|
Getting your Trinity Audio player ready...
|
ເມືອງຫຼວງພະບາງທີ່ໃຜໆກໍຕ້ອງຫຼົງໃຫຼໃນສະເໜ່ ແລະ ມັນໄດ້ລວມເຖິງໜຸ່ມຫຼໍ່ສຽງຫວານຄົນນີ້ Mor Bigc ຫຼື ໝໍບິກ ສິລະປິນຈາກ NewWave Music.
MOR BIG-C ເຄີຍໄດ້ປ່ອຍຜົນງານເພງທຳອິດໃຫ້ໄດ້ຟັງກັນນັ້ນກໍຄື ເພງ ໂຄວິດນາຍທີນ ໃນປີ 2021 ຫຼັງຈາກນັ້ນກໍ່ໄດ້ຫ່າງຫາຍໄປດົນເກືອບ 3 ປີ, ປັດຈຸບັນກໍໄດ້ກັບມາພ້ອມກັບຜົນງານເພງໃໝ່ “ຫຼົງຮັກສາວຫຼວງພະບາງ” ທີ່ລາວນັ້ນໄດ້ແຕ່ງໃຫ້ຜູ້ຍິງຄົນໜຶ່ງຢູ່ຫຼວງພະບາງ ແລະ ຢາກສົ່ງຕໍ່ຄວາມຮູ້ສຶກຜ່ານບົດເພງນີ້ໃຫ້ທຸກຄົນໄດ້ຟັງ, ເຊິ່ງສາວຄົນນັ້ນແມ່ນໃຜແອັດກໍ່ຍັງບໍ່ທັນຮູ້ເພາະເຈົ້າໂຕຍັງບໍ່ໄດ້ບອກເທື່ອເດີ
.
ເອັມວີກໍ່ໄດ້ເປີດມາດ້ວຍສຽງເພງລາວເດີມຄື ຂັບທຸ້ມຫຼວງພະບາງ ທີ່ຟັງແລ້ວກໍເຮັດໃຫ້ນຶກເຖິງຄວາມງາມອ່ອນຊ້ອຍຂອງເມືອງມໍລະດົກໂລກໄດ້ເປັນຢ່າງດີ, ທັງບ້ານເມືອງ ແລະ ຄວາມໜ້າຮັກມີສະເໜ່ຂອງຊາວເມືອງຫຼວງພະບາງນັ້ນ.
ເພງນີ້ໄດ້ເລົ່າເຖິງຄວາມງາມໜ້າຮັກຂອງສາວຫຼວງພະບາງທີ່ໃຜເຫັນກໍຕົກຂຸມຮັກໄດ້ງ່າຍໆ, ດົນຕີໃນເພງກໍ່ໄດ້ມີການປະສົມປະສານດົນຕີລາວເຂົ້າກັບດົນຕີສະໄໝໃໝ່ທີ່ຟັງແລ້ວທັງອົບອຸ່ນ ແລະ ສະບາຍຫູ.
“ໂອ້ ຜູ້ສາວຫຼວງພະບາງຄືເປັນຕາແພງແທ້ນໍ ນ້ອງນັ້ນທັງແກ້ມແດງ ບໍ່ແມ່ນມີແຟນແລ້ວບໍ?”
ເນື້ອເພງກໍ່ໄດ້ມີການຢອກໄຍເກາະກ້ຽວຊວນຟ້ອນລຳຟັງເພງ ຂັບທຸ້ມຫຼວງພະບາງ. ຟັງແລ້ວແມ່ນເປັນເພງທີ່ໜ້າຮັກອີຫຼີ່ ເພາະນີ້ແມ່ນເພງຈີບກັນຄັກໆ. ແອັດຢາກແນະນຳໃຫ້ຟັງເລີຍ, ພໍໄດ້ຍິນສຽງຫວານໆ ແລະ ເນື້ອຮ້ອງຊວນໃຈສັ່ນກໍເຮັດໃຫ້ແອັດອົດທີ່ຈະຮູ້ສຶກຫວັ່ນໄຫວ ແລະ ເຂີນແທນບໍ່ໄດ້ເລີຍ, ຂະໜາດບໍ່ແມ່ນສາວເມືອງຫຼວງໃດນິ.
ໂດຍ: ທີມບັນນາທິການ Muan
