລະ ສະເໜ່ທີ່ໂດດເດັ່ນ, ລາວກຳລັງນຳສະເໜີຄວາມເປັນລາວ ແລະ ອັດຕະລັກທີ່ຝັງເລິກລົງໃນສາຍເລືອດໃຫ້ກັບທົ່ວໂລກໄດ້ຮັບຮູ້ຜ່ານບົດເພງທີ່ສະທ້ອນເຖິງຄວາມມັກຮັກ ແລະ ຫົວໃຈຂອງຄົນຮຸ່ນໃໝ່.

AiiLA ຫຼື ຄຳຫລ້າ ນາບຸນແພງ ນັກຮ້ອງໄວອາຍຸ 25 ປີ ຈາກແຂວງຫຼວງນ້ຳທາຂອງລາວ ແລະ ອີກດ້ານໜຶ່ງກໍເປັນເຈົ້າຂອງທຸລະກິດສ່ວນຕົວ.

ຍ້ອນກັບໄປເມື່ອ 10 ປີຄືນຫຼັງ ໃນປີ 2012-2013, ໃນຕອນທີ່ເພງລາວເຮົາກຳລັງມາແຮງ ເຊິ່ງຕອນນັ້ນລາວເອງກໍຍັງໜຸ່ມນ້ອຍ ແລະ ໄດ້ໄປຮຽນມັດທະຍົມຕົ້ນຢູ່ນະຄອນຫຼວງວຽງຈັນ. ລາວໄດ້ຊຶມຊັບກັບເພງລາວໃນຍຸກນັ້ນຫຼາຍ ແລະ ລາວບອກກັບທີມງານມ່ວນວ່າ ຕົນເອງໄດ້ຟັງເພງລາວທຸກມື້ ບໍ່ວ່າຈະເລີກຮຽນ ຫຼື ໃນໂຮງຮຽນ ແລະ ໃນເວລາວ່າງກໍຈະມີການສົ່ງຈົດໝາຍຂໍເພງທີ່ເປີດໃນໂຮງຮຽນ.

“ທຸກໆແລງວັນສຸກ ໃນຕອນນັ້ນ ສິລະປິນທີ່ມາແຮງ ທີ່ຂ້ອຍມັກຟັງ ແມ່ນ ວົງ Pull T Club, Idolz, Cells, ຕ່າຍ ອາກາດ ແລະ ອ້າຍ ຕ້າ ເອແພັກ. ແລ້ວກໍມີອີກຫຼາຍໆເພງ ຫຼາຍໆສິລະປິນ. ເພງ ‘ຄົນບໍ່ສຳຄັນ’ ເພງນີ້ມັກແຮງເລີຍຟັງເຊົ້າ ຟັງແລງ.”

ລາວເລົ່າສູ່ຟັງວ່າ ຄວາມລໍາບາກ ແລະ ອຸປະສັກຂອງການເປັນສິລະປິນໃນລາວ ສໍາລັບໂຕເອງແມ່ນການເຂົ້າເຖິງ.

“ລາວຟັງລາວຍັງໜ້ອຍ ແລະ ລາວບໍ່ຍອມຮັບລາວຍັງຫຼາຍ. ອັນນີ້ຄືຄວາມຈິງທີ່ສິລະປິນທຸກຄົນຕ້ອງເຈິ ແລະ ຂາດການສະໜັບສະໜຸນ ເຮັດໃຫ້ສິລະປິນລາວຫຼາຍຄົນໄປບໍ່ເຖິງຝັນເພາະທຸກຢ່າງມັນມີຕົ້ນທຶນ.”

AiiLA ກ່າວວ່າ ຜົນງານເພງທີ່ຕົນເອງຮູ້ສຶກພາກພູມໃຈທີ່ສຸດແມ່ນ “ໂສພາ” ເນື່ອງຈາກເປັນເພງທໍາອິດ ເປັນເພງແຈ້ງເກີດຂອງລາວ ເຮັດໃຫ້ມີກຸ່ມຄົນຟັງທັງໃນ ແລະ ຕ່າງປະເທດ ລວມທັງເປັນເພງທີ່ເອົາວັດທະນະທຳລາວຍຸກເກົ່າມາເຜີຍແຜ່ສູ່ສາຍຕາຜູ້ຟັງທົ່ວໄປ.

ຫຼັງຈາກທີ່ເຮັດເພງມາໄດ້ໄລຍະໜຶ່ງ, AiiLA ກໍເປັນທີ່ຮູ້ຈັກຫຼາຍຂຶ້ນ ມີທັງຜູ້ຟັງທີ່ເປັນຄົນລາວ ແລະ ຕ່າງປະເທດ ແລະມາຮອດປີ 2023 ລາວກໍໄດ້ໂອກາດທີ່ຈະກ້າວເດີນໄປສູ່ເສັ້ນທາງທີ່ເຮັດໃຫ້ເຕີບໃຫຍ່ຂຶ້ນ ຈາກການໄດ້ເປັນໜຶ່ງໃນສິລະປິນທີ່ໄດ້ຮ່ວມສະແດງໃນ Sabaidee Fest ທີ່ເປັນເທດສະການດົນຕີ-ວັດທະນະທຳ ຂອງຊາວອາຊີຕາເວັນອອກສ່ຽງໃຕ້ ຢູ່ສະຫະລັດອາເມລິກາ.

AiiLA ເລົ່າວ່າ ປະສົບການຂຶ້ນສະແດງຄອນເສີດທີ່ ສະຫະລັດອາເມລິກາ ທໍາອິດເລີຍກໍຄື “ຄວາມຕື່ນເຕັ້ນ”.

“ຢ້ານແຮງເພາະບໍ່ເຄີຍຂຶ້ນເວທີໃຫຍ່ແບບນັ້ນມາກ່ອນ. ຄິດໃນໃຈວ່າຕາຍແທ້ ບາດນີ້ເຂົາສິຈັບຜິດ, ຈັບຈຸດເຮົາບໍ? ເຮົາສິສະແດງອອກມາໄດ້ດີບໍ? ມີແຕ່ຄວາມຢ້ານ. ແຕ່ພໍເຮົາໄດ້ໄປຢືນຢູ່ກາງເວທີນັ້ນຄວາມກົດດັນມັນຫາຍໄປໝົດເລີຍ. ໄດ້ຍິນ fc ຮ້ອງໃສ່ AiiLA AiiLA ເຮັດໃຫ້ຂ້ອຍມີໃຈຫຼິ້ນໂຄດໆເລີຍ. ແຟນຄລັບທຸກຄົນໜ້າຮັກຫຼາຍ. ຖືວ່າເປັນກັນເອງ ແລະ ມ່ວນຫຼາຍ.”

ສຳລັບຜົນງານເພງທີ່ຜ່ານມາຂອງລາວມີຢູ່ຫຼາຍເພງ ເຊັ່ນ: “ງາມອີ່ຫຼີ”, “ເຂົາມາກ່ອນ”, “I Love Hmong Girl Zoo Tiag Tiag”, “ມະຫັດສະຈັນ” ແລະ “ເຂົ້າມາເຮັດໃຫ້ເຈັບອີກແນ່”.

ໃນແຕ່ລະເພງຂອງລາວມັກຈະມີການນຳສະເໜີຄວາມເປັນລາວ ແລະ ອັດຕະລັກຂອງຊົນເຜົ່າ ເຂົ້າໄປນຳ ບໍ່ວ່າຈະເປັນການນຸ່ງຖື ເຊັ່ນໃນເພງ “ເຂົາມາກ່ອນ” ທີ່ເຄື່ອງແຕ່ງກາຍໃນເອັມວີເປັນເຄື່ອງນຸ່ງຂອງຊົນເຜົ່າ ຫຼື ໃນເພງ “ມະຫັດສະຈັນ” ທີ່ມີການໃຊ້ເຄື່ອງດົນຕີລາວ ເຊັ່ນ ລະນາດ ເຂົ້າມານຳ.

ນອກຈາກນັ້ນ ກໍຍັງມີເນື້ອຮ້ອງບາງສ່ວນທີ່ໃຊ້ພາສາມົ້ງ ເຊິ່ງລາວໄດ້ເປີດເຜີຍກັບທີມງານມ່ວນວ່າ ທີ່ເລືອກເອົາພາສາມົ້ງເຂົ້າມາໃຊ້ໃນເນື້ອເພງ ແມ່ນເນື່ອງຈາກມີຜູ້ຟັງທີ່ເປັນຄົນມົ້ງຕິດຕາມຜົນງານເພງຂອງລາວເປັນຈຳນວນຫຼາຍ.

^{ພາບຈາກ MV ເພງ ເຂົາມາກ່ອນ ໂດຍ AiiLA x SOPHAN x ສິລິພອນ ສີປະເສີດ}

ສາມາດຕິດຕາມການເຄື່ອນໄຫວຂອງ AiiLA ໄດ້ທີ່:

YouTube: AiiLA

YouTube: Kingdom Production

Facebook: Aii LA