ຈາກຜູ້ຟັງສູ່ຜູ້ຫຼິ້ນ ລົມນຳ Kino ມືເບສຜູ້ທີ່ເຊື່ອວ່າດົນຕີຄືເສັ້ນທາງທີ່ຊີວິດເລືອກ

ໃນໂລກຂອງສຽງເພງທີ່ບໍ່ແມ່ນທຸກຄົນຈະເລີ່ມຕົ້ນຈາກຫ້ອງຮຽນດົນຕີ ຫຼື ຄ້າຍເພງໃຫຍ່ ບາງຄົນພຽງເລີ່ມຈາກ ການມັກຟັງເພງໃນຫ້ອງນອນ ແລ້ວຖ້າຫາກມື້ໜຶ່ງກໍເລີ່ມຄິດວ່າ “ຖ້າເຮົາໄດ້ເປັນຄົນຫຼິ້ນເອງເດະ?”

ຖ້າເຮົາເຄີຍຜ່ານກາຍຮ້ານອາຫານໃນວຽງຈັນຊ່ວງຄໍ່າໆ, ເຈົ້າອາດຈະເຄີຍເຫັນຜູ້ຊາຍຄົນໜຶ່ງພາຍກີຕ້າເບສຄູ່ໃຈຫຼິ້ນຢູ່ມຸມເວທີສຽງຕ່ຳໆໜັກໆ ແຕ່ເມື່ອຟັງດີໆ ຈະຮູ້ວ່າມັນເປັນອີ່ຫຍັງທີ່ໂຄດເທ້ ເໝືອນກັບ ສຸກປະເສີດ ເສົາວົງໄຊ ຫຼື ກິໂນ່ (Kino) ປັດຈຸບັນເປັນນັກດົນຕີອິດສະລະ ຜູ້ທີ່ໃຊ້ສຽງດົນຕີເປັນຫຼາຍກວ່າອາຊີບ ແຕ່ມັນຄືຊີວິດ.

ຈາກຜູ້ຟັງສູ່ມືເບສອາຊີບ

Kino ບໍ່ເຄີຍເຂົ້າຮຽນດົນຕີຢ່າງຈິງຈັງຊີວິດດົນຕີລາວເລີ່ມຈາກສູນຄືກັບຄົນທົ່ວໄປໂດຍເລີ່ມຈາກການມັກຟັງເພງເປັນຊີວິດຈິດໃຈ ແຕ່ສິ່ງທີ່ເຮັດໃຫ້ລາວແຕກຕ່າງຄື: ຄວາມຮູ້ສຶກທີ່ມີຕໍ່ສຽງເບສ, ສຽງຕໍ່າໆ ໜັກໆທີ່ຄອຍຊັບພອດໃຫ້ເພງມັນກົມກ່ອມ ເໝືອນຜົງຊູລົດທີ່ໃຫ້ເພງຂອງວົງມີລົດຊາດມີຊີວິດຊີວານັ້ນຄືສິ່ງທີ່ ກິໂນ່ ຫຼົງໃຫຼໃນເຄືອງດົນຕີໂທນທຸ້ມທີ່ມີຊື່ວ່າກີຕ້າເບສ.

ກິໂນ່ ເລີ່ມຕົ້ນຈາກການຕັ້ງວົງດົນຕີນ້ອຍໆກັບໝູ່ແລ້ວໄປປະກວດງານແຂງຂັນດົນຕີຕາມແຕ່ລະສະຖານທີ່ນອກນັ້ນຍັງໄດ້ມີວົງເປັນຂອງໂຕເອງເຊິ່ງຖືວ່າເປັນວົງທີ່ເປັນກະແສໃນຊ່ວງໜຶ່ງນັ້ນຄືວົງ: Flowerboi ກັບເພງ Blinded Love

ເສັ້ນທາງສູ່ການເປັນນັກດົນຕີ

“ເອົາຕົງໆແມ່ນເຮົາເປັນຄົນເຮັດຫຍັງບໍ່ເປັນເລີຍ,” ກິໂນ່ ກ່າວ.

ລາວບອກວ່າ ມີແຕ່ທາງນີ້ທາງດຽວທີ່ມັນພໍຈະເປັນໄປໄດ້ ແລະ ເປັນສິ່ງດຽວທີ່ພໍຈະເຮັດໄດ້ດີ. ສຳລັບເປົ້າໝາຍໃນຊີວິດ ລາວບອກວ່າພຽງຢາກຫຼິ້ນດົນຕີໄປເລື້ອຍໆ  ແລະ ຫວັງວ່າມັນຈະພາລາວໄປຈົນເຖິງທີ່ສຸດເທົ່າທີ່ຈະສາມາດຊຸກຍູ້ໂຕເອງໄປໄດ້.

ເສັ້ນທາງຂອງຄົນບໍ່ຍອມຖອຍ

ຕະຫຼອດຫຼາຍປີທີ່ຜ່ານມາ ກິໂນ່ ໄດ້ລອງຜິດລອງຖືກຫຼາຍຢ່າງເພື່ອຕາມຫາປະສົບການໃຫ້ຕົວເອງພ້ອມພັດທະນາສີມືເບສເຊິ່ງ passion ທີ່ສະສົມມາບໍ່ກໍເຄີຍຫັກລັງລາວເລີຍແຖມມັນໄດ້ມອບໂອກາດທີ່ສະຫວ່າງໃຫ້ເຊິ່ງໄດ້ຮ່ວມເຮັດວຽກ ແລະ ຄໍແລັບກັບສິລະປິນລາວດັງໆຫຼາຍຄົນ ບໍ່ວ່າຈະເປັນ ຮັກແພງ JUST” , Imel , Ford Phithaksin , Gomen , HUENCREW ແລະ ອີກໜຶ່ງຈຸດສຳຄັນຂອງຊີວິດດົນຕີຂອງລາວຄື ການໄດ້ເປັນມືເບສໃຫ້ຮຸ່ນອ້າຍສຸດຮັກແພງ ເຊັ່ນ: TANU VANNASIN ສິລະປິນຊື່ດັງທີ່ຈັດຄອນເສີດດ່ຽວຄັ້ງທຳອິດຂອງຕົນເອງໃນລາວນະເວລານັ້ນ.

ນອກຈາກນີ້, ຜົນງານນອກປະເທດຂອງລາວກໍຖືວ່າຈັດພໍໂຕ ເພາະໄດ້ມີໂອກາດຂ້າມຝັ່ງໄປຮ່ວມງານກັບຄ້າຍ Smallroom ຄ້າຍເພງອິນດີ້ຂອງໄທທີ່ Just” ສັງກັດຢູ່ ແລະ ເຄີຍຜ່ານການອໍດິຊັນ ”Audition Bassist Support” ເປັນຄົນລາວຄົນທຳອິດ ແລະ 1 ໃນ 5 ມືເບສທີ່ຖືກເລືອກໃຫ້ເປັນມືເບສຊັບພອດໃຫ້ກັບ Numcha ສິລະປິນສາວໄທຈາກຄ້າຍ Newecho Record, Bangkok ອີກດ້ວຍ.

ກິໂນ່ ໄດ້ຖິ້ມທ້າຍໄວ້ວ່າ

ຝຶກຊ້ອມຢູ່ກັບມັນໃຊ້ເວລາກັບມັນ ແລ້ວຈະພັດທະນາທັກສະນາເຮົາໄປເອງ” ບໍ່ຕ້ອງຮີບຮ້ອນພຽງຈິງໃຈກັບສຽງດົນຕີທີຕົນເອງຮັກ  ມື້ໜຶ່ງມັນຈະພາໄປທີ່ຝັນໄວ້ເອງ.

ສຽງເບສອາດຈະບໍ່ໄດ້ດັງທີ່ສຸດໃນວົງແຕ່ມັນເຮັດໃຫ້ວົງຫຼິ້ນແຊບຂຶ້ນ ແລະ ກິໂນ່ ກໍເລືອກຈະເປັນຄົນນັ້ນຄົນທີ່ເຮັດໃຫ້ເພງທຸກເພງມີລົດຊາດໃນແບບທີ່ຂາດບໍ່ໄດ້.

ໂດຍ: ທີມບັນນາທິການ Muan