ໂຫວດໃຫ້ T08 ພອຍ – ເພັດມະນີ ເພັດໄຊຍາ ໄດ້ທີ່ WeVote
ໃນໂຄງການ Oishi Teen Idol The Final Season ທີ່ກຳລັງເປັນທີ່ຈັບຕາຂອງໄວໜຸ່ມຫຼາຍໆຄົນ ມີເດັກສາວຜູ້ຫນຶ່ງທີ່ໂດດເດັ່ນດ້ວຍຄວາມກ້າຫານ ແລະ ຄວາມຕັ້ງໃຈ ລາວຄື ພອຍ – ເພັດມະນີ ເພັດໄຊຍາ ສາວນ້ອຍໄວ 17 ປີ ຜູ້ທີ່ກຳລັງສູ້ເພື່ອຄວາມຝັນຂອງຕົນເອງໃນເວທີແຫ່ງນີ້. ມື້ນີ້ພວກເຮົາຈະມາຮູ້ຈັກກັບລາວໃຫ້ຫຼາຍຂຶ້ນ ຜ່ານບົດສຳພາດທີ່ເຕັມໄປດ້ວຍແຮງບັນດານໃຈນີ້.
ພອຍ ເພັດມະນີ ເປັນນັກຮຽນຢູ່ໂຮງຮຽນ ມສ ວຽງຈັນ ແລະ ໃນປີນີ້ ລາວໄດ້ຕັດສິນໃຈລົງແຂ່ງຂັນໃນໂຄງການ Oishi Teen Idol The Final Season. “ຂ້ອຍຢາກລົງມາຫຼາຍປີແລ້ວ ແຕ່ບໍ່ກ້າ. ເຫັນວ່າປີນີ້ເປັນປີສຸດທ້າຍແລ້ວ ຂ້ອຍຈຶ່ງລອງສ່ຽງເບິ່ງ. ເຖິງຈະໄດ້ ຫຼື ບໍ່ໄດ້ກໍບໍ່ເປັນຫຍັງ” ພອຍກ່າວດ້ວຍຄວາມມຸ່ງຫມັ້ນ. ການຕັດສິນໃຈຄັ້ງນີ້ບໍ່ພຽງແຕ່ເປັນການທ້າທາຍຕົນເອງ ແຕ່ຍັງເປັນການກ້າວຂ້າມຄວາມຢ້ານກົວທີ່ເຄີຍມີມາກ່ອນ.
ເມື່ອຖາມວ່າມີສາມຄຳໃດທີ່ເຫັນວ່າເຂົ້າກັບຕົນເອງ ພອຍຕອບພ້ອມສຽງຫົວວ່າ “ງາມ ສະຕຣອງ (strong) ພ້ອມໃຊ້” ພ້ອມກັບອະທິບາຍຕື່ມວ່າ “ເລືອກສາມຄຳນີ້ກໍຕາມໂຕເລີຍ ຮ່າຮ່າຮ່າ”. ຄຳຕອບນີ້ສະແດງໃຫ້ເຫັນຄວາມທີ່ເປັນຄົນໝັ້ນໃຈ ແລະ ຄວາມເປັນຕົວເອງຂອງລາວ.
ສິ່ງທີ່ເຮັດໃຫ້ພອຍແຕກຕ່າງຈາກຜູ້ເຂົ້າແຂ່ງຂັນຄົນອື່ນໆ ແມ່ນການສະແດງສົດເທິງເວທີ. “ຂ້ອຍຄິດວ່າເປັນການ performance ເທິງເວທີ, ອິນເນີ້ທີ່ສະແດງອອກກັບເພງ ແລະ ການສະແດງຂອງຂ້ອຍ” ລາວກ່າວ. ຄວາມສາມາດໃນການຖ່າຍທອດອາລົມ ແລະ ພະລັງງານຜ່ານການສະແດງຄືຈຸດແຂງທີ່ລາວພູມໃຈ.
ໃນມຸມມອງຂອງ ພອຍ, ໄອດໍ້ທີ່ດີຄວນຈະເປັນ “ຄົນທີ່ເປັນຕົວແບບ, ມຸ່ງຫມັ້ນ, ໃຫ້ຂໍ້ຄິດ ແລະ ສາມາດສ້າງແຮງບັນດານໃຈ”. ລາວຢາກເປັນໄອດໍ້ເພາະ “ເປັນຄົນມັກການເຕັ້ນ, ການຮ້ອງ ແລະ ການສະແດງ ເຊິ່ງໄອດໍ້ຕອບໂຈດໃນສິ່ງນີ້. ລະກໍຫຼາຍຄົນທີ່ຕິດຕາມໄອດໍ້ກໍຈະມັກ ແລະ ໄອດໍ້ກໍເປັນແຮງບັນດານໃຈຂອງເຂົາເຈົ້າ. ຂ້ອຍກໍຢາກເປັນສ່ວນຫນຶ່ງທີ່ເປັນແຮງບັນດານໃຈໃຫ້ຄົນອື່ນ”.
ພອຍ ເປີດເຜີຍວ່າ ເຄີຍຮູ້ສຶກທໍ້ໃຈມາກ່ອນ ແຕ່ນາງບໍ່ເຄີຍຍອມແພ້. “ເມື່ອຍໄດ້ ທໍ້ໄດ້ ແຕ່ຢ່າຢຸດກັບສິ່ງທີ່ເຮົາຝັນ. ປາຍທາງເຮົາມັນຍິ່ງໃຫຍ່ ສິເມື່ອຍສໍ່າໃດເຮົາກໍບໍ່ຖອຍ. ສູ້ຈົນກວ່າຊິໄປຮອດຈຸດທີ່ເຮົາຝັນໄວ້” ນາງກ່າວພ້ອມທັງໃຫ້ຂໍ້ຄິດວ່າ “ໃນມື້ທີ່ທໍ້ແຮງ ໃຫ້ຄິດໄວ້ວ່າປາຍທາງເຮົາຄືສິ່ງທີ່ເຮົາລໍຄອຍມາຕະຫລອດ. ສະນັ້ນຄວາມພະຍາຍາມມັນບໍ່ທຳຮ້າຍໃຜແນ່ນອນ”. ຄຳເວົ້າເຫຼົ່ານີ້ສະທ້ອນໃຫ້ເຫັນຄວາມເຂັ້ມແຂງ ແລະ ຄວາມອົດທົນຂອງລາວໄດ້ເປັນຢ່າງດີ.
ການແຂ່ງຂັນຄັ້ງນີ້ມີຄວາມຫມາຍຫຼາຍຕໍ່ພອຍ. “ມັນເປັນອີກຂັ້ນຫນຶ່ງຂອງຊີວິດໃນການກ້າວຂ້າມໂຕເອງຂຶ້ນມາ ແລະ ເປັນການຮຽນຮູ້ທີ່ຍິ່ງໃຫຍ່ຂອງຂ້ອຍເລີຍ” ລາວກ່າວ. ບໍ່ວ່າຜົນການແຂ່ງຂັນຈະອອກມາເປັນແນວໃດ ປະສົບການໃນເວທີນີ້ກໍໄດ້ກາຍເປັນບົດຮຽນອັນລ້ຳຄ່າສຳລັບລາວແລ້ວ.
ສິລະປິນໃນດວງໃຈຂອງພອຍຄື Taylor Swift. “ລາວມີຄວາມເປັນຕົວແມ່, ເປັນຄົນທີ່ເກັ່ງ, ຫນ້າຊົມເຊີຍ ແລະ ເປັນແຮງບັນດານໃຈຂອງຂ້ອຍເລີຍ” ພອຍກ່າວດ້ວຍຄວາມປະທັບໃຈ. Taylor Swift ໄດ້ກາຍເປັນແບບຢ່າງ ແລະ ເປັນແຮງຂັບເຄື່ອນໃຫ້ລາວກ້າສູ້ຕໍ່ໄປ.
ສຳລັບຄົນທີ່ມີຝັນແຕ່ຍັງບໍ່ກ້າລົງມື ພອຍຝາກຂໍ້ຄິດໄວ້ວ່າ
“ເຮົາຕ້ອງລອງລົງມື ກວ່າຊິໄປຮອດອາດຈະຍາກລຳບາກແຕ່ມັນຄຸ້ມຄ່າແນ່ນອນ. ພູມໃຈໃນໂຕເອງ ເຊື່ອຫມັ້ນໃນໂຕເອງ ແລະກ້າເຮັດໃນສິ່ງທີ່ໂຕເອງຝັນ ຢ່າງມຸ່ງຫມັ້ນ ອົດທົນ. ສິ່ງທີ່ເຮົາພະຍາຍາມເຮັດມັນ ເກີດດອກອອກຜົນແນ່ນອນ”.
ສຸດທ້າຍນີ້ ພອຍຝາກຂໍ້ຄວາມຖິງທຸກຄົນວ່າ “ກາຝາກທຸກຄົນໂຫວດໃຫ້ພອຍ ຄົນລະໂຫວດ ລະກາເປັນແຮງເຊຍແຮງໃຈໃຫ້ພອຍແດ່ເດີ້”. ຖ້າທ່ານຢາກຕິດຕາມ ແລະ ໃຫ້ກຳລັງໃຈລາວ ສາມາດຕິດຕາມໄດ້ທີ່:
ມາຮ່ວມກັນເປັນກຳລັງໃຈໃຫ້ພອຍ ແລະ ຜູ້ເຂົ້າແຂ່ງຂັນທັງ 24 ຄົນໃນ Oishi Teen Idol The Final Season ເພື່ອກ້າວໄປສູ່ຄວາມຝັນຂອງເຂົາເຈົ້ານຳກັນເລີຍ!
