FAZ $F: ສິລະປິນລາວ-ສັນຊາດມາເລເຊຍ ປ່ອຍເພງໃໝ່ “SHOW YOU MY LOVE”

ກ່ອນທີ່ຈະພາໄປຟັງເພງໃໝ່ກັນນັ້ນ, ມື້ນີ້ ມ່ວນ ຂໍພາມາຮູ້ຈັກກັນແດ່ໜ່ອຍໜຶ່ງກັບ FAZ $F ສິລະປິນສັນຊາດມາເລເຊຍ ທີ່ມາຕັ້ງຖິ່ນຖານຢູ່ປະເທດລາວ ແລະ ລາວຍັງໄດ້ສ້າງສັນຜົນງານຢູ່ໃນບ້ານເຮົາຢ່າງຫຼາກຫຼາຍ. FAZ $F ເປັນສິລະປິນທີ່ມີຄວາມສາມາດຫຼາຍຮູບແບບ ບໍ່ວ່າຈະເປັນການທີ່ລາວແຕ່ງເພງໄດ້ເຖິງ 7 ພາສາ, ຜົນງານເພງກໍສ້າງສັນເອງ, ທັງເຮັດວິດີໂອ, ເປັນພິທີກອນ ແລະ ຍັງມີທັກສະການສະແດງ ອີກດ້ວຍ.

ຖ້າຖາມເຖິງຜົນງານເພງທີ່ຜ່ານມາຂອງ FAZ $F ມີເພງໃດແດ່? ມ່ວນ ຄິດວ່າຫຼາຍຄົນຄົງຄຸ້ນຫູກັນແນ່ນອນ ເພາະເພງຂອງລາວນັ້ນທັງມ່ວນຕິດຫູ ແລະ ເພງທີ່ເຮັດໃຫ້ເປັນທີ່ຮູ້ຈັກກໍມີນຳກັນຫຼາຍເພງ. ຜົນງານທີ່ຜ່ານມາສ່ວນຫຼາຍກໍຈະເປັນຜົນງານທີ່ລາວໄດ້ຮ່ວມສ້າງສັນກັບທັງສິລະປິນທັງໃນລາວ ແລະ ຕ່າງປະເທດເຊັ່ນ: Sok Dee Pi Mai (2022), I Wanna (2022) ແລະ Uchida 1 Lao Remix (2024).

ຟັງເພງໝ່ SHOW YOU MY LOVE

ຜົນງານເພງໃໝ່ SHOW YOU MY LOVE ຈາກ FAZ $F ເພງນີ້ຖືກຂຽນຂຶ້ນເພື່ອບອກເລົ່າຄວາມຮູ້ສຶກຂອງ ຄວາມຮັກ ແລະ ຕ້ອງການຂອບໃຈຄົນສຳຄັນທີ່ສຸດໃນຊີວິດ. ເພງໄດ້ເລີ່ມຕົ້ນດ້ວຍການເລົ່າເຖິງຊ່ວງເວລາທີ່ຍາກລຳບາກຂອງຄວາມສຳພັນ ແລະ ລາວກໍຈະເຮັດທຸກຢ່າງເພື່ອຄົນໆນີ້ ບໍ່ປ່ອຍມື ຂໍພຽງໃຫ້ເຊື່ອໃຈກັນ.

ເພງ SHOW YOU MY LOVE ແມ່ນມີເນື້ອຮ້ອງເປັນພາສາອັງກິດ-ຈີນ ແລະ ເປັນເພງທີ່ຟັງງ່າຍສະບາຍໆ, ເນື້ອຫາມີຄວາມໝາຍທີ່ສື່ໄດ້ເລິກເຊິ່ງຫວານລະມຸນ. ຄວາມຮູ້ສຶກທີ່ ມ່ວນ ໄດ້ຟັງໃນຕອນທຳອິດແມ່ນຮັບຮູ້ໄດ້ເລີຍວ່າ FAZ $F ໄດ້ຖ່າຍທອດອາລົມຄວາມຮູ້ສຶກຜ່ານເນື້ອເພງ ຜ່ານສຽງຂອງລາວອອກມາເພື່ອສື່ສານເຖິງຄວາມຈິງໃຈ, ການອ້ອນວອນ ແລະ ການທີ່ຢາກຈະດູແລຄົນສຳຄັນຄົນນີ້ຕະຫຼອດໄປ.

ຜົນງານນີ້ບໍ່ພຽງແຕ່ສະແດງເຖິງຄວາມສາມາດໃນການແຕ່ງເພງທີ່ມີຫຼາຍພາສາຂອງລາວເທົ່ານັ້ນ, ແຕ່ຍັງເປັນການເລີ່ມຕົ້ນການເດີນທາງສາຍດົນຕີຄັ້ງໃໝ່ຂອງ FAZ $F ເພື່ອສ້າງສັນຜົນງານທີ່ມີຄຸນນະພາບສູງໃຫ້ກັບແຟນເພງ.

ເສັ້ນທາງໃນວົງການບັນເທິງຂອງ FAZ $F

FAZ $F ເລີ່ມຕົ້ນກ້າວເຂົ້າສູ່ວົງການບັນເທີງໃນປີ 2012 ໂດຍເລີ່ມຈາກການເປັນພິທີກອນ, ນັກສະແດງ ແລະ ນັກເຕັ້ນ. ໃນປີ 2016, ລາວກໍໄດ້ເຂົ້າສູ່ວົງການດົນຕີຢ່າງເຕັມຕົວ ແລະ ໄດ້ຮ່ວມຈັດງານຄອນເສີດໃນຫຼາຍຮູບແບບ ເພື່ອສ້າງບັນຍາກາດທີ່ດີ, ມ່ວນຊື່ນ ແລະ ສ້າງເວທີໃຫ້ກັບສິລະປິນໄດ້ມີພື້ນທີ່ສະແດງຄວາມສາມາດ.

ໃນຊ່ວງເວລາການລະບາດຂອງພະຍາດໂຄວິດ, FAZ $F ແລະ ໝູ່ຮ່ວມງານຂອງລາວກໍໄດ້ສຶກສາຢ່າງເລິກເຊິ່ງກ່ຽວກັບທຸລະກິດວົງການເພງ ໂດຍໄດ້ມີສ່ວນຮ່ວມໃນການພັດທະນາສິລະປິນ. ຫຼັງຈາກນັ້ນ, ພວກເຂົາກໍໄດ້ປ່ອຍຜົນງານເພງຂອງຕົນເອງ ແລະ ໄດ້ຂຶ້ນສະແດງໃນລະດັບສາກົນ ເຊິ່ງເປັນການຍົກລະດັບເສັ້ນທາງອາຊີບດົນຕີຂອງພວກເຂົາໃຫ້ກ້າວໜ້າໄປອີກຂັ້ນ ແລະ ມ່ວນ ຍັງໄດ້ຍິນຂ່າວວ່າພາຍໃນປີ 2026 ລາວກຳລັງຈະປ່ອຍຜົນງານເພງມາອີກທັງໝົດ 15 ເພງ, ແຟນເພງຂອງ FAZ $F ລໍຖ້າຕິດຕາມກັນໄດ້ເລີຍ.