ມື້ນີ້ ກັອດຈິ ພາມາຮູ້ຈັກກັບ AI ຕົວໃໝ່ກັນ ແລະ AI ໂຕນີ້ຖືກສ້າງມາຈາກຄ້າຍທີ່ມີຫຼາກຫຼາຍແພລດຟອມດັງຢ່າງ META AI ທີ່ມາໃນຮູບແບບ CHATBOT ໄດ້ເປີດໂຕໃຫ້ໄດ້ນຳໃຊ້ໃນແພລດຟອມຢ່າງ Facebook, Messenger, Instagram ແລະ WhatsApp.
ຫຼັງຈາກການເປີດໂຕຢ່າງເປັນທາງການຂອງ Meta AI ມາແລ້ວນັ້ນ ພວກເຮົາມາຮູ້ຈັກກັນໃຫ້ຫຼາຍຂຶ້ນວ່າມັນແມ່ນຫຍັງ ແລະ ໃຊ້ງານແນວໃດ?
- ມັນເປັນລະບົບ AI ທີ່ທາງບໍລິສັດ Meta ໄດ້ໃຊ້ເງິນລົງທຶນຈຳນວນຫຼາຍ, ເພື່ອພັດທະນາລະບົບປັນຍາປະດິດເປັນຂອງຕົນເອງ ໂດຍໃນເວີຊັນຫຼ້າສຸດນີ້ໄດ້ໃຊ້ໂມເດລທີ່ມີຊື່ວ່າ Llama 3 ແລະ ເຄີຍມີຂ່າວອອກມາໃນຕອນຕົ້ນປີນີ້ວ່າ Meta ໄດ້ໃຊ້ໂຄງສ້າງພື້ນຖານຄອມພິວເຕີຂະໜາດໃຫຍ່ທີ່ມີ GPU NVIDIA ປະມານແສນໜ່ວຍ ເຊິ່ງໃຫ້ມາຊ່ວຍໃນການຄຳນວນລະບົບ ໂດຍມີເປົ້າໝາຍຫຼັກແມ່ນເພື່ອສ້າງປັນຍາປະດິດທີ່ສາມາດເຂົ້າໃຈເຮົາໄດ້ຄືມະນຸດ.
- ເປັນຜູ້ຊ່ວຍເຮົາໄດ້ໃນຮູບແບບ CHATBOT ໂດຍໃຊ້ລັກສະນະຄ້າຍຄືກັນກັບ ChatGPT, Gemini ທີ່ສາມາດຊ່ວຍຫາຂໍ້ມູນ, ສະຫຼຸບຂໍ້ມູນ ແລະ ຄິດໄອເດຍລວມເຖິງການສ້າງຮູບພາບຜ່ານຄຳສັ່ງ. ເຮົາສາມາດໃຊ້ງານ Meta AI ໄດ້ໂດຍເບິ່ງທີ່ຊ່ອງທາງການຄົ້ນຫາໃນໜ້າຫ້ອງແຊັດ ແລະ ຍັງສາມາດໃຊ້ໃນກຸ່ມແຊັດຂອງ Messenger ໂດຍການ @META AI ຕາມດ້ວຍສິ່ງທີ່ເຮົາຢາກຮູ້, ໃຊ້ໄດ້ຟຣີໃນຫຼາຍໆປະເທດ ເລີ່ມຕົ້ນຈາກອາເມລິກາ ແລະ ຂະຫຍາຍໄປສູ່ອີກຫຼາຍປະເທດຄາດວ່າຈະຖືກນຳໃຊ້ໃນລາວໃນໄວໆນີ້.
ພວກເຮົາມາຕິດຕາມກັນຕໍ່ໄປວ່າ Meta AI ຈະສາມາດພັດທະນາລະບົບ ເພື່ອມາແຂ່ງຂັນກັບ ChatGPT ຂອງ OpenAI ຫຼື Gemini ຂອງ Google ໄດ້ ຫຼື ບໍ? ການມາຂອງ Meta AI ແມ່ນຖືໄດ້ວ່າເປັນກ້າວສຳຄັນໃນວົງການ AI ທີ່ຫຼາຍຄົນໃຫ້ຄວາມສົນໃຈຫຼາຍ.
ທຸກຄົນຄິດວ່າການເປີດໂຕໃຫ້ໃຊ້ງານຂອງ META AI ໃນຄັ້ງນີ້ມັນຈະສະດວກວ່ອງໄວ ແລະ ໃຫ້ຂໍ້ມູນທີ່ຕອບໂຈດຂອງທຸກຄົນ ຫຼື ບໍ່?
