Zamio P ທ້າທາຍແນວເພງໃໝ່ສົ່ງເພງ ບາດແຜ (After U) ອະທິບາຍຄວາມຮັກສຸດຊ້ຳທີ່ເຮັດໃຫ້ເຈັບເລິກ
Highlights
- ຄວາມສຳພັນທີ່ Toxic ຄືກັບການຖືກດຶງລົງຂຸມດຳ ແລະ ຖືກກີດບາດແຜຊ້ຳໆ ດ້ວຍຄຳຫຼອກລວງ ຈົນສ້າງຄວາມວິຕົກກັງວົນ ແລະ ກັດກິນໂຕຕົນໃຫ້ຈົມຢູ່ກັບຄວາມມືດມົນ.
- ໃນວັນທີ່ເລີ່ມມີສະຕິ, ວິທີການບັນເທົາຄວາມເຈັບປວດທີ່ດີທີ່ສຸດແມ່ນການ “ຍອມຮັບຄວາມຈິງ” ແລະ ກ້າທີ່ຈະຕັດສິນໃຈຖິ້ມອະດີດທີ່ເຄີຍສ້າງບາດແຜໄວ້ເບື້ອງຫຼັງ.
- ບົດເພງສົ່ງຕໍ່ກຳລັງໃຈໃຫ້ທຸກຄົນລຸກຂຶ້ນຢືນໃໝ່, ຮຽນຮູ້ທີ່ຈະກັບມາຮັກໂຕເອງ ແລະ ໃຊ້ຊີວິດໃຫ້ດີກວ່າເກົ່າ ແທນການຈົມປັກຢູ່ກັບຄວາມຊົງຈຳທີ່ບໍ່ດີ.
ບາງເທື່ອການຍອມຮັບຄວາມຈິງ ກໍເປັນສິ່ງທີ່ຍາກເກີນທີ່ຈະອະທິບາຍໄດ້ ແລະ ຖ້າມັນເປັນບາດແຜທາງໃຈທີ່ເກີດຈາກຄວາມຮັກທີ່ຫຼອກລວງນັ້ນເທົ່າກັບຄວາມເຈັບປວດມະຫາສານທີ່ກະແທກໃຈເຮົາ. ມ່ວນຊວນຟັງ ເລີຍຈະມາແຊຣ໌ເພງໃໝ່ “ບາດແຜ (After U)” ຈາກ Zamio P ໃຫ້ທຸກຄົນໄດ້ລອງຟັງ.
ຄວາມສຳພັນທີ່ Toxic ເຮັດໃຫ້ຄົນໆໜຶ່ງຕ້ອງເຈັບ ແລະ ຈົມກັບຄວາມຮູ້ສຶກເຈັບປວດພາຍໃນທີ່ແນມບໍ່ເຫັນ ມັນກໍປຽບຄືກັບການຖືກດຶງເຂົ້າສູ່ຂຸມດຳ ແລະ ມີມືທີ່ເບິ່ງບໍ່ເຫັນມາກີດບາດແຜລົງຮ່າງກາຍເຮົາຊ້ຳໆ ເຊິ່ງນີ້ຄືທັງໝົດຂອງຄວາມຮູ້ສຶກທີ່ແສນຄວາມເຈັບປວດທີ່ Zamio P ໄດ້ສື່ສານຜ່ານເພງໃໝ່ ບາດແຜ (After U).
ໃນເອັມວີເພງ (MV) ສື່ສານໃຫ້ເຫັນເຖິງຄວາມວິຕົກກັງວົນຈາກການຖືກຫຼອກລວງ ພໍເບິ່ງແລ້ວມັນກໍເຮັດໃຫ້ຮູ້ສຶກສັບສົນໄປນຳ ພ້ອມທັງເຫັນວ່າໂຕຕົນໄດ້ຖືກຄວາມມືດກັດກິນຢ່າງຮຸນແຮງ ນີ້ແມ່ນຄວາມເຈັບປວດຈາກຄວາມຮັກທີ່ຫຼາຍຄົນອາດຈະກຳລັງຜະເຊີນໜ້າຢູ່ ເຊິ່ງໃນເວລານັ້ນເຮົາອາດຈະລືມທີ່ຈະຮັກໂຕເອງ ແລະ ຫາທາງອອກບໍ່ໄດ້ເລີຍ.
ແຕ່ພໍຄວາມເຈັບເລີ່ມຊາ ແລະ ເລີ່ມມີສະຕິ, ເຮົາກໍເລີ່ມທີ່ຈະເຫັນທາງອອກທີ່ດີທີ່ສຸດໃນເວລານັ້ນ ຄືການບັນເທົາມັນໄດ້ດ້ວຍການ “ຍອມຮັບຄວາມຈິງ ແລະ ການຕັດສິນໃຈຖິ້ມອະດີດທີ່ເຮັດໃຫ້ເຈັບ”.
ບົດເພງນີ້ໄດ້ເຮັດໃຫ້ເຫັນວ່າ ພວກເຮົາບໍ່ຄວນຈົມຢູ່ກັບອະດີດທີ່ມັນທຳຮ້າຍເຮົາ, ລຸກຂຶ້ນຢືນໃໝ່ ເພື່ອກ້າວເດີນອອກຈາກອະດີດທີ່ຂົມຂື່ນ ແລະ ຄວນໃຊ້ຊີວິດໃຫ້ດີກວ່າແຕ່ກ່ອນນັ້ນ.