ມາແລ້ວເພງເຕັມຂອງນັກຮ້ອງໜ້າໃໝ່ທີ່ມີຄວາມເລິກລັບກັບ Dr.Isolate ໃນເພງທຳອິດຂອງລາວທີ່ມີຊື່ວ່າ “ເປັນດັ່ງມື້ວານ” ເພງນີ້ໄດ້ເລົ່າເຖິງອາລົມຄວາມຮູ້ສຶກທີ່ທັງເສົ້າ ແລະ ການອ້ອນວອນເຖິງຄວາມຮັກທີ່ໄດ້ສິ້ນສຸດລົງໄປໃຫ້ກັບຄືນມາເປັນຄືເກົ່າ.
“ຢາກໃຫ້ເຈົ້າລອງກັບມາຮັກກັນອີກຄັ້ງ ເໝືອນດັ່ງມື້ວານທີ່ເຮົາສອງຄຽງຄູ່ກັນ” ສິ່ງທີ່ Dr.Isolate ໄດ້ສື່ສານຜ່ານເພງນີ້ແມ່ນໝາຍເຖິງເລື່ອງລາວຂອງຄວາມຮັກທີ່ສູນເສຍໄປ ແຕ່ມັນຍັງຄົງມີອິດທິພົນຕໍ່ຈິດໃຈຫຼາຍ, ເລີຍຢາກຂໍໂອກາດໃຫ້ສາມາດຍ້ອນເວລາກັບໄປເພື່ອຮັກສາສິ່ງທີ່ສຳຄັນທີ່ສຸດເອົາໄວ້ກໍຄືຄົນຮັກ ໂດຍການເວົ້າເຖິງຄວາມຮູ້ສຶກດີໆໃນວັນວານ ແລະ ຄວາມຮັກທີ່ເຄີຍມີໃຫ້ກັນຂອງທັງສອງຄົນ.
ເຖິງແມ່ນວ່າຄວາມຮັກທີ່ມີຢູ່ໃນປັດຈຸບັນຈະກາຍເປັນພຽງແຕ່ພາບເລືອນລາງຄ່ອຍໆຈາງຫາຍໄປ ແຕ່ຄວາມໝາຍຂອງເນື້ອຫາໃນເພງຍັງສື່ເຖິງມຸມມອງຂອງຄົນທີ່ຍັງຍຶດຕິດຢູ່ກັບຄວາມຫວັງທີ່ຈະສາມາດ “ແກ້ໄຂອະດີດ” ແລະ ຮຽກຮ້ອງໃຫ້ຄົນຮັກກັບຄືນມາເພື່ອສ້າງຊ່ວງເວລາທີ່ດີຮ່ວມກັນອີກຄັ້ງ.
ພໍ ມ່ວນ ໄດ້ຟັງສຽງຂອງ Dr.Isolate ໃນເພງນີ້ ກໍເຮັດໃຫ້ຄິດວ່າ ສຽງຂອງລາວມ່ວນມີເອກະລັກ ພ້ອມທັງການຖ່າຍທອດອາລົມອອກມາໄດ້ດີໃນແນວເພງທີ່ມີກິ່ນອາຍເພງ Pop Indie ທີ່ໃຫ້ຄວາມຮູ້ສຶກທັງ ສຸກ ແລະ ເສົ້າ ລວມໆກັນ, ພໍຟັງວົນໆກໍຮູ້ເລີຍວ່າໃນຄວາມຮູ້ສຶກນັ້ນມີຄວາມຮູ້ສຶກເສຍໃຈພ້ອມກັບຄວາມເຈັບປວດທີ່ຫຼາຍຈົນລົ້ນອອກມາຜ່ານເພງ “ເປັນດັ່ງມື້ວານ”.
