ປັດຈຸບັນນີ້, ມີເຫດການຫຼາຍຢ່າງເກີດຂຶ້ນໃນສັງຄົມ ແລະ ກໍຈະມີບາງກໍລະນີທີ່ເຮັດໃຫ້ເງິນໃນບັນຊີຂອງພວກເຮົາມີຄວາມສ່ຽງຫຼາຍ ຄົງຈະໜີບໍ່ພົ້ນບັນດາ ພວກມິດສາຊີບ ທີ່ມັກມີກົນໂກງນຳມາຕົວະ ຫຼື ຫຼອກຫຼວງ ພວກເຮົາຫຼາກຫຼາຍຮູບແບບ.
ສູດກົນໂກງອີກຮູບແບບໜຶ່ງຂອງພວກມິດສາຊີບທີ່ມັກໃຊ້ຄືຄວາມໄວ້ໃຈທີ່ເຮົາມີປອມເປັນຄົນທີ່ເຮົາຮູ້ຈັກເຊັ່ນ: ໝູ່, ຄອບຄົວ, ຫຼື ພີ່ນ້ອງ ຜ່ານ Facebook, WhatsApp ແລະ ຊ່ອງທາງອອນລາຍອື່ນໆ ເພື່ອຕົວະໃຫ້ໂອນເງິນ ຫຼື ກົດລິ້ງທີ່ອັນຕະລາຍ.
ພວກມິດສາຊີບສາມາດເວົ້າລົມກັບເຮົາໄດ້ຢ່າງແນບນຽນ ຈົນບາງຄັ້ງເຮັດໃຫ້ເຮົາເຊື່ອວ່າແມ່ນຄົນທີ່ເຮົາຮູ້ຈັກແທ້ໆ ແລະ ເປັນຕົວຈິງ. ພວກເຮົາຈະເຮັດແນວໃດເພື່ອຫຼີກລ້ຽງ ແລະ ລະວັງພວກມິດສາຊີບທີ່ອາດຈະເຂົ້າມາຄຸກຄາມເຮົາໃນອະນາຄົດ. ມື້ນີ້ ເລີຍຊວນທຸກຄົນມາປ້ອງກັນຕົວເອງຈາກການຕົກເປັນເຫຍື່ອ.
ສິ່ງທີ່ຄວນລະວັງ
- ຢ່າຟ້າວໂອນເງິນ: ບໍ່ວ່າຈະອ້າງວ່າດ່ວນສຸກເສີນສໍ່າໃດ ກໍຢ່າຟ້າວໂອນເງິນໃຫ້ທັນທີ.
- ຢ່າເຊື່ອຮູບໂປຣໄຟລ໌: ຢ່າຫຼົງເຊື່ອພຽງແຕ່ຍ້ອນຮູບໂປຣໄຟລ໌ ຫຼື ຊື່ຄືກັນກັບຄົນທີ່ເຮົາຮູ້ຈັກ.
- ສັງເກດຄວາມຜິດປົກກະຕິ: ຖ້າເຂົາບອກວ່າໂທລະສັບເພ, ໃຊ້ເບີໃໝ່ ຫຼື Facebook ໃໝ່ ໃຫ້ສົງໄສໄວ້ກ່ອນວ່າອາດຈະແມ່ນມິດສາຊີບ.
ວິທີປ້ອງກັນ
- ໂທຢືນຢັນ: ໃຊ້ Video Call ໂທຫາຄົນນັ້ນໂດຍກົງເພື່ອຢືນຢັນຕົວຕົນ.
- ກວດສອບຂໍ້ມູນ: ກວດເບິ່ງເລກບັນຊີ ແລະ ຊື່ບັນຊີໃຫ້ລະອຽດກ່ອນໂອນເງິນທຸກຄັ້ງ.
- ສັງເກດພາສາທີ່ໃຊ້: ຖ້າສັງເກດເຫັນວ່າການພິມ ຫຼື ພາສາທີ່ໃຊ້ແປກໄປຈາກປົກກະຕິ ໃຫ້ຢຸດການສົນທະນາກ່ອນ.
- ໃຊ້ລະຫັດລັບ: ລອງຖາມຄຳຖາມສ່ວນຕົວ ຫຼື ໃຊ້ລະຫັດລັບທີ່ຮູ້ກັນສະເພາະສອງຄົນ ເພື່ອຢືນຢັນ.
- ແຈ້ງເຕືອນ: ຖ້າຮູ້ວ່າຖືກປອມແປງບັນຊີ, ໃຫ້ກົດລາຍງານ ແລະ ໂພສແຈ້ງເຕືອນໝູ່ເພື່ອນເພື່ອປ້ອງກັນບໍ່ໃຫ້ຄົນອື່ນຕົກເປັນເຫຍື່ອ.
ທຸກຄົນຄວນມີສະຕິ, ກວດສອບໃຫ້ແນ່ໃຈກ່ອນຕັດສິນໃຈໂອນເງິນ ຫຼື ເຮັດຫຍັງກໍຕາມ ເພື່ອຄວາມປອດໄພຂອງຕົວເຮົາເອງ ແລະ ຢ່າລືມແບ່ງປັນໃຫ້ຄອບຄົວຜູ້ໃຫຍ່ໃນບ້ານໃຫ້ລະມັດລະວັງ ເພື່ອຫຼຸດຄວາມສ່ຽງຈາກການຖືກຕົວະເອົາເງິນ.
