ມີການສະປອຍເລື່ອງລາວຂອງຊີຣີສ໌ໃນບາງສ່ວນ ແລະ ເລື່ອງນີ້ມີຄວາມໜ້າສົນໃຈຫຼາຍກາລັນຕີຜົນງານການສະແດງຂອງນັກສະແດງເຊັ່ນ: ຍາຍ່າ, ແພັດ ຊະຍານິດ, ນະ ນະພັດ, ຣິວ ວະຊິຣະວິດ, ການຖ່າຍທຳທີ່ມີ Mood & Tone ງົດງາມແບບໂກທິກ ແລະ ການເລົ່າເລື່ອງທີ່ຊັບຊ້ອນ ເປັນການປະສົມປະສານລະຫວ່າງຄວາມງາມຂອງດອກໄມ້ກັບຄວາມມືດໃນຈິດໃຈມະນຸດເຮັດໃຫ້ຜູ້ຊົມຕ້ອງລຸ້ນເຖິງຕອນຈົບ.
Dalah Death and the Flowers ແມ່ນຊີຣີສ໌ໄທຈາກ Netflix ເປັນເລື່ອງແນວສືບສວນ-ເລິກລັບ (Whodunit) ທີ່ມີການປະສົມປະສານລະຫວ່າງດຣາມ່າ, ອາຊະຍາກຳ ແລະ ຄວາມຕື່ນເຕັ້ນທີ່ເວົ້າເຖິງເລື່ອງລາວຂອງຄູ່ບ່າວສາວທີ່ມາຈາກຄອບຄົວຊົນຊັ້ນສູງທີ່ມີອິດທິພົນຂອງປະເທດ ເຊິ່ງທັງສອງກຳລັງຈະແຕ່ງານກັນ.
ແຕ່ໃນຄືນກ່ອນແຕ່ງງານຢູ່ໆເຈົ້າບ່າວ “ໂອມ” ທີ່ເປັນຜູ້ກຳລັງລົງເລືອກຕັ້ງນາຍົກລັດຖະມົນຕີ ຖືກຂ້າຕະກຳໃນສະຕູດິໂອຈັດດອກໄມ້ຂອງນາງເອກ “ດາຫຼາ” ທີ່ເປັນຜູ້ອອກແບບການຕົກແຕ່ງດອກໄມ້ທີ່ມີຊື່ສຽງ ແລະ ຢູ່ໆເຈົ້າສາວ “ຣິສາ” ກໍຫາຍຕົວໄປຢ່າງເລີກລັບ.
ເລີ່ມຕົ້ນເລື່ອງດ້ວຍຄວາມວຸ່ນວາຍເມື່ອໂອມຖືກພົບເປັນສົບໃນມື້ແຕ່ງງານຂອງລາວ, ຢູ່ໃນສະຕູດິໂອດອກໄມ້ຂອງດາຫຼາ. ການຕາຍຢ່າງເລິກລັບນີ້ເຮັດໃຫ້ທຸກຄົນກາຍເປັນຜູ້ຕ້ອງສົງໃສໃນການສືບສວນຄະດີຄາດຕະກຳ, ຕັ້ງແຕ່ຄອບຄົວຂອງໂອມ (ຕະກູນເອື້ອເທພາ) ແລະ ຄອບຄົວຂອງຣິສາ (ຕະກູນຕັ້ງສິນສັບ) ທີ່ມີຄວາມຂັດແຍ້ງກັນເອງ.
ດາຫຼາ ຜູ້ທີ່ເບິ່ງຄືວ່າເປັນພຽງນັກຈັດດອກໄມ້ກັບມາເປັນຄົນສຳຄັນໃນການຄົ້ນຫາຄວາມຈິງລາວໄດ້ເລີ່ມການຕາມສືບສວນດ້ວຍຕົວເອງເພື່ອເປີດເຜີຍຄວາມລັບດຳມືດຂອງຄອບຄົວຊົນຊັ້ນສູງນີ້, ທັງການຫຼອກລວງ ແລະ ຄວາມລັບທີ່ເຊື່ອມໂຍງກັບອາດີດຂອງດາຫຼາເອງ.
ພາຍໃນເລື່ອງໄດ້ເລົ່າການແກ້ໄຂປິດສະໜາດ້ວຍດອກໄມ້ ແລະ ສະທ້ອນໃຫ້ເຫັນຄວາມງາມທີ່ປົກປິດຄວາມມືດມົວ. ການສືບສວນໄດ້ເປີດເຜີຍເລື່ອງລາວ ແລະ ລວມເຖິງການສົມຮູ້ຮ່ວມຄິດທີ່ໃຫຍ່ ແລະ ຊັບຊ້ອນກວ່າທີ່ຄິດ ພ້ອມທັງຄວາມຈິງທີ່ບໍ່ຄາດຄິດກ່ຽວກັບການຕາຍຂອງໂອມ. ໃນທີ່ສຸດ ດາຫຼາໄດ້ເປີດເຜີຍຄວາມຈິງທັງໝົດ ແຕ່ກໍຕ້ອງປະເຊີນກັບຜົນກະທົບຈາກຄວາມລັບຂອງຕົວດາຫຼາທີ່ຖືກເປີດເຜີຍໃນຕອນຈົບເຊັ່ນດຽວກັນ.
ໂດຍ: ທີມບັນນາທິການ Muan
