|
Getting your Trinity Audio player ready...
|
ເມື່ອເຮົາກຳລັງຢູ່ໃນຊ່ວງເວລາທີ່ຫົວໃຈບອບບາງ ຄວາມຮັກທີ່ບໍ່ມີຢູ່ຈິງກໍອາດກາຍເປັນສິ່ງທີ່ຄ່ອຍໆປອບໃຈເຮົາໄດ້. ມັນຄືກັບ “ຢາຫຼອກ (Placebo)” ທີ່ເຖິງແມ່ນບໍ່ມີສານອອກລິດແທ້, ແຕ່ຄວາມເຊື່ອທີ່ວ່າມັນຈະຊ່ວຍປິ່ນປົວກໍສາມາດເຮັດໃຫ້ເຮົາຮູ້ສຶກດີຂຶ້ນໄດ້ຊົ່ວຄາວ. ຄວາມສຸກແບບປອມໆນີ້ເຮັດໃຫ້ເຮົາຫຼົງຢູ່ໃນພາບລວງຕາ, ຫຼົງຄິດວ່າຄວາມຮັກນັ້ນເປັນຄວາມຈິງ. ແຕ່ເມື່ອຄວາມຈິງຖືກເປີດເຜີຍ, ຄວາມສຸກນັ້ນກໍຫາຍໄປຢ່າງສິ້ນເຊີງ, ເຫຼືອໄວ້ພຽງຄວາມເຈັບປວດທີ່ຍິ່ງໃຫຍ່ກວ່າເກົ່າ.
ເພງ “ຢາຫຼອກ (PLACEBO)” ຂອງ JENNY BELLA ແລະ SENJX ໄດ້ນຳສະເໜີຄວາມເລິກເຊິ່ງຂອງຄວາມເຈັບປວດຜ່ານບົດເພງໄດ້ຢ່າງຊັດເຈນ. ເພງນີ້ແມ່ນການຮ່ວມງານກັນລະຫວ່າງ JENNY BELLA ນັກຮ້ອງສາວສຽງດີ ທີ່ຖ່າຍທອດຄວາມຮູ້ສຶກອ່ອນໂຍນ-ເຈັບປວດ ແລະ SENJX ແຣັບເປີໜຸ່ມທີ່ມາເພີ່ມສີສັນໃຫ້ເພງດ້ວຍສ່ວນຂອງການແຣັບທີ່ໜັກແໜ້ນ.
ດ້ວຍການປະສົມປະສານສຽງຮ້ອງນີ້, ເຮັດໃຫ້ເພງມີມິຕິທາງອາລົມທີ່ຫຼາກຫຼາຍ ເຊິ່ງສື່ໃຫ້ເຫັນເຖິງຄວາມສັບສົນໃນຄວາມຮູ້ສຶກຂອງຄົນທີ່ກຳລັງປະສົບກັບຄວາມຮັກ ຫຼື ກຳລັງຕິດຢູ່ໃນສະຖານະການນີ້.
ເພງ ຢາຫຼອກ (PLACEBO)
“Can You Tell Me How to Treat…” ບົດເພງນີ້ເລີ່ມຕົ້ນດ້ວຍຄຳຖາມທີ່ສັບສົນໃນໃຈຂອງຄົນທີ່ກຳລັງປະເຊີນກັບຄວາມຈິງອັນໂຫດຮ້າຍ, ຄວາມຮັກທີ່ເຄີຍໄດ້ຮັບບໍ່ເຄີຍມີຢູ່ຈິງ ແຕ່ມັນກັບສ້າງຄວາມສຸກໃຫ້ລາວໄດ້. ສິ່ງນີ້ເຮັດໃຫ້ລາວຮູ້ສຶກເໝືອນຄົນປ່ວຍທີ່ມີຄວາມຫວັງໄດ້ຮັບ “ຢາຫຼອກ” (placebo) ທີ່ຄິດວ່າຈະຊ່ວຍໃຫ້ລາວດີຂຶ້ນໄດ້.
ເພງນີ້ປຽບທຽບຄວາມຮັກປອມໆ ທີ່ເຄີຍໄດ້ຮັບເປັນຢາຫຼອກທີ່ຊ່ວຍປິ່ນປົວຄົນເຈັບປ່ວຍທາງໃຈ, ແຕ່ເມື່ອຮູ້ວ່າຢານັ້ນບໍ່ແມ່ນຢາທີ່ຈະຊ່ວຍຮັກສາໄດ້ແທ້ ລາວກໍກັບມາເປັນຄົນເຈັບທີ່ກຳລັງຕ້ອງການການຮັກສາ. ເພງນີ້ສື່ເຖິງຄວາມເຈັບປວດ ແລະ ການສູນເສຍຄວາມຫວັງຂອງຄົນທີ່ເສບຕິດກັບຄວາມຮັກປອມໆ ເຖິງຈະຮູ້ວ່າຄວາມຮັກນັ້ນບໍ່ມີຈິງ, ແຕ່ຄວາມຮູ້ສຶກດີໆທີ່ໄດ້ຮັບຈາກມັນກໍເຮັດໃຫ້ຕິດ.
ສຸດທ້າຍ, ເພງນີ້ຈົບລົງດ້ວຍຄຳຂໍຮ້ອງໃຫ້ຄົນຮັກຊ່ວຍມາຮັກສາດ້ວຍຄວາມຮັກທີ່ແທ້ຈິງ ເພາະມັນຄືທາງດຽວທີ່ຈະຊ່ວຍປິ່ນປົວຫົວໃຈທີ່ກຳລັງຈະແຕກສະຫຼາຍໄດ້.
ຄວາມໝາຍທີ່ສື່ສານອອກມາໃນວິດີໂອເພງ (MV ຫຼື Music Video)
ພາບໃນເອັມວີເພງ (MV ຫຼື Music Video) ທີ່ເຫັນ ແລະ ຮູ້ສຶກໄດ້ແມ່ນການສື່ເຖິງຄວາມງາມທີ່ດຶງດູດ ແຕ່ກໍແຝງໄວ້ດ້ວຍຄວາມຮູ້ສຶກເຫງົາໂດດດ່ຽວ ແລະ ໂຫຍ. ເພງ “ຢາຫຼອກ (PLACEBO)” ໄດ້ເຮັດໃຫ້ເຫັນເຖິງຄວາມງາມໃນຈິນຕະນາການໃນໂລກແຟນຕາຊີ (Fantasy) ທີ່ເລິກລັບ ແລະ ໂຣແມນຕິກ (Romantic).
ໃນສະຖານທີ່ທີ່ ນາງເອກເອັມວີ (Jenny Bella) ໄດ້ນັ່ງຢູ່ໃນສວນທີ່ຕົກແຕ່ງຢ່າງສວຍງາມດ້ວຍທົ່ງດອກໄມ້, ແສງສີມ່ວງອົມຟ້າສ່ອງລົງມາເຮັດໃຫ້ບັນຍາກາດເບິ່ງຄືຢູ່ໃນໂລກແຫ່ງຄວາມຝັນທີ່ມີຄວາມຮູ້ສຶກທີ່ອ່ອນໂຍນ ແລະ ເລິກລັບ.
ອີກພາບມຸມໜຶ່ງໃນສ່ວນພາບຂອງ ພະເອກເອັມວີ ແມ່ນສະແດງໃຫ້ເຫັນເຖິງບັນຍາກາດທີ່ຕ່າງກັນ ໂດຍເນັ້ນໄປທີ່ຄວາມຮູ້ສຶກທີ່ເລິກເຊິ່ງ ແລະ ຈິງຈັງ. ລາວຢືນຢູ່ໃນບ່ອນທີ່ມືດມົວ, ມີແສງສີຟ້າສ່ອງມາຈາກດ້ານຫຼັງ. ພາບນີ້ສະແດງເຖິງຄວາມຮູ້ສຶກທີ່ໜັກໜ່ວງ ແລະ ຕ້ອງການການຄົ້ນຫາ ເຊິ່ງເຂົ້າກັນກັບເນື້ອເພງທີ່ເວົ້າເຖິງຄວາມເຈັບປວດຈາກຄວາມຮັກທີ່ບໍ່ມີຢູ່ຈິງ.
