ພາຮູ້ຈັກ ດີອາສ ພາຣາກອນ ນາຍແບບໜຸ່ມຄາສັກສະຖານສູ່ເສັ້ນທາງວົງການແຟຊັນໃນລາວ

“ຂ້ອຍຕ້ອງການຈະມີປະສົບການທີ່ຫຼາກຫຼາຍໃນຊີວິດ ແລະຕອນນີ້, ຂ້ອຍຕ້ອງການເຂົ້າໃຈວ່າຄົນລາວມີຊີວິດແບບໃດ? ພວກເຂົາຄິດແນວໃດ?” 

ນີ້ຄືຄຳເວົ້າຂອງ Dias Paragon, ນາຍແບບໜຸ່ມຈາກປະເທດຄາສັກສະຖານ ຜູ້ທີ່ຕັດສິນໃຈເດີນທາງມາຢູ່ ແລະ ສ້າງຊື່ສຽງໃນວົງການແຟຊັນທີ່ປະເທດລາວ. ດ້ວຍອາຍຸພຽງ 21 ປີ, ດີອາສ ບໍ່ພຽງແຕ່ເປັນນາຍແບບທີ່ເຕັມໄປດ້ວຍຄວາມຝັນ, ແຕ່ລາວຍັງເປັນຜູ້ສະແຫວງຫາປະສົບການຊີວິດທີ່ເລິກເຊິ່ງ.

ເຖິງຈະເປັນຄົນຄາສັກສະຖານ, Dias Aubakir ແຕ່ຫຼາຍຄົນມັກຈະເອີ້ນລາວວ່າ Dias – ດີອາສ ແຕ່ຊື່ໃນວົງການຂອງລາວຄື Dias Paragon. ລາວໄດ້ບອກວ່າ: “Paragon ນີ້ແມ່ນຊື່ທີ່ໂຕລະຄອນທີ່ມັກໃນນິຍາຍ ເຊິ່ງຊື່ນີ້ຈະໄດ້ຮັບເມື່ອພວກເຂົາບັນລຸຄວາມສຳເລັດອັນຍິ່ງໃຫຍ່, ສະນັ້ນ ຂ້ອຍຈຶ່ງໃຊ້ຊື່ນີ້ເພື່ອເປັນການສະແດງອອກເຖິງຄວາມມຸ່ງຫວັງຂອງຂ້ອຍ.”

ສິ່ງທີ່ເຮັດໃຫ້ໃຜຫຼາຍໆຄົນຮູ້ຈັກ ແລະ ຈື່ ດີອາສ ໄດ້ດີແມ່ນມາຈາກນິໄສທີ່ມ່ວນຊື່ນຂອງລາວ, ໂດຍສະເພາະລັກສະນະເດັ່ນຂອງລາວຄືການມີ “ຄວາມສົດໃສແບບເດັກນ້ອຍ” ດ້ວຍທີ່ເປັນຄົນທີ່ເຕັມໄປດ້ວຍພະລັງບວກ ແລະ ມັກສຽງຫົວມັກຄວາມມ່ວນຊື່ນ ຈຶ່ງເຮັດໃຫ້ຫຼາຍຄົນຈື່ ດີອາສ ໄດ້ ເພາະຖ້າດີອາສຢູ່ໃສ ບັນຍາກາດດີໆກໍຈະຢູ່ບ່ອນນັ້ນນຳ

ດີອາສໄດ້ບອກກັບມ່ວນວ່າ ປະເທດລາວຮ້ອນຫຼາຍສຳລັບລາວ ແລະອາດຈະເຮັດໃຫ້ບາງຄົນຮູ້ສືກວ່າມັນຍາກໃນການປັບໂຕສຳລັບຄົນຕ່າງປະເທດແຕ່ລາວກໍບອກວ່າ: “ມັນບໍ່ແມ່ນບັນຫາໃຫຍ່, ຖ້າຂ້ອຍປັບໂຕໄດ້ ອຸປະສັກແບບໃດ ຂ້ອຍກໍສູ້ໄຫວ” ແລະ ດີອາສຍັງມີງານອະດິເລກຄື ຊ່ວງເວລາວ່າງໆຈາກການເຮັດວຽກແມ່ນຈະມີຄວາມສຸກກັບການໄດ້ໄປແລ່ນອອກກຳລັງກາຍ ຫຼື ຂັບລົດຖີບຢູ່ຕາມເສັ້ນທາງລົດເມ BRT ໃໝ່ໃນຕອນກາງເວັນທີ່ບໍ່ມີລົດ, ເພາະມັນເຮັດໃຫ້ລາວຮູ້ສຶກໄດ້ຢູ່ກັບຕົວເອງ ແລະ ມີຄວາມສຸກທີ່ສຳພັດກັບບັນຍາກາດອ້ອມຕົວ

ກ່ອນທີ່ຈະເປັນ ດີອາສ ທີ່ສົດໃສຄືທຸກມື້ນີ້, ລາວຍອມຮັບວ່າຊີວິດເຄີຍຜ່ານຊ່ວງເວລາທີ່ໜັກໜ່ວງມາກ່ອນກໍຄື
“ການທີ່ຮູ້ສຶກວ່າຊີວິດທີ່ຢູ່ໄປແບບບໍ່ມີຄວາມໝາຍ ແລະ ຂ້ອຍບໍ່ມັກຊີວິດແບບນັ້ນ.”

ນັ້ນຈຶ່ງເປັນຈຸດປ່ຽນທີ່ເຮັດໃຫ້ລາວຕັດສິນໃຈອອກຈາກປະເທດເພື່ອເດີນທາງທົ່ວໂລກ ແລະ ການເດີນທາງນີ້ເອງທີ່ເຮັດໃຫ້ລາວໄດ້ “ຮູ້ຈັກກັບປະເທດລາວ”. ເມື່ອຕັດສິນໃຈມາຢູ່ປະເທດລາວ, ດີອາສໄດ້ບອກກັບມ່ວນວ່າ: “ມີຄວາມສຸກຫຼາຍກັບການທີ່ພົບກັບໝູ່ເພື່ອນທີ່ຢູ່ປະເທດລາວ.”

ສຳລັບ ດີອາສ, ວຽກສະແດງແລະນາຍແບບເປັນສິ່ງທີ່ຊ່ວຍໃຫ້ລາວໄດ້ຄົ້ນພົບໂລກກວ້າງ ແລະ ເຂົ້າເຖິງວັດທະນະທຳລາວຢ່າງເລິກເຊິ່ງ. ລາວເວົ້າວ່າ:

“ຂ້ອຍຕ້ອງການຈະມີປະສົບການທີ່ຫຼາກຫຼາຍໃນຊີວິດ ແລະຕອນນີ້, ຂ້ອຍຕ້ອງການເຂົ້າໃຈວ່າຄົນລາວມີຊີວິດແບບໃດ? ພວກເຂົາຄິດແນວໃດ?” 

ລາວຖືວ່າການສະແດງແລະການເປັນນາຍແບບເປັນວິທີທີ່ໄວທີ່ສຸດທີ່ຈະໄດ້ຮັບປະສົບການທີ່ແຕກຕ່າງກັນ. ສິ່ງທີ່ລາວໃຫ້ຄວາມສຳຄັນທີ່ສຸດໃນການເຮັດວຽກແມ່ນການສົ່ງຕໍ່ ຄວາມຮູ້ສຶກດີໆ ໃຫ້ກັບຜູ້ຊົມ, ເຊິ່ງກົງກັບເປົ້າໝາຍສ່ວນຕົວຂອງລາວທີ່ຈະ “ເຮັດໃຫ້ຄົນຮູ້ສຶກມີຄວາມສຸກ.”

ໃນບັນດາຜົນງານທີ່ຜ່ານມາ, ລາວມັກທີ່ສຸດແມ່ນງານປະກວດເຕັ້ນຂອງ C-vitt, ເພາະຕື່ນເຕັ້ນຫຼາຍທີ່ໄດ້ພົບກັບ “ຄົນໜຸ່ມທີ່ມີພອນສະຫວັນຫຼາຍຄົນຢູ່ໃນບ່ອນດຽວ.”

ສຳລັບອະນາຄົດ, ດີອາສ ມີເປົ້າໝາຍທີ່ຈະກ້າວໄປເປັນ ດາລາ-ນັກສະແດງ ແລະ ການທີ່ສາມາດເວົ້າພາສາລາວແລະພາສາໄທໄດ້ຢ່າງຄ່ອງແຄ້ວ. ຄວາມຝັນສະເພາະຂອງລາວແມ່ນ: “ຂ້ອຍຢາກເປັນນັກສະແດງໃນ MV ຂອງເອື້ອຍ ອາລູນ້າ ແລະ ຫວັງວ່າມັນຈະເກີດຂຶ້ນໃນໄວໆນີ້.”

ເມື່ອຖາມວ່າຄວາມສຳເລັດສຳລັບ Dias Paragon ໝາຍເຖິງຫຍັງ? ລາວຕອບຢ່າງຊັດເຈນວ່າ:

“ເມື່ອເຮົາໄດ້ທຸ້ມເທທຸກຢ່າງໃນການສ້າງສິ່ງໃດສິ່ງໜຶ່ງ ແລ້ວເບິ່ງມັນແລະຮູ້ສຶກພູມໃຈກັບຜົນງານນັ້ນ. ນີ້ຄືຄວາມສຳເລັດທີ່ເຮົາພະຍາຍາມໄປໃຫ້ເຖິງ.”