ມັກໃຜຢູ່ “ສະກິດ” ເລີຍ ຄົນໂສດອາດມີແຟນກ່ອນຈົບປີ ເພາະ Meta ນຳຟີເຈີເກົ່າສຸດຮິດໃນຍຸກທຳອິດກັບມາ
ສາຍຂີ້ອາຍຕ້ອງມັກຟີເຈີນີ້ ເພາະເຮົາອາດມີແຟນກ່ອນຈົບປີກໍໄດ້ ຖ້າກຳລັງແອບມັກໃຜຢູ່ສະກິດເລີຍ! ຂ່າວດີສຳລັບຄົນໂສດ Meta ດຶງເອົາຟີເຈີສຸດຮິດໃນຍຸກທຳອິດຂອງແພລັດຟອມ Facebook ກັບມາ ແລະ ນັ້ນຄືປຸ່ມ “ສະກິດ ຫຼື Poke (ປຸ່ມຮູບໄອຄອນນິ້ວຊີ້👉)”.
ຟີເຈີ ສະກິດ ຖືກອອກແບບໃຫ້ໃຊ້ໃນສະຖານະການທີ່ເໝາະກັບການສະແດງອອກຄືການ Flirting (ຈີບ) ຫຼື Playfu (ກວນຫຼິ້ນ) ເຊິ່ງ Meta ຕັ້ງໃຈເຮັດໃຫ້ເຮົາສາມາດ “ທັກທາຍແບບກວນ-ເບົາໆ” ກັບໝູ່ໃນ Facebook ເພື່ອໃຫ້ເຮົາ ຫຼື ໝູ່ ໄດ້ມີໂອກາດໃນການທຳຄວາມຮູ້ຈັກໃກ້ຊິດກັນ (interaction) ຫຼາຍຂຶ້ນ.
ເຮົາຈະສາມາດສັງເກດເຫັນປຸ່ມສະກິດໄດ້ຢູ່ທີ່ໜ້າໂປຣໄຟລ໌ຂອງໝູ່ເຮົາ ເຊິ່ງຢູ່ຕິດກັບປຸ່ມສົ່ງຂໍ້ຄວາມ, ເຮົາຍັງສາມາດຍ້ອນກັບໄປເຫັນວ່າທີ່ຜ່ານມາມີໃຜມາສະກິດເຮົາແດ່ ແລະ ເຮົາຍັງສາມາດເຫັນວ່າເຮົາເຄີຍສະກິດໃຜແດ່ໃນອະດີດ.
ນອກຈາກນີ້, Meta ຍັງໄດ້ອັບເດດໃຫ້ຟີເຈີນີ້ມີລູກຫຼິ້ນທີ່ຫຼາກຫຼາຍ ເພື່ອຫວັງເຈາະກຸ່ມຜູ້ໃຊ້ງານຮຸ່ນໃໝ່ ໂດຍການເພີ່ມ “Poke Count” ເພາະຖ້າເຮົາມີຈຳນວນການສະກິດຫຼາຍເທົ່າໃດ ກໍຈະມີສັນຍາລັກ Emoji ຄວາມສະໜິດທີ່ແຕກຕ່າງກັນ (ຄ້າຍໆກັບການເຕີມໄຟ “Streak” ໃນແພລັດຟອມຕິກຕອກ).
ຖ້າເຮົາບໍ່ຢາກຖືກໃຜກວນ ກໍສາມາດ “Block Poke” ໄດ້ທັນທີໃນໜ້າ Activity ຫຼື ໜ້າໂປຣໄຟລ໌ ໂດຍບໍ່ຈຳເປັນຕ້ອງບລັອກທັງບັນຊີຜູ້ໃຊ້ງານ.
ວິທີໃຊ້ງານຟີເຈີ Poke ຫຼື ປຸ່ມ ສະກິດ ນັ້ນງ່າຍສຸດໆ, ທຳອິດເຂົ້າໄປທີ່ໜ້າໂປຣໄຟລ໌ໝູ່ > ກົດທີ່ໄອຄອນ Poke 👉 (ຢູ່ຂ້າງໆປຸ່ມສົ່ງຂໍ້ຄວາມ).
ໃຜທີ່ຢາກຮູ້ປະຫວັດທັງໝົດຂອງຟີເຈີສະກິດເພື່ອຕອບກັບຄົນທີ່ມາສະກິດເຮົາ, ເບິ່ງສະຖິຕິ ຫຼື ໝູ່ທີ່ Facebook ແນະນຳໃຫ້ສະກິດ, ກັອດຈິ ນຳລິ້ງມາໄວ້ໃຫ້ແລ້ວ: facebook.com/pokes