|
Getting your Trinity Audio player ready...
|
ເມື່ອຄວາມຮັກຕ້ອງມາເຖິງທາງແຍກ, ບາງຄຳຕອບກໍອາດຈະບໍ່ເຄີຍມີໃນໂລກນີ້, ໄດ້ແຕ່ຍອມຮັບວ່າ “ອາດເປັນເພາະເຮົາຍັງໄຮ້ດຽງສາ” ຫຼືນີ້ເປັນສິ່ງທີ່ ຕານຸ ວັນນະສິນ ຕ້ອງການບອກຜ່ານບົດເພງ “ຄຳຕອບ | Naive”
ຫຼັງຈາກທີ່ຜ່ານໄປ 2 ເດືອນ ກໍບໍ່ໃຫ້ແຟນໆຕ້ອງໄດ້ຖ້າດົນ ຕານຸ ວັນນະສິນ ກໍໄດ້ປ່ອຍອີກໜຶ່ງບົດເພງໃນ Ep Album: The Rhythmarries ອາລະບ້ຳທີ່ຈະເລົ່າເລື່ອງຈັງຫວະຂອງຊີວິດເພື່ອນຳພາທຸກຄົນໄປຮຽນຮູ້ ເຕີບໂຕ ແລະ ເຂົ້າຄວາມຮັກໃຫ້ຫຼາຍຂຶ້ນ ແລະ ບົດເພງ “ຄຳຕອບ | Naive” ກໍເປັນອີກເພງທີ່ປ່ອຍອອກມາໃນອາລະບ້ຳນີ້ ເພື່ອຕອກຍ້ຳຄວາມບໍ່ເຂົ້າໃຈໃນຄວາມຮັກ, ຄວາມໄຮ້ດຽງສາໃນຄວາມສຳພັນ ແລະ ການຍອມຮັບສິ່ງເຫຼົ່ານີ້ເພື່ອທີ່ຈະກ້າວໄປຕໍ່.
ບົດເພງ “ຄຳຕອບ | Naive” ໃຫ້ຄວາມຮູ້ສຶກແນວເພງ Pop-Rock/Acoustic ທີ່ຟັງງ່າຍ ແຕ່ເຕັມໄປດ້ວຍອາລົມເລິກເຊິ່ງ, ໃຫ້ຄວາມຮູ້ສຶກເໝືອນກຳລັງນັ່ງຟັງຄົນເລົ່າເລື່ອງຄວາມຮັກທີ່ສັບສົນ ເໝືອນກຳລັງຟັງການເລົ່າເລື່ອງຜ່ານບົດກະວີທີ່ສະທ້ອນເຖິງຄວາມໄຮ້ດຽງສາຂອງຄົນໃນຄວາມສຳພັນ. ບົດເພງເລົ່າກ່ຽວກັບຄວາມສັບສົນໃນຄວາມສຳພັນກັບສິ່ງທີ່ບໍ່ເຂົ້າໃຈເຊັ່ນ ມັນເກີດຫຍັງຂຶ້ນ? ເປັນຫຍັງເຮົາຈຶ່ງເລີກກັນ? ເຮົາບໍ່ດີບ່ອນໃດ? ແລະ ອີກຫຼາຍໆຄຳຖາມທີ່ບໍ່ມີຄຳຕອບໃນຄວາມສຳພັນນີ້ ຄືກັບທ່ອນຂອງເພງທີ່ບອກວ່າ
ຄືໜັງສືທີອ່ານຈົນຈົບແຕ່ກໍບໍ່ເຄີຍເຂົ້າໃຈ ດັ່ງບົດຮູບເງົາທີ່ເຈົ້ານັ້ນຂຽນເອົາໄວ້ ໃຫ້ຂ້ອຍເປັນຄົນສະເເດງ, ການເວລາ ຫຼື ໃຈຂອງຄົນທີ່ມັນປ່ຽນແປງ ບໍ່ເຂົ້າໃຈ?
ແຕ່ແທນທີ່ຈະຈົມຢູ່ກັບຄວາມເຈັບປວດ, ບົດເພງກັບພາເຮົາທຳຄວາມເຂົ້າໃຈ ແລະ ຍອມຮັບສິ່ງເກີດຂຶ້ນໃນຄວາມສຳພັນນີ້ ເພື່ອເຕີບໂຕ ແລະ ຮຽນຮູ້ ພ້ອມຍັງພະຍາຍາມຕອບຄຳຖາມໂຕເອງ “ອາດເປັນພຽງຍ້ອນເຮົາຍັງ ໄຮ້ດຽງສາ”, ຍັງບໍ່ໃຫຍ່ພໍທີ່ຈະເຂົ້າໃຈຄວາມໝາຍຂອງຊີວິດ ແລະ ຄວາມຮັກໃນຕອນນີ້.
ຈາກກັນວັນນີ້ເພື່ອຈະໄດ້ເຕີບໂຕ ແລະ ຮຽນຮູ້ກັນຕໍ່ໄປ” “ຝາກເພງນີ້ໄວ້ແທນຄໍາລໍ້າລາ ເມື່ອຫັນກັບມາ…ເຮົາຄົງເຂົ້າໃຈ
ມັນຄືການຍອມຮັບວ່າຄວາມຮັກເຮັດໃຫ້ເຮົາຜູກພັນ, ແຕ່ເຮົາບໍ່ເຄີຍຮຽນຮູ້ຈາກມັນ ຈົນສຸດທ້າຍກໍຕ້ອງເຈັບປວດ. ແຕ່ຄວາມເຈັບປວດນີ້ຄືຄຳຕອບຂອງການເຕີບໃຫຍ່, ເປັນການຈາກລາທີ່ຍັງຄົງໂອບກອດທຸກຄວາມຝັນຂອງເຮົາໄວ້ ແລະ ຫວັງວ່າເມື່ອເວລາຜ່ານໄປ ເຮົາຈະພົບກັນໃໝ່ ໃນມື້ທີ່ເຂົ້າໃຈທຸກຢ່າງຫຼາຍຂຶ້ນ.
ຖ້າໃຜເຄີຍຜ່ານຊ່ວງເວລາຂອງການບອກລາ ແລະ ຈົມປັກຢູ່ກັບການຄຳຕອບຂອງຄຳຖາມໃນຄວາມສຳພັນທີ່ຜ່ານ ລອງເປີດໃຈຟັງ “ຄຳຕອບ | Naive” ເບິ່ງເດີ້ ເພາະບາງເທື່ອເຮົາອາດຈະໄດ້ຄຳຕອບທີ່ເຮົາກຳລັງຕາມຫາຢູ່ກໍໄດ້ ເພາະວ່າ ບາງຄຳຖາມໃນຄວາມສຳພັນ ມັນບໍ່ໄດ້ມີຄຳຕອບໃຫ້ເຮົາໄດ້ເຂົ້າໃຈໃນທັນທີ..
ມາຮຽນຮູ້ຈາກຄວາມໄຮ້ດຽງສາໃນຄວາມຮັກໄປນຳກັນໄດ້ທີ່ທຸກຊ່ອງທາງສະຕຣີມມິ່ງຂອງ Tanu Vannasin
