ຮູ້ຈັກ ນິກກີ້ – ຂັນພະສິດ ຄ້າຍພົມ ນາງສາວລາວ 2024 ຈາກນະຄອນຫຼວງວຽງຈັນ
ຮູ້ຈັກ ນິກກີ້ – ຂັນພະສິດ ຄ້າຍພົມ ນາງສາວລາວຄົນຫຼ້າສຸດຈາກນະຄອນຫຼວງວຽງຈັນ ສາວທະນາຄານໄວ 25 ດີກຣີຈົບອັກສອນສາດພາສາຈີນ ຈາກ ສປ ຈີນ
ຈົບກັນໄປເປັນທີ່ຮຽບຮ້ອຍແລ້ວສຳລັບການປະກວດນາງສາວລາວ 2024 ເຊິ່ງຜົນອອກມາກໍຄື ສາວງາມຈາກນະຄອນຫຼວງວຽງຈັນ ນິກກີ້ – ຂັນພະສິດ ຄ້າຍພົມ ML22 ເປັນຜູ້ທີ່ໄດ້ຮັບຕຳແໜ່ງນາງສາວລາວ 2024 ໄປຄອງ. ນັບຕັ້ງແຕ່ນີ້ໜຶ່ງປີ ນິກກີ້ ຈະຮັບພາລະບົດບາດໃນການເຄື່ອນໄຫວໃນຖານະເປັນນາງສາວລາວຄົນໃໝ່ ຕໍ່ຈາກ ດາວພະຫັດ ແກ້ວສຳພັນ ຜູ້ເຊິ່ງດຳລົງຕຳແໜ່ງນາງສາວລາວ 2023.
ນິກກີ້ ປັດຈຸບັນອາຍຸ 25 ປີ ເປັນຜູ້ເຂົ້າປະກວດໝາຍເລກໝາຍເລກ ML22 ຕົວແທນຈາກ ນະຄອນຫຼວງວຽງຈັນ. ລາວຈົບການສຶກສາປະລິນຍາຕີຈາກ ສປ ຈີນ ສາຂາອັກສອນສາດພາສາຈີນ. ປັດຈຸບັນ ນິກກີ້ ເຮັດວຽກຢູ່ ທະນາຄານຮ່ວມພັດທະນາ (JDB) ແລະ ກໍາລັງສຶກສາຕໍ່ ປະລິນຍາໂທ ຢູ່ທີ ສະຖາບັນທະນາຄານ.
ນິກກີ້ ກ່າວກັບທີມງານມ່ວນວ່າ ຄວາມໄຝ່ຝັນທີ່ຍິ່ງໃຫຍ່ທີ່ສຸດຂອງຕົນເອງແມ່ນ ການໃຫ້ພະລັງບວກ ແລະ ໂອກາດຂອງຕົນເອງເພື່ອສ້າງແຮງບັນດານໃຈ ພ້ອມທັງເປັນປະໂຫຍດຕໍ່ສັງຄົມ ໂດຍສະເພາະທາງດ້ານສົ່ງເສີມການສຶກສາ , ການພັດທະນາຊີວິດ ແລະ ເສດຖະກິດ ຢາກເຫັນຜູ້ຍິງລາວທຸກຄົນເຊື່ອໝັ້ນໃນຄວາມສາມາດຂອງຄົນເອງທຸກຄົນເຊື່ອໝັ້ນໃນຄວາມສາມາດຂອງຕົນເອງ ແລະ ກ້າທີຈະຂ້າມຜ່ານຂໍ້ຈໍາກັດຕ່າງໆເພື່ອພັດທະນາຕົນເອງ ແລະ ຊ່ວຍເຫຼືອສັງຄົມ.
ເຫດຜົນທີ່ ນິກກີ້ ຕັດສິນໃຈເຂົ້າປະກວດນາງສາວລາວໃນປີນີ້ກໍຍ້ອນວ່າ ນີ້ເປັນໂອກາດໃນການສ້າງຊື່ສຽງ, ການພັດທະນາຕົນເອງ, ແຮງບັນດານໃຈໃນການເຮັດປະໂຫຍດຕໍ່ສັງຄົມ, ຄວາມຝັນ ແລະ ເປົ້າໝາຍສ່ວນຕົວ ພ້ອມນັ້ນກໍຍັງເປັນຄວາມມັກຮັກໃນວັດທະນະທໍາການປະກວດນາງສາວລາວ.
“ແມ່ຍິງລາວມີຄວາມງາມໃນແບບຂອງຕົນເອງ ມີທັງຄວາມງາມພາຍໃນ ແລະ ພາຍນອກທີ່ສະທ້ອນເປັນເອກະລັກຂອງຊາດ ຄວາມງາມພາຍໃນທີ່ມາຈາກຈິດໃຈທີດີ ຄວາມໝັ້ນໃຈໃນຕົນເອງ ແລະ ການເຮັດໜ້າທີ່ເພື່ອສັງຄົມ. ຄວາມງານແບບນີ້ຄືສິ່ງທີ່ແທ້ຈິງ ແລະ ໝັ້ນຄົງ,” ນິກກີ້ ກ່າວ.
ໂດຍ: ທີມບັນນາທິການ Muan