Jazz & Hip Hop ການປະສົມປະສານເພງສະໄຕລ໌ໃໝ່ຈາກ UKNOWHATIMEAN ໃນເພງ “ສະອາດ”
ມ່ວນມາຊວນທຸກຄົນມາລອງຟັງເພງຂອງສິລະປິນຈາກບ້ານ huencrew ກັບເພງທີ່ມີຊື່ວ່າ “ສະອາດ” ເພງໃໝ່ຫຼ້າສຸດຈາກ UKNOWHATIMEAN ຫຼື ບິກ (Padasack Atvaly). ການກັບມາເທື່ອນີ້ເພງຂອງລາວນັ້ນໄດ້ປະສົມປະສານແນວບີສ jazz ແລະ hiphop ເຂົ້າດ້ວຍກັນເຮັດໃຫ້ພວກເຮົາໄດ້ເຫັນເຖິງຄວາມແຕກຕ່າງອອກໄປຈາກເພງລາວສ່ວນໃຫຍ່.
ຈຸດປະສົງຂອງການເຮັດເພງນີ້ຍ້ອນຢາກໃຫ້ຄົນລາວໄດ້ຟັງອີ່ຫຍັງທີ່ໃໝ່ ແລະ ບໍ່ຄືໃຜ, ເພາະໃນທຸກບາຣ໌ທຸກເນື້ອຮ້ອງແມ່ນມີຄວາມໝາຍ. ເພງນີ້ໄດ້ໃຊ້ເວລາໃນຫຼາຍເດືອນໃນການແກ້ຄຳຕ່າງໆເພື່ອໃຫ້ເຂົ້າເຖິງຜູ້ຟັງໄດ້ງ່າຍຂຶ້ນ, ເປັນເພງທີ່ມີຈັງຫວະດົນຕີສຽງແຣັບທີ່ຟັງແລ້ວຮູ້ສຶກວ່າໜັກ ແລະ ດິບ, ແຕ່ກໍບໍ່ໄວຈົນເກີນໄປເພາະດ້ວຍມີຈັງຫວະທີ່ຊັດເຈນ, ມີທັງຄວາມທຸກ ແລະ ເສົ້າ, ບາດແຜທີ່ລາວໄດ້ຮັບ. ໂດຍເພງນີ້ແມ່ນໄດ້ສື່ເຖິງຄວາມປິດປົກກະຕິຂອງໂລກທາງປະສາດ Neurological disorder ທີ່ບໍ່ສາມາດແຍກອອກຈາກບົດບາດທີ່ຕົວເອງໄດ້ຮັບ, ໂດຍຕົວຢ່າງທີ່ມັກເຫັນຄື: ນັກສະແດງທີ່ຍັງຄົງຕິດຢູ່ໃນຕົວຕົນຂອງບົດໜັງ ຫຼື ລະຄອນ.
ເພງນີ້ໄດ້ອີງໃສ່ເລື່ອງລາວຂອງບິກໃນຕະຫຼອດ 4 ປີທີ່ຜ່ານມາໃນສາຍງານຂອງການເຮັດເພງ ແລະ 2 ປີ, ທີ່ຄົ້ນພົບຕົນເອງວ່າຕົນເອງມັກຖ່າຍຮູບ ແລະ ຖ່າຍໜັງບໍ່ໜ້ອຍໄປກວ່າການເຮັດເພງ. ການທີ່ລາວໄດ້ໃຊ້ຊີວິດຍັງຖືວ່າໄປຢູ່ໃນບ່ອນທີ່ຜິດທີ່ຜິດທາງຈົນເຮັດໃຫ້ຕົວເອງໄດ້ຮັບບາດເຈັບທາງດ້ານຈິດໃຈ ແລະ ຍາກລຳບາກ. ຕະຫຼອດເວລາທີ່ເຕີບໃຫຍ່ມາບິກໄດ້ໃຊ້ເວລາໃນການພິສູດຕົວຕົນຫຼາກຫຼາຍ, ຈົນເກີດຄຳຖາມວ່າເຮັດໄປເພື່ອຫຍັງ ແລະ ເຮັດເພື່ອໃຜ? ຕົວຕົນຂອງລາວຕ້ອງການຫຍັງແທ້.
ມ່ວນຢາກຊວນທຸກຄົນໄປຫາຄຳຕອບກັນໃນເພງ ສະອາດ (CLEAN) – UKNOWHATIMEAN ກັນເລີຍນໍ, ແອັດແນະນຳໃຫ້ຟັງຫຼາຍໆເທື່ອເລີຍເພາະໃນເອັມວີນັ້ນມີຄວາມອິນເຕີ ແລະ ໄດ້ຟັງອີກມຸມມອງເລື່ອງລາວທີ່ເຮັດໃຫ້ພວກເຮົາຕ້ອງໄດ້ຮຽນຮູ້ກັບສິ່ງທີ່ເກີດຂຶ້ນກັບຕົວຕົນຂອງໜຸ່ມຄົນນີ້.
ໂດຍ: ທີມບັນນາທິການ Muan