ໂອໄມ້ດີ, ເນດດາວ ແລະ ນັກສ້າງເນື້ອຫາລາວ ຈັດກິດຈະກຳລະດົມທຶນສ້າງອາຄານຮຽນຢູ່ທີ່ ແຂວງຄຳມ່ວນ
ເພາະການສຶກສາຄືຮາກຖານທີ່ສຳຄັນທີ່ສຸດ, ໂຄງການ “ເພື່ອໃຫ້ນ້ອງອິ່ມໃຈ” ຈຶ່ງໄດ້ກຳເນີດຂຶ້ນຈາກການຮວມຕົວກັນຂອງກຸ່ມນັກສ້າງເນື້ອຫາໃນລາວ ເພື່ອສົ່ງຕໍ່ຄວາມຊ່ວຍເຫຼືອໄປຍັງ ບ້ານຫາດທະນາ, ເມືອງບົວລະພາ, ແຂວງຄຳມ່ວນ.
ໂຄງການຊ່ວຍເຫຼືອ “ເພື່ອໃຫ້ນ້ອງອິ່ມໃຈ” ສ້າງຈາກກຸ່ມນັກສ້າງເນື້ອຫາໃນລາວທີ່ຮວມໂຕກັນລະດົມທຶນເພື່ອສ້າງອາຄານຮຽນ, ຊື້ອຸປະກອນການຮຽນ, ອຸປະກອນກີລາ ແລະ ເສື້ອກັນໜາວ.
ໂຄງການ ເພື່ອໃຫ້ນ້ອງອິ່ມໃຈ ກໍຈັດເປັນປີທີ 3 ແລ້ວ ແລະ ໃນປີນີ້ແມ່ນນຳໂດຍ ນັກສ້າງເນື້ອຫາຈາກເຟສບຸກເພຈ Omaidy, Nethdao Channel, ນັກສຳຫຼວດ, Alaotheworld, Makame-ມາກະເມ ແລະ ອີກຫຼາກຫຼາຍຄົນທີ່ໄດ້ໃຫ້ການຊ່ວຍເຫຼືອ.
ນອກຈາກນີ້, ພວກເຂົາຍັງໄດ້ຊ່ວຍກັນອອກແບບເສື້ອຂາຍ ເພື່ອໄວ້ແລກປ່ຽນນ້ຳໃຈຈາກທຸກຄົນ ແລະ ນຳໄປຊື້ສິ່ງຈຳເປັນໃຫ້ນ້ອງໆໄດ້ໃຊ້ໄວ້ເພື່ອສຶກສາ.
ເປັນສິ່ງທີ່ເຮັດໃຫ້ໃຜຫຼາຍຄົນຕ້ອງຮູ້ສຶກປະທັບໃຈ ເພາະອາຄານຮຽນນັ້ນແມ່ນເຮັດດ້ວຍໄມ້ ແລະ ເກົ່າຫຼາຍແລ້ວ ເຊິ່ງມັນກໍໄດ້ເປເພໄປຕາມການເວລາ. ຄົນທີ່ໄດ້ຮ່ວມໃນໂຄງການນີ້, ພວກເຂົາຖືວ່າໄດ້ມອບຮອຍຍິ້ມໃຫ້ກັບນ້ອງໆ ແລະ ສ້າງຄວາມພ້ອມໃຫ້ກັບເຍົາວະຊົນລາວທີ່ຢູ່ເຂດຫ່າງໄກໄດ້ຮັບໂອກາດດີໆໃນດ້ານການສຶກສາ.