ສຸດໃຈ ຮັບໄຊທອງ ຕົວແທນຊົນເຜົ່າລາວ ທີ່ຢາກໃຫ້ໂລກເຫັນຄວາມງາມຫຼາກຫຼາຍຂອງປະເທດລາວ
“ນ້ອງຢາກເປັນກະບອກສຽງທີ່ຊ່ວຍສົ່ງເສີມຄວາມສະເໝີພາບລະຫວ່າງຊົນເຜົ່າ ບໍ່ໃຫ້ມີການແບ່ງແຍກ ຊົນຊັ້ນ ແລະ ຊົນເຜົ່າ ພ້ອມກັບເປັນແຮງບັນດານໃຈໃຫ້ລຸ້ນໃໝ່ກ້າທີ່ຈະເປັນຕົນເອງ ໃນຮູບແບບຊົນເຜົ່າຂອງໂຕເອງ.” ນັ້ນຄືຄວາມຕັ້ງໃຈອັນແຮງກ້າຂອງ ສຸດໃຈ ຮັບໄຊທອງ ຫຼື ນໍ້າຝົນ MEL01 ຜູ້ເຂົ້າປະກວດນາງສາວບັນດາເຜົ່າລາວ 2025 ຕົວແທນຊົນເຜົ່າລາວລຸ່ມ, ທີ່ເຖິງແມ່ນຈະເປັນຕົວແທນຊົນເຜົ່າທີ່ມີຄົນຮູ້ຈັກຫຼາຍຢູ່ແລ້ວ, ແຕ່ຄວາມຄິດຂອງນາງກັບຍິ່ງໃຫຍ່ເກີນຂອບເຂດທີ່ຄົນທົ່ວໄປຄິດ.
ສຸດໃຈ ຮັບໄຊທອງ, ອາຍຸ 21 ປີ, ປັດຈຸບັນກຳລັງສຶກສາຢູ່ທີ່ສະຖາບັນການທະນາຄານ ສາຂາການບັນຊີ ປີທີ 3. ດ້ວຍຄວາມຮັກ ແລະ ຄວາມພາກພູມໃຈໃນວັດທະນະທໍາຂອງລາວເຮົາທຸກຊົນເຜົ່າ, ນໍ້າຝົນໄດ້ຕັດສິນໃຈເຂົ້າຮ່ວມເວທີ ນາງສາວບັນດາເຜົ່າ 2025 ດ້ວຍຈຸດປະສົງທີ່ຊັດເຈນຄື: ຢາກໃຫ້ໂລກໄດ້ເຫັນຄວາມງາມທັງຮູບລັກ ແລະ ຈິດໃຈຂອງແມ່ຍິງລາວທຸກບັນດາເຜົ່າ. ນອກຈາກນີ້, ຍັງຫວັງເປັນກະບອກສຽງໃຫ້ກັບທຸກຊົນເຜົ່າ ເພື່ອສົ່ງເສີມຄວາມສະເໝີພາບ ແລະສ້າງແຮງບັນດານໃຈໃຫ້ຄົນຮຸ່ນໃໝ່ກ້າທີ່ຈະສະແດງຄວາມເປັນຕົວຕົນໃນຮູບແບບຊົນເຜົ່າຂອງຕົນເອງ.
ສໍາລັບນໍ້າຝົນ, ການເປັນຕົວແທນຂອງຊົນເຜົ່າໃນເວທີນີ້ມີຄວາມໝາຍ ແລະ ຄວາມສໍາຄັນຫຼາຍ. ເຖິງແມ່ນວ່າລາວຈະເປັນຊົນເຜົ່າລາວລຸ່ມ, ແຕ່ລາວກໍຢາກນໍາສະເໜີ ແລະ ສົ່ງເສີມຊົນເຜົ່າອື່ນໆອີກ ເພາະຄິດວ່າຊົນເຜົ່າລາວນັ້ນເປັນທີ່ຮູ້ຈັກຫຼາຍຢູ່ແລ້ວ. ນາງຈຶ່ງຢາກໃຫ້ທຸກຄົນໄດ້ຮູ້ເຖິງວັດທະນະທໍາຂອງຊົນເຜົ່າອື່ນໆເຊັ່ນກັນ ເພື່ອໃຫ້ຊົນເຜົ່າອື່ນໆໄດ້ຮັບຄວາມນິຍົມຊົມຊອບບໍ່ໜ້ອຍກວ່າກັນ.
ນໍ້າຝົນເລົ່າເຖິງເອກະລັກຂອງຊົນເຜົ່າລາວລຸ່ມຄື ວັດທະນະທໍາແລະຮີດຄອງປະເພນີທີ່ຊັດເຈນ ເຊັ່ນ: ການໃສ່ບາດຢາດນໍ້າ, ການບາສີສູ່ຂວັນ, ບຸນອອກພັນສາ ລວມໄປເຖິງການນຸ່ງຖືທີ່ໂດດເດັ່ນ. ແຕ່ນອກຈາກເຜົ່າຕົນເອງແລ້ວ ນາງຍັງຢາກນໍາສະເໜີເອກະລັກຂອງຊົນເຜົ່າພວນ, ເຊິ່ງມີພູມປັນຍາໃນການສຶກສາຄົ້ນຄວ້າພະທໍາວິໄນຈົນສາມາດແປພາສາບາລີອອກເປັນພາສາລາວໄດ້, ລວມທັງຍັງມີຮີດຄອງປະເພນີທີ່ເປັນເອກະລັກຄື “ບຸນກໍາຟ້າ” ເຊິ່ງເປັນປະເພນີທີ່ກໍາລັງຈະຖືກລືມ. ນໍ້າຝົນຫວັງວ່າຈະໄດ້ຍົກຍໍຊົນເຜົ່າພວນໃຫ້ທຸກຄົນໄດ້ຮູ້ຈັກ ແລະສືບສານປະເພນີນີ້ໃຫ້ຄົງຢູ່ຄູ່ລາວຕະຫຼອດໄປ.
ຖ້ານາງໄດ້ຮັບຕໍາແໜ່ງ, ພາຍໃນໜຶ່ງປີ ນໍ້າຝົນຕັ້ງໃຈຈະເຮັດໂຄງການ “ສາມັກຄີຊົນເຜົ່າສ້າງລາວ ສູ່ສາຍຕາໂລກ” ໂດຍການເຂົ້າຮ່ວມກັບທຸກບັນດາເຜົ່າ ເພື່ອບັນທຶກແລະຖ່າຍທອດຄວາມຮູ້ທາງວັດທະນະທໍາປະສົມປະສານກັບຄວາມທັນສະໄໝ ໃຫ້ໄວລຸ້ນໄດ້ຮູ້ຈັກວັດທະນະທໍາຂອງຕົນ ແລະໃຫ້ໂລກໄດ້ເຫັນຄວາມງາມອັນຫຼາກຫຼາຍຂອງຜູ້ຍິງລາວ. ນາງເຊື່ອວ່າວິທີນີ້ຈະຊ່ວຍສ້າງຄວາມສາມັກຄີໃຫ້ກັບທຸກຊົນເຜົ່າ ເຮັດໃຫ້ທຸກຄົນໄດ້ຈັບມືກັນ, ຮູ້ຈັກວັດທະນະທໍາຂອງກັນແລະກັນຫຼາຍຂຶ້ນ ແລະບໍ່ມີການແບ່ງແຍກກັນອີກຕໍ່ໄປ.
ສໍາລັບວິທີການຮັກສາຮີດຄອງປະເພນີໄປພ້ອມໆກັບການປັບຕົວເຂົ້າກັບຍຸກສະໄໝໃໝ່, ນໍ້າຝົນເຊື່ອວ່າວິທີທີ່ດີທີ່ສຸດຄືການ ສືບສານດ້ວຍການມີສ່ວນຮ່ວມ ໂດຍໃຫ້ໄວໜຸ່ມໄດ້ເຂົ້າມາຮຽນຮູ້ ແລະ ມີປະສົບການຈິງກັບຮີດຄອງປະເພນີຜ່ານກິດຈະກໍາ ແລະ ສື່ທັນສະໄໝ. ນາງແນະນໍາໃຫ້ເກັບຂໍ້ມູນອັນເກົ່າແກ່ລົງໃນຮູບແບບດິຈິຕອລ ແລະໃຊ້ສື່ສັງຄົມອອນລາຍເປັນສະພານເຊື່ອມໃຫ້ໂລກໄດ້ຮູ້ຈັກວັດທະນະທໍາຂອງຊົນເຜົ່າ, ໂດຍທີ່ຍັງຮັກສາຄຸນຄ່າແລະຈິດວິນຍານດັ່ງເດີມໄວ້ຢ່າງຄົບຖ້ວນ.
ທ່ານສາມາດຮ່ວມສົ່ງແຮງໃຈແລະເປັນສ່ວນໜຶ່ງໃນການສານຝັນຂອງ ນໍ້າຝົນ MEL01 ໃຫ້ໄດ້ກ້າວໄປສູ່ຮອບ 5 ຄົນສຸດທ້າຍແບບອັດຕະໂນມັດ ໂດຍການເຂົ້າໄປໂຫວດໄດ້ທີ່: https://missethniclaos.wevote.la ຢ່າລືມມາສະໜັບສະໜຸນສາວງາມຄົນເກັ່ງຄົນນີ້ນຳກັນເດີ!