The King is back! ແລະ ຄັ້ງນີ້ພວກເຂົາມາພ້ອມກັບມົງກຸດທີ່ແຂງແກ່ນກວ່າເກົ່າ ພ້ອມຈະພາເຫຼົ່າ EXO-L ເດີນທາງສູ່ໂລກໃໝ່ທີ່ຍິ່ງໃຫຍ່ກວ່າທີ່ເຄີຍ.
ຫຼັງຈາກທີ່ປ່ອຍໃຫ້ແຟນໆ ທົ່ວໂລກຕ້ອງຄິດຮອດ ແລະ ເຝົ້າລໍຄອຍມາໄລຍະໜຶ່ງ, ໃນທີ່ສຸດ EXO ກໍໄດ້ສ້າງປາກົດການສັ່ນສະເທືອນວົງການ K-Pop ອີກຄັ້ງ ດ້ວຍການເປີດຕົວອາລະບຳເຕັມຊຸດທີ 8 ທີ່ມີຊື່ວ່າ “REVERXE”.
ການກັບມາຄັ້ງນີ້ບໍ່ແມ່ນພຽງແຕ່ການອອກຜົນງານໃໝ່ທຳມະດາ ແຕ່ຍັງເປັນການສະເຫຼີມສະຫຼອງເສັ້ນທາງດົນຕີທີ່ຍາວນານກວ່າ 14 ປີ ຂອງກຸ່ມສິລະປິນທີ່ຖືກຂະໜານນາມວ່າເປັນ King of K-Pop ໂດຍມີເພງເອກນັ້ນກໍຄື “Crown” ເປັນຕົວຊູໂຮງ ທີ່ປະກາດໃຫ້ໂລກຮູ້ວ່າບັນລັງຂອງພວກເຂົາຍັງຄົງສະຫງ່າງາມບໍ່ເຄີຍປ່ຽນ.
“Crown” ມຸງກຸດແຫ່ງຄວາມພາກພູມໃຈ ແລະ ຄວາມຜູກພັນ
ເພງ “Crown” ປຽບເໝືອນດັ່ງບົດບັນທຶກແຫ່ງຄວາມອົດທົນ ແລະ ການເຕີບໃຫຍ່. ເນື້ອຫາຂອງເພງໄດ້ເຈາະເລິກເຖິງການຮັກສາ “ມົງກຸດ” ຫຼື ຄຸນຄ່າຂອງຕົວເອງໄວ້ທ່າມກາງພາຍຸຂອງການປ່ຽນແປງ ໂດຍສົ່ງຂໍ້ຄວາມກົງເຖິງແຟນໆ ວ່າ ມຸງກຸດນີ້ຈະບໍ່ມີຄວາມໝາຍເລີຍ ຖ້າຫາກຂາດການສະໜັບສະໜູນຈາກຜູ້ທີ່ຄອຍຢູ່ຄຽງຂ້າງມາຕະຫຼອດ.
ຄວາມພິເສດຂອງອາລະບຳ “REVERXE” ຄືການຫຼິ້ນກັບຄຳວ່າ Reverse ທີ່ສື່ເຖິງການຍ້ອນກັບໄປຫາຮາກເຫງົ້າ ແລະ ຈຸດເລີ່ມຕົ້ນຂອງພວກເຂົາ ແຕ່ເປັນການກັບໄປດ້ວຍປະສົບການທີ່ເໜືອກວ່າເກົ່າ. ມັນຄືການ Evolution ທີ່ສົມບູນແບບ ເຊິ່ງເຮົາຈະໄດ້ເຫັນຄວາມເກົ່າແກ່ທີ່ຄຸ້ນເຄີຍ ປະສົມປະສານກັບຄວາມລ້ຳສະໄໝຂອງດົນຕີໃນຍຸກປັດຈຸບັນ ເຮັດໃຫ້ທຸກວິນາທີຂອງເພງເຕັມໄປດ້ວຍສະເໜ່ທີ່ໜ້າຄົ້ນຫາ.
ສິ່ງທີ່ເຮັດໃຫ້ “Crown” ກາຍເປັນຜົນງານລະດັບ Masterpiece ຄືການຮຽບຮຽງດົນຕີໃນແບບ Epic R&B ທີ່ໜັກແໜ້ນ. ສຽງເບສທີ່ເລິກເຊິ່ງປະກອບກັບສຽງສັງເຄາະທີ່ໃຫ້ຄວາມຮູ້ສຶກຍິ່ງໃຫຍ່ ກໍຍິ່ງສົ່ງໃຫ້ເພງນີ້ສົມກັບຊື່ Crown ແທ້ໆ. ແນ່ນອນວ່າຈຸດເດັ່ນທີ່ຂາດບໍ່ໄດ້ຄື Vocal Power ຂອງສະມາຊິກ ໂດຍສະເພາະການປະສານສຽງທີ່ນຸ້ມນວນແຕ່ຊົງພະລັງ ແລະ ທ່ອນ High-note ທີ່ພ້ອມຈະເຮັດໃຫ້ຜູ້ຟັງຂົນລຸກໄດ້ທຸກຄັ້ງ.
ນອກຈາກພາກສ່ວນຂອງດົນຕີແລ້ວ, ໃນມິວສິກວິດີໂອ (MV) ຍັງໄດ້ຖ່າຍທອດງານພາບທີ່ມີຄວາມເປັນສິລະປະສູງ ຜ່ານການນຳໃຊ້ແສງ ແລະ ເງົາທີ່ສະແດງເຖິງຄວາມລຶກລັບ. ສາກທີ່ສະມາຊິກແຕ່ລະຄົນປາກົດໂຕທ່າມກາງສະຖາປັດຕະຍະກຳທີ່ງົດງາມ ຊ່ວຍຕອກຍ້ຳພາບລັກຂອງ King ແຫ່ງວົງການດົນຕີໄດ້ຢ່າງຊັດເຈນ ແລະ ສົມບູນແບບ.
ຄວາມຫຼາກຫຼາຍໃນອາລະບຳ REVERXE
ນອກຈາກເພງຫຼັກທີ່ຊົງພະລັງແລ້ວ, ໃນອາລະບຳ REVERXE ຍັງປະກອບໄປດ້ວຍບົດເພງອີກ 8 ເພງ ທີ່ພາເຮົາໄປສຳຜັດກັບທຸກອາລົມ ບໍ່ວ່າຈະເປັນຄວາມດຸດັນໃນ “Back It Up”, ຄວາມເສົ້າທີ່ເລິກເຊິ່ງໃນ “Suffocate” ແລະ “Flatline” ຫຼື ບັນຍາກາດທີ່ລະມຸນຄືກັບແສງຈັນໃນ “Moonlight Shadows”. ກ່ອນຈະປິດທ້າຍດ້ວຍ “I’m Home” ເຊິ່ງໃຫ້ຄວາມຮູ້ສຶກອົບອຸ່ນ ຄືກັບການທີ່ EXO ໄດ້ກັບມາຮອດບ້ານທີ່ມີແຟນໆ ຄອຍຖ້າຕ້ອນຮັບຢູ່ສະເໝີ.
ທັງໝົດນີ້ຄືຂໍ້ພິສູດວ່າ ຕະຫຼອດ 14 ປີທີ່ຜ່ານມາ EXO ບໍ່ເຄີຍຢຸດພັດທະນາ ແລະ ພວກເຂົາຍັງຄົງສ້າງມາດຕະຖານໃໝ່ໃຫ້ກັບວົງການ K-Pop ຢູ່ສະເໝີ.
