ເກັ່ງ – ຫະຣິດ ບົວຍ້ອຍ ນາຍແບບ-ນັກສະແດງໜຸ່ມໜ້າໃໝ່ຂອງໄທ ທີ່ໜ້າຈັບຕາ ແຈ້ງເກີດຈາກຜົນງານຮູບເງົາຈາກຄ້າຍ GDH ເລື່ອງ ວິມານໜາມ ກັບບົດບາດສຸດເຂັ້ມຂຸ້ນໃນບົດຂອງ ຈິ່ງນະ ຈົນກາຍມາເປັນທີ່ເວົ້າເຖິງໃນໂລກອອນລາຍ.
ນັກສະແດງຄົນນີ້ແມ່ນໃຜ, Muan ຈະພາທຸກຄົນໄປຮູ້ຈັກພ້ອມກັນ.
ເກັ່ງ ຈົບການສຶກສາສາຂາວິຊາການສຶກສາ ຂະແໜງວິຊາພາສາໄທ ຈາກວິທະຍາໄລການສຶກສາ ມະຫາວິທະຍາໄລພະເຍົາ. ລາວເລີ່ມເປັນທີ່ຮູ້ຈັກຈາກຄລິບທີ່ເປັນກະແສໃນຂະນະທີ່ກຳລັງເຮັດໜ້າທີ່ເປັນຄູຝຶກສອນ ຈົນເຮັດໃຫ້ມີຜູ້ຕິດຕາມເປັນຈຳນວນຫຼາຍ. ດ້ວຍຮູບຮ່າງໜ້າຕາ ແລະ ບຸກຄະລິກກະພາບ, ລາວມີຕຳແໜ່ງເປັນເດືອນມະຫາວິທະຍາໄລພະເຍົາ ປະຈຳປີ 2018 ແລະ ຍັງເຄີຍຮັບຕຳແໜ່ງລາງວັນຮອງຊະນະເລີດອັນດັບ 2 ຈາກການປະກວດ Chinese Chiangmai 2021 ອີກດ້ວຍ.
ສຳລັບຜົນງານໃນວົງການບັນເທີງ, ເກັ່ງເລີ່ມມີຜົນງານຈາກການຖ່າຍແບບຫຼາຍຄັ້ງ ເຊິ່ງຫຼ້າສຸດຍັງໄດ້ຮັບບົດນຳໃນຊີຣີສ໌ ເຂມຈິຣາ ຕ້ອງລອດ Khemjira the Series ຈາກສັງກັດ mandee Work ເຊິ່ງເປັນການເປີດໂຕໃນຖານະນັກສະແດງຢ່າງເຕັມຮູບແບບຂອງລາວ ທີ່ແຟນໆຫຼາຍຄົນລໍຖ້າຮັບຊົມ.
ສຳລັບບົດບາດຫຼ້າສຸດໃນຮູບເງົາເລື່ອງ ວິມານໜາມ, ເກັ່ງຮັບບົດເປັນ ຈິ່ງນະ ເຊິ່ງນີ້ເປັນບົດບາດທີ່ທ້າທາຍຄວາມສາມາດໃນການສະແດງຫຼາຍ ເພາະເປັນຄັ້ງທຳອິດທີ່ສະແດງຮູບເງົາ ດ້ວຍການຖ່າຍທອດຕົວລະຄອນທີ່ເປັນຄົນສູ້ຊີວິດ ນັບວ່າເປັນໂຈດທີ່ຍາກທີ່ຜູ້ກ່ຽວຕ້ອງພິສູດສີມືໃຫ້ໄດ້. ແຕ່ເນື່ອງຈາກບົດບາດທີ່ໄດ້ຮັບໃກ້ຄຽງກັບຊີວິດຈິງ ເລີຍຊ່ວຍໃຫ້ອິນຫຼາຍຍິ່ງຂຶ້ນ ພ້ອມຮັບປະກັນເນື້ອຫາທີ່ເຂັ້ມຂຸ້ນ, ມ່ວນ, ຄາດເດົາບໍ່ໄດ້ ແລະ ຍັງສະທ້ອນໃຫ້ເຫັນເຖິງຄວາມສຳຄັນຂອງກົດໝາຍສົມລົດເທົ່າທຽມອີກດ້ວຍ.
ເກັ່ງໄດ້ໃຫ້ສຳພາດກັບ mgronline ວ່າ ນີ້ເປັນຮູບເງົາເລື່ອງທຳອິດທີ່ລາວໄດ້ຮຽນຮູ້ໃນສາດການສະແດງ ເຊິ່ງໃນເລື່ອງນີ້ລາວຮັບບົດເປັນຊາວໄທໃຫຍ່ ມີບຸກຄະລິກນິ່ງໆງຽບໆ ບໍ່ມີເປົ້າໝາຍໃນຊີວິດ ແຕ່ພໍໄດ້ມາພົບກັບ ທອງຄຳ ກໍດັນໄປຕົກຫຼຸມຮັກແບບບໍ່ຮູ້ໂຕ ເລີຍເຮັດໃຫ້ມີຄວາມຫວັງໃນການໃຊ້ຊີວິດຫຼາຍຂຶ້ນ ເອີ້ນວ່າເປັນຄວາມຮັກທີ່ບໍ່ມີຄຳນິຍາມ ແລະ ອະທິບາຍບໍ່ໄດ້ ແຕ່ຮູ້ສຶກວ່າຕົນເອງຕ້ອງມີຊີວິດຕໍ່ສູ້ເພື່ອຄົນໆນັ້ນ ເພາະເຫັນວ່າເຫັນໃຈ ແລະ ສົງສານ ທອງຄຳ ທີ່ຕ້ອງມາພົບກັບຄວາມອະຍຸຕິທຳຈາກການທີ່ບໍ່ມີກົດໝາຍຮອງຮັບໃນເລື່ອງຂອງການສົມລົດເທົ່າທຽມ ເຊິ່ງກວມເອົາຮອດເລື່ອງຂອງການຄອບຄອງຊັບສິນ.
ບົດບາດນີ້ຖືວ່າເປັນບົດທີ່ໜັກພໍສົມຄວນ ລາວຈຶ່ງໄດ້ໄປຮຽນການສະແດງ ແລະ ຝຶກອົບຮົມເພີ່ມເຕີມຢ່າງໜັກ ເພື່ອຮຽນຮູ້ການເປັນຊາວສວນທຸລຽນ. ແຕ່ໂຊກດີທີ່ວ່າ ເກັ່ງ ເປັນຄົນພາກເໜືອຂອງໄທ ແລະ ຄອບຄົວກໍເຮັດສວນ ຈຶ່ງເຂົ້າໃຈວັດທະນະທຳ ແລະ ວິຖີຊີວິດຄວາມເປັນຢູ່ຂອງຄົນພາກເໜືອໄທ.
ໃຜທີ່ຢາກສຳຜັດກັບບົດບາດການສະແດງຂອງນັກສະແດງຄົນນີ້ ກໍລໍຖ້າເບິ່ງ ວິມານໜາມ ພ້ອມກັນໃນໂຮງຮູບເງົາລາວ ໃນວັນທີ 3 ຕຸລາ 2024 ນີ້.
