ວາເລນທາຍນີ້ ຢ່າໃຫ້ດອກກຸຫຼາບບັງຕາ! ເຊັກດ່ວນວ່າຄົນທີ່ເຈົ້າລົມຢູ່ ຄືຄົນທີ່ ໃສ່ໃຈ ຫຼື ໃສ່ໜ້າກາກ
ຂອງຂວັນສຸດພິເສດໃນວັນວາເລນທາຍ ຄົງຈະໜີບໍ່ພົ້ນດອກກຸຫຼາບແທນໃຈ ແລະ ຂໍ້ຄວາມບອກຮັກຈົນເຮັດໃຫ້ຊຶ້ງກິນໃຈ, ການສະແດງອອກເຫຼົ່ານີ້ບໍ່ແມ່ນເລື່ອງແປກເລີຍ ເພາະຖ້າຮັກກັນກໍຕ້ອງບອກກັນໃຫ້ຮູ້ໄປໂລດແຫຼະ. ແຕ່ຄົນຫາກໍລົມກັນບໍ່ຮອດອາທິດນີ້ລະເປັນຕາຢ້ານກວ່າ ເພາະມັນອາດຈະເປັນການສົ່ງສັນຍານຂອງພວກ “ທຸງແດງ (Red flag)” ທີ່ກຳລັງເຮັດພຶດຕິກຳ “Love Bombing” ທີ່ເບີ່ງຄືວ່າໃສ່ໃຈ, ຮັກເຮົາ-ຫຼົງເຮົາ ທີ່ແທ້ກໍ… ໃສ່ໜ້າກາກ.
ສ່ອງພຶດຕິກຳ Love Bombing ຈາກພວກ Red Flag
ເປີດຫົວຂໍ້ມາແບບຮຸນແຮງກະແທກໃຈກັນໃນວັນແຫ່ງຄວາມຮັກເລີຍທຸກຄົນ ກັບພຶດຕິກຳທີ່ຄວນລະວັງຂອງຄົນທີ່ເຮົາກຳລັງລົມຢູ່ວ່າແມ່ນຄົນປະເພດ Red flag ທີ່ມັກໃຊ້ການ Love Bombing ເພື່ອຫຼອກໃຫ້ເຮົາຕາຍໃຈຈົນຫຼົງເຊື່ອໃຫ້ໄປໝົດທັງໃຈຫຼືບໍ່? ໃນຄວາມຮັກ-ຄວາມສຳພັນ ຫຼາຍຄູ່ ກໍຈະມີການສະແດງອອກແຕກຕ່າງກັນໄປໃນຊ່ວງເວລາທີ່ໄດ້ຢູ່ດ້ວຍກັນ ຫຼື ຕອນເລີ່ມຕົ້ນຈີບກັນ.
ຖ້າໄປກັນໄດ້ດີຄວາມສຳພັນກໍສາມາດເດີນຕໍ່ໄປຢ່າງສວຍງາມ ແຕ່ບາງຄັ້ງເຮົາອາດຈະສັງເກດເຫັນຄວາມຜິດປົກກະຕິບາງຢ່າງ ຫຼື ສັນຍານແປກໆຈາກບາງຄົນທີ່ກຳລັງສຶກສາໃຈຈົນຕ້ອງຮ້ອງ “ເອົ້າ! ບໍ່ເຄີຍເຈິແບບນີ້ມາກ່ອນ” ເພາະລາວນັ້ນທຸ່ມເທເລື່ອງຄວາມຮັກຫຼາຍເກີນໄປທັງໆທີ່ຫາກໍເລີ່ມລົມ ຈົນຕ້ອງກັບມາຄິດວ່າຮັກຄັ້ງນີ້ຈະດີ ຫຼື ຮ້າຍກັນແທ້ລະ.
ປະເດັນສຳຄັນທີ່ Muan RelationTips ຈະມາຊວນທຸກຄົນສັງເກດກໍຄືພຶດຕິກຳຂອງຄົນລົມເຮົານັ້ນເອງ ຖ້າຢາກຮູ້ວ່າເຂົາກຳລັງ Love Bombing ກໍມາ Checklist ກັນເລີຍ.
Checklist Love Bombing
- ເວົ້າວ່າ “ເຈົ້າແມ່ນຄົນພິເສດທີ່ສຸດ ຫຼື ຂາດເຈົ້າບໍ່ໄດ້” ທັງໆທີ່ຮູ້ຈັກກັນໄດ້ບໍ່ດົນ.
- ຫາກໍລົມກັນ ແຕ່ເວົ້າເຖິງອະນາຄົດຢ່າງຈິງຈັງ.
- ສົ່ງຂໍ້ຄວາມ / ໂທ ຕະຫຼອດທັງມື້ (ຕອບຊ້າ ຫຼື ບໍ່ຮັບສາຍ → ຄຽດ-ນ້ອຍໃຈ ເຮັດໃຫ້ເຮົາຮູ້ສຶກຜິດ).
- ເອົາໃຈໃສ່ເກີນຂອບເຂດຂອງສະຖານະຄົນລົມ.
- ຮີບຜູກມັດເປັນແຟນ ຫຼື ໃຫ້ຄໍາສັນຍາແບບໃຫຍ່ໆໄວ້ກ່ອນ.
- ຢາກຮູ້ວ່າເຮົາຢູ່ໃສ ຫຼື ຢູ່ກັບໃຜຕະຫຼອດເວລາ.
- ສະແດງຄວາມຮັກແບບໄຟແຮງ ທຸກຢ່າງເກີດຂຶ້ນແບບໄວເກີນໄປ.
ພໍເລົ່າມາຮອດຈຸດນີ້, ກໍຄົງຮູ້ສຶກວ່າ “ເອະ! ມັນຈະຮັກຫຍັງກັນຂະໜາດນັ້ນ” ທຸກຄົນຄິດຄືກັນແມ່ນບໍ່ວ່າ ມັນໄວ-ມັນລົ້ນເກີນໄປ, ຢາກບອກວ່າຖ້າໃຜກຳລັງເຈິແບບນີ້ ແມ່ນໃຫ້ຮີບໜີໄປເລີຍ! Love Bombing ແມ່ນພຶດຕິກຳທີ່ບາງຄົນມັກໃຊ້ເຮັດໃຫ້ເຮົາຫຼົງເຊື່ອ ສິ່ງທີ່ແຝງມາຫຼັງຈາກນີ້ກໍຄືຄວາມ Red flag ທີ່ຈະເຮັດໃຫ້ເຮົາເຈັບປວດໃຈ.
ຄົນທີ່ມີພຶດຕິກຳ Love Bombing ກໍປຽບເໝືອນລະເບີດເວລາ ໃນຕອນທຳອິດຈະເຮັດໃຫ້ເຮົາຮູ້ສຶກຫຼົງຮັກ, ຜູກພັນ ແລະ ຜູກມັດ, ເຮັດໃຫ້ເຮົາຕ້ອງເພິ່ງພາອາໄສແຕ່ເຂົາສະເໝີ. ຫຼັງຈາກນັ້ນກໍຈະເຂົ້າມາຄວບຄຸມ (Manipulation) ເຮົາຢ່າງແນບນຽນຈົນເຮົາສູນເສຍໂຕຕົນໄປ ແລະ ບາງຄັ້ງກໍມັກທີ່ຈະໂທດເຮົາ ເພື່ອເຮັດໃຫ້ເຮົາຮູ້ສຶກຜິດ (Gaslighting) ແລະ ຫຼິ້ນກັບອາລົມຄວາມຮູ້ສຶກເຮັດຄືເຮົາບໍ່ມີຄ່າ.