|
Getting your Trinity Audio player ready...
|
ຊວນຟັງເພງ Thousand Miles ເພງໃໝ່ຫຼ້າສຸດຈາກຄ້າຍ Highbros Entertainment ເຊິ່ງນີ້ບໍ່ແມ່ນພຽງເພງຮັກທຳມະດາ ແຕ່ເປັນເພງທີ່ມີຄວາມໝາຍຫຼາຍສຳລັບຄົນໆໜຶ່ງທີ່ໄດ້ອອກເດີນທາງໄກເພື່ອຕາມຫາຝັນ, ລາວມີເປົ້າໝາຍທີ່ມີຄ່າຄືການພັດທະນາວົງການເພງລາວໃຫ້ກ້າວສູ່ສາກົນ ແລະ ນີ້ຄືຈຸດເລີ່ມຕົ້ນເລື່ອງລາວແສນຫວານໃນເພງນີ້ ຂອງຜູ້ຢູ່ເບື້ອງຫຼັງຄື ເຣມີ ຫຼື Remy Highbros Producer ນັ້ນເອງ.
ເພງທີ່ສ້າງຈາກເລື່ອງຈິງຂອງ Remy Highbros
ເພງນີ້ໄດ້ຮັບແຮງບັນດານໃຈມາຈາກຊີວິດຈິງຂອງ ເຣມີ ຊາຍໜຸ່ມເຊື້ອສາຍລາວ-ສັນຊາດອາເມລິກາ ຜູ້ຕັດສິນໃຈເດີນທາງໄກຈາກອາເມລິກາທີ່ມີໄລຍະຫ່າງຈາກລາວເຖິງ 8000 Miles (ປະມານ 12,800 ກິໂລແມັດ) ແລະ ການເດີນທາງຄັ້ງນີ້ກໍເຮັດໃຫ້ ເຣມີ ໄດ້ພົບຮັກແທ້ ເຊິ່ງເປັນສາວງາມຈາກລາວ.
ພາບ: Remy Highbros
ພວກເຂົາມີຫຼາຍສິ່ງທີ່ສົນໃຈກົງກັນ, ທັງສອງຄົນຍັງຮັກໃນວຽກທີ່ກ່ຽວກັບສຽງເພງ ແລະ ສິ່ງນີ້ເປັນສິ່ງທີ່ສົ່ງເສີມຄວາມສຳພັນກາຍເປັນຈຸດເລີ່ມຕົ້ນຂອງເລື່ອງ “ຄວາມຮັກທີ່ມີອຸດົມການດຽວກັນ”.
ເພງນີ້ມີຄວາມໂດດເດັ່ນທາງດ້ານແນວດົນຕີທີ່ໄດ້ການປະສົມປະສານແບບ Country Music ກັບເນື້ອຮ້ອງທີ່ມີທັງພາສາລາວ ແລະ ອັງກິດ ໄດ້ຢ່າງກົມກ່ອມລົງໂຕ. ພິເສດ, ເພງນີ້ຍັງໄດ້ນັກຮ້ອງພາຍໃນຄ້າຍທີ່ມີຄວາມສາມາດຢ່າງ RGB ແລະ Gemi9PK ມາຮ່ວມຮ້ອງ ເຮັດໃຫ້ເພງນີ້ຍິ່ງມີສະເໜ່ຫຼາຍຂຶ້ນ.
ເປັນເພງທີ່ໜ້າຮັກຫຼາຍ ທຸກຄົນຕ້ອງໄດ້ລອງຟັງ, ມ່ວນ ຮູ້ສຶກວ່າເພງນີ້ສາມາດເປັນອີກແຮງກຳລັງໃຈໃຫ້ຫຼາຍຄົນທີ່ມີຄວາມຝັນ, ຄວາມເຊື່ອ ແລະ ຫົວໃຈທີ່ຮັກໃນສຽງເພງ ນັ້ນມີຄວາມຫວັງດີໆທີ່ຈະໄດ້ພົບຮັກແທ້ໃນຈັກມື້ໜຶ່ງຄືກັບ ເຣມີ.
