ຮູ້ຈັກ tomotom ນັກສ້າງເນື້ອຫາສາຍທ່ອງທ່ຽວ ຜູ້ຕັ້ງເປົ້າເດີນທາງພິຊິດ 148 ເມືອງທົ່ວລາວ

ຖ້າໃຜທີ່ມັກເບິ່ງກ່ຽວກັບການທ່ອງທ່ຽວຕ້ອງຮູ້ຈັກກັບ tomotom ກັນແນ່ນອນ ແລະ ຫຼາຍຄົນອາດຈະຍັງບໍ່ຮູ້ວ່າ ຖ້າລາວບໍ່ໄດ້ມາເຮັດເນື້ອຫາກ່ຽວກັບການທ່ຽວນັ້ນ ພວກເຮົາອາດຈະເຫັນລາວຢູ່ໃນສາຍງານດົນຕີກໍໄດ້ເດີທຸກຄົນ ເພາະ tomotom ຫຼື ຕ້ອມ – ເສົາສະຫວັນ ເກດມາລາ (Saosavanh Ketmala) ເປັນຄົນໜຶ່ງທີ່ຫຼົງໃຫຼໃນສິລະປະຫຼາຍ ບໍ່ວ່າຈະເປັນສຽງດົນຕີ, ຖ່າຍພາບ, ການສ້າງສື່ວິດີໂອ ຫຼື ສະຖາປັດຕະຍາກຳເກົ່າແກ່ ຖ້າລາວບໍ່ໄດ້ເຮັດເນື້ອຫາທ່ອງທ່ຽວອາດຈະເຫັນພາບລາວໃນບົດບາດອື່ນໆ.

ລາວຍັງເປັນອີກຄົນໜຶ່ງທີ່ມີຊື່ເຂົ້າຊີງ Muan Awards ທັງປີ 2024 ແລະ 2025, ສາຂາ ນັກສ້າງເນື້ອຫາສາຍທ່ອງທ່ຽວດີເດັ່ນແຫ່ງປີ (Best Travel Content Creator of the Year).

ຕ້ອມ ແມ່ນນັກສ້າງເນື້ອຫາສາຍທ່ອງທ່ຽວຈາກເພຈ tomotom (ຕ້ອມ-ໂອ-ຕ້ອມ) ປັດຈຸບັນອາຍຸ 28 ປີ, ບ້ານເກີດແມ່ນຢູ່ທີ່ ບ້ານ ສອນໄຊ, ເມືອງ ນະຄອນໄກສອນ, ແຂວງ ສະຫວັນນະເຂດ ເຊິ່ງລາວໄດ້ເຕີບໃຫຍ່ ແລະ ຈົບການສຶກສາຢູ່ທີ່ ໂຮງຮຽນ ມສ ເຊທ່າມວກ (ບ້ານ ເຊທ່າມວກ, ເມືອງ ພີນ, ແຂວງ ສະຫວັນນະເຂດ).

ເປັນອະດີດນັກສຶກສາຂອງຄະນະ ວິທະຍາສາດປ່າໄມ້, ພາກວິຊາຈັດສັນ-ຄຸ້ມຄອງປ່າໄມ້ ເຊິ່ງປັດຈຸບັນ, ໄດ້ເຮັດວຽກກັບບໍລິສັດເອກະຊົນທີ່ມີວິໃສທັດເລື່ອງຄວາມຍືນຍົງຂອງປ່າໄມ້ ແລະ ລາວເອງກໍມີແຮງບັນດານໃຈຈາກສິ່ງທີ່ເຮັດຢູ່ຫຼາຍ ພ້ອມທັງໄດ້ຜັນໂຕໄປເປັນນັກສ້າງເນື້ອຫາສາຍທ່ອງທ່ຽວ (Travel Content Creator).

ຈຸດເລີ່ມຕົ້ນ ແລະ ຄວາມຫຼົງໃຫຼໃນການສ້າງເນື້ອຫາວິດີໂອ

ຕ້ອມ ໄດ້ນຳຈຸດເລີ່ມຕົ້ນເລື່ອງລາວສະໄໝຍັງນ້ອຍຂອງລາວມາເລົ່າສູ່ ມ່ວນ ຟັງ ເຖິງຄວາມຮູ້ສຶກການຫຼົງໃຫຼໃນການສ້າງເນື້ອວິດີໂອ ແລະ ສິ່ງທີ່ປະກອບເຮັດໃຫ້ເປັນລາວໃນໃນປັດຈຸບັນ.

ຕ້ອມ ເລີ່ມຕົ້ນເລົ່າກ່ຽວກັບໄວເດັກຂອງລາວວ່າ “ຂໍເລົ່າກັບໄປຕັ້ງແຕ່ຊ່ວງທີ່ເປັນນັກສຶກສາ ຫຼື ຕອນທີ່ຍັງນ້ອຍກວ່ານັ້ນ, ຂ້ອຍເປັນຄົນໜຶ່ງທີ່ຫຼົງໃຫຼໃນເລື່ອງສິລະປະຢູ່ປະມານໜຶ່ງ ທັງຮູບແຕ້ມ, ດົນຕີ ລວມເຖິງການຖ່າຍພາບ ແລະ ການສ້າງສື່ພາບເຄື່ອນໄຫວ. ວິດີໂອທຳອິດທີ່ສ້າງ, ຂ້ອຍຈື່ມັນໄດ້ດີມາໂດຍຕະຫຼອດ”.

“ຈຸດເລີ່ມຕົ້ນຂອງເລື່ອງນີ້, ແມ່ນໄດ້ເກີດຂຶ້ນຕອນມັດທະຍົມປາຍ ເຊິ່ງໃນຕອນນັ້ນຂ້ອຍກຳລັງຮຽນຢູ່ ມ.5 (2015) ແລະ ວິດີໂອທຳອິດທີ່ຂ້ອຍຖ່າຍແມ່ນກ່ຽວກັບບັນຍາກາດຫ້ອງຮຽນ-ກິດຈະກຳຕ່າງໆທີ່ເກີດຂຶ້ນກັບໝູ່, ຂ້ອຍນຳມັນມາຕັດຕໍ່ໃສ່ກັບເພງດ້ວຍໂທລະສັບມືຖື ແລະ ຕອນນັ້ນໂທລະສັບຂອງຂ້ອຍໃຊ້ແມ່ນ Nokia N72 ພຽງເທົ່ານັ້ນ” ຕ້ອມ ກ່າວ. 

ໃນສ່ວນຂອງການຕັດຕໍ່ພື້ນຖານ ຕ້ອມ ໄດ້ຮຽນຮູ້ມາຈາກປະສົບການມາຕັ້ງແຕ່ຕອນນັ້ນຈົນຮຽນຈົບມະຫາວິທະຍາໄລ. ຫຼັງຈາກລາວໄດ້ເຮັດວຽກພ້ອມຕັ້ງໃຈໂຮມເງິນເພື່ອຊື້ກ້ອງໂຕທຳອິດ ເຊິ່ງໃນເວລານັ້ນ, ໃນຄວາມຄິດລາວກໍພຽງແຕ່ຢາກໄດ້ມາຖ່າຍພາບ ແລະ ບັນທຶກຊ່ວງເວລາຊີວິດຂອງໂຕເອງໄວ້.

ແຕ່ພໍໄດ້ກ້ອງມາແລ້ວນັ້ນ, ດ້ວຍຄວາມທີ່ລາວເປັນຄົນທີ່ຢູ່ຫຼັງກ້ອງ ການທີ່ຈະມີຮູບຖ່າຍໂຕເອງຄືເປັນເລື່ອງທີ່ເກີດຂຶ້ນໄດ້ໜ້ອຍຫຼາຍ ແລະ ຮູບທີ່ໄດ້ຖ່າຍສ່ວນໃຫຍ່ກໍຈະເປັນສະຖານທີ່ຕ່າງໆທີ່ເຄີຍໄປຄື ສະຖານທີ່ທ່ອງທ່ຽວ, ບ້ານນັ້ນ-ເມືອງນີ້ ເຊິ່ງມັນຫຼາຍຈົນເຮັດໃຫ້ບໍ່ມີພື້ນທີ່ທີ່ຈະເກັບຄວາມຊົງຈຳເຫຼົ່ານັ້ນໄວ້.

ຕ້ອມ ກໍໄດ້ຈັດເກັບຄວາມຊົງຈຳດີໆໄວ້ຄືການອັບໂຫຼດໄວ້ເທິງ Platform Online ໃນຊື່ tomotom (ຕ້ອມ-ໂອ-ຕ້ອມ) ທີ່ມາຈາກຊື່ຂອງລາວເອງ ທີ່ອີງຈາກເຄົ້າເກົ່າຄືຕ້ອມ (Tom) ແລະ ນຳອັກສອນໂຕໂອ (O) ເຂົ້າມາຂັ້ນກາງ ເພື່ອຢາກໃຫ້ຕ່າງຈາກຄຳວ່າຕ້ອມທົ່ວໄປທີ່ເຫັນໄດ້ຫຼາຍ-ເຫັນໄດ້ງ່າຍ ທັງໃນບ້ານເຮົາ ແລະ ຕ່າງປະເທດ ຈຶ່ງອອກມາເປັນ tomotom ທີ່ທຸກຄົນໄດ້ຮູ້ຈັກກັນ.

ຈຸດປ່ຽນທີ່ສຳຄັນໃນການເປັນຄອນເທັນສາຍທ່ອງທ່ຽວ

“ຂ້ອຍຢາກປະສານສິ່ງທີ່ເປັນວຽກ ແລະ ຊີວິດຮ່ວມເຂົ້າກັນ, ຕາມທີ່ເລົ່າໄປກ່ອນໜ້ານີ້ວ່າ ຂ້ອຍເຮັດວຽກປະຈຳນຳເອກະຊົນທີ່ກ່ຽວກັບການອະນຸຮັກສິ່ງແວດລ້ອມ ແລະ ການທີ່ມີວຽກປະຈຳເຮັດມີລາຍຮັບທຸກໆເດືອນແບບທີ່ບໍ່ຕ້ອງລົງທຶນຫຍັງຫຼາຍນອກຈາກເວລາ ແຕ່ມັນກໍຕ້ອງແລກມາກັບການທີ່ບໍ່ໄດ້ຂີດຂຽນເລື່ອງລາວທີ່ໜ້າຈື່ຈຳຂອງຊີວິດໂຕເອງໄວ້ໄດ້ ຈຶ່ງເລືອກທີ່ຈະຜັນໂຕເປັນນັກສ້າງເນື້ອຫາສາຍທ່ອງທ່ຽວ” ຕ້ອມ ກ່າວ.

ເອກະລັກ ແລະ ຮູບແບບການສື່ສານໃນແບບ tomotom

ເອກະລັກສ່ວນໂຕຂອງ ຕ້ອມ ແມ່ນການທີ່ໄດ້ນຳສະເໜີຄວາມງົດງາມຂອງສະຖານທີ່ທ່ອງທ່ຽວຕ່າງໆ ໃນຮູບແບບການເລົ່າສູ່ຟັງທີ່ມີເນຶ້ອຫາຂໍ້ມູນປະຫວັດຄວາມເປັນມາຂອງແຕ່ລະສະຖານທີ່ ເພີ່ມຕື່ມເຂົ້າໃນເລື່ອງລາວການທ່ອງທ່ຽວ ນອກເໜືອຈາກການໃສ່ເພງປະກອບທົ່ວໄປ.

ຕ້ອມ ເລົ່າເສີມກ່ຽວກັບຄວາມປະທັບໃຈ ແລະ ຈຸດປະສົງທີ່ຕັ້ງໃຈເຮັດເນື້ອຫາໃນສາຍທ່ອງທ່ຽວວ່າ:

ຂ້ອຍຄິດວ່າເປັນສິ່ງທີ່ດີ ທີ່ສາມາດເຮັດໃຫ້ຫຼາຍຄົນໄດ້ເຫັນພາບຄວາມງາມຢ່າງທີ່ຂ້ອຍເຫັນ ທັງຜູ້ທີ່ໄດ້ໄປ ແລະ ບໍ່ມີໂອກາດໄດ້ໄປ. ແຕ່ນອກຈາກຄວາມງາມທີ່ມີ ກໍຢາກໃຫ້ຄົນເບິ່ງໄດ້ຮັບຮູ້ເຖິງເລື່ອງລາວທີ່ກ່ຽວຂ້ອງກັບສະຖານທີ່ນັ້ນໆຫຼາຍຂື້ນເຊັ່ນດຽວກັນ.

ການວາງແຜນເດີນທາງ ແລະ ເລືອກສະຖານທີ່ທ່ອງທ່ຽວທີ່ໜ້າສົນໃຈ

ເວົ້າເຖິງການເດີນທາງ ກໍຕ້ອງມີການວາງແຜນໃຫ້ດີໆ ແລະ ຕ້ອມ ກໍໄດ້ມາແຊຣ໌ເຄັດລັບທີ່ລາວເຮັດໃຫ້ຟັງວ່າ “ໃນການວາງແຜນເດີນທາງຕອນນີ້ ຂ້ອຍຍັງເຮັດແບບເກົ່າຕາມທີ່ລຶ້ງເຄີຍເລີຍກໍຄື ການສ້າງແຜນທີ່ທີ່ຈະເດີນທາງ ໂດຍສົມມຸດວ່າ ການອອກເດີນທາງເທື່ອນີ້ ຂ້ອຍຈະໄປຈັກສະຖານທີ່, ກໍຈະຄຳນວນຫາໄລຍະທາງທີ່ຈະຕ້ອງໄປ, ຕ້ອງໃຊ້ເວລາເທົ່າໃດ, ກຽມງົບທີ່ຕ້ອງໃຊ້ ແລະ ກຽມພື້ນທີ່ຄວາມຈຳ (Memory Card) ໃຫ້ພໍຕໍ່ການອອກເດີນທາງເທື່ອໜຶ່ງ ເພື່ອບໍ່ໃຫ້ເກີດຄວາມຜິດພາດທີ່ຈະບັນທຶກສະຖານທີ່ນັ້ນໆ”.

“ການເລືອກສະຖານທີ່ສ່ວນໃຫຍ່ ແມ່ນຈະອ້າງອີງຈາກສະຖານທີ່ຈາກກະຊວງຖະແຫຼງຂ່າວ ວັດທະນະທຳ ແລະ ການທ່ອງທ່ຽວ ທີ່ເພີ່ນໄດ້ກຳນົດສະຖານທີ່ເຫຼົ່ານັ້ນໄວ້ວ່າ ເປັນສະຖານທີ່ທ່ອງທ່ຽວຂອງເມືອງປະເພດໃດ ທັງທາງດ້ານວັດທະນະທຳ, ທຳມະຊາດ ແລະ ປະຫວັດສາດ. ໃນສ່ວນຂອງສະຖານທີ່ທີ່ເປັນທຸລະກິດສ່ວນບຸກຄົນ ຖ້າເກີດວ່າງົດງາມ, ໂດດເດັ່ນ ແລະ ຂຶ້ນຊື່ລະດັບເມືອງ ຄູ່ຄວນທີ່ຈະນຳສະເໜີໃຫ້ຄົນເບິ່ງໄດ້ເຫັນ ກໍຈະພິຈາລະນາເຂົ້າຫາເພື່ອເຜີຍແຜ່ເນື້ອຫາໃນແບບທີ່ຂ້ອຍຖະໜັດ” ຕ້ອມ ກ່າວເສີມ.

ການສ້າງເນື້ອຫາຂອງ ຕ້ອມ ກໍເລີ່ມຈາກການຄົ້ນຄວ້າກ່ຽວກັບສະຖານທີ່ທ່ອງທ່ຽວນັ້ນໆ ທັງຈາກວາລະສານ, ບົດຄວາມ ລວມເຖິງການສອບຖາມຈາກຄົນທ້ອງຖິ່ນ ແລະ ຂໍ້ມູນຈາກສູນສະທິຕິແຫ່ງຊາດ ເພື່ອຄັດແຕ່ສິ່ງທີ່ກ່ຽວຂ້ອງມານຳສະເໜີຮ່ວມກັບສະຖານທີ່ທ່ອງທ່ຽວ.

ອຸປະສັກ ທີ່ໄດ້ພົບໃນການເຮັດເນື້ອຫາສາຍທ່ອງທ່ຽວ

ສິ່ງທີ່ເປັນອຸປະສັກທີ່ ຕ້ອມ ໄດ້ພົບໃນການເຮັດເນື້ອຫາສາຍທ່ອງທ່ຽວໃນຕອນນີ້ ຄືການບໍລິຫານ ຫຼື ການຈັດການໄຟລ໌ວິດີໂອ (Footage) ທັງພາບນິ້ງ ແລະ ວິດີໂອທີ່ໄດ້ຖ່າຍໃນແຕ່ລະການເດີນທາງ ເຊິ່ງໃນການຜະລິດໜັງອາດຈະຮ່າງເປັນ Storyboard (ການວາງແຜນການເລົ່າເລື່ອງໃນຮູບແບບທີ່ອ້າງອີງຈາກພາບ) ເພື່ອຖ່າຍແຕ່ລະສາກຕາມແບບ.

ຕ້ອມ ເລົ່າກ່ຽວກັບອຸປະສັກທີ່ເຈິ ແລະ ຍັງເປັນສິ່ງທີ່ຍັງຈັດການບໍ່ໄດ້ສຳລັບລາວວ່າ “ສຳລັບສາຍທ່ອງທ່ຽວທີ່ ຂ້ອຍ ເຮັດຢູ່ ແມ່ນບໍ່ຮູ້ວ່າຈະໄປພົບເຈິຫຍັງແດ່ໃນແຕ່ລະສະຖານທີ່ທີ່ຈະໄປ ແຮງເປັນບ່ອນທີ່ບໍ່ເຄີຍໄປມາກ່ອນ, ການເຮັດແຜນຖ່າຍລ່ວງໜ້າເປັນຫຍັງທີ່ໃຊ້ໄດ້ໜ້ອຍອີ່ຫຼີ, ການທີ່ພົບຜູ້ຄົນ ບົດສົນທະນາທີ່ຈະມາໃນຮູບແບບໃດ-ຕອນໃດກໍບໍ່ຮູ້, ເຮັດໃຫ້ໄຟລ໌ວິດີໂອທີ່ໄດ້ມາຫຼາຍກວ່າທີ່ຄິດໄວ້ ຈຶ່ງຍັງເປັນອີ່ຫຍັງທີເຮັດໃຫ້ຮູ້ສຶກຫຍຸ້ງຍາກຢູ່ຫຼາຍຕອນນີ້. ແຕ່ກໍບໍ່ແນ່, ໃນອະນາຄົດອາດຈະລອງຮ່າງແຜນຖ່າຍທຳລອງເບິ່ງ”.

ສິ່ງທີ່ທ້າທາຍໃນການເປັນ Content Creator ສາຍທ່ອງທ່ຽວ

ສິ່ງທ້າທາຍທີ່ ຕ້ອມ ເຈິ ບໍ່ແມ່ນພຽງແຕ່ກັບລາວເອງ ແຕ່ບັນດານັກສ້າງເນື້ອຫາໃນລາວກໍຕົກຢູ່ໃນສະຖານະດຽວກັນ ເພາະມັນເປັນສິ່ງທີ່ຍາກກວ່າການຫາຖານຄົນເບິ່ງໃນປະເທດລາວກໍຄື ການບໍ່ສາມາດເປີດຮັບການສ້າງລາຍໄດ້ໂດຍກົງຈາກການຜະລິດສື່ວິດີໂອໂດຍສະເພາະ Facebook ທີ່ຍອດຊົ່ວໂມງມີຄົນເບິ່ງຂຶ້ນຫຼາຍຫຼັກໝື່ນ-ຫຼັກແສນ ແຕ່ກໍບໍ່ສາມາດປ່ຽນເປັນລາຍໄດ້ ແລະ ມັນເປັນຫຍັງທີ່ໜ້າເສຍດາຍຫຼາຍໃນຕອນນີ້.

ແຕ່ກໍມີບາງ Platform ທີ່ສາມາດສ້າງໄດ້ໂດຍກົງແຕ່ຖານຄົນເບິ່ງສ່ວນໃຫຍ່ແມ່ນຕ່າງປະເທດ. ລາຍຮັບສ່ວນໃຫຍ່ໃນສາຍນີ້ມີຜູ້ສະໜັບສະໜຸນ ເຊິ່ງຈະເຂົ້າມາຕອນໃດກໍບໍ່ຮູ້, ການທີ່ຈະຝາກຊີວິດກັບສາຍນີ້ເປັນສິ່ງທີ່ຍັງສ່ຽງ ແລະ ທ້າທາຍຢູ່ຫຼາຍສຳລັບລາວ.

ຊ່ວງເວລາທີ່ຮູ້ສຶກເມື່ອຍ ແລະ ທໍ້ໃຈ

ພໍເວົ້າເຖິງເປົ້າໝາຍທີ່ ຕ້ອມ ໄດ້ເຮັດມາ, ຫຼາຍຄົນກໍອາດຈະຮູ້ສຶກວ່າມັນເປັນສິ່ງທີ່ອາດຈະບໍ່ມີຫຍັງດອກ ເບິ່ງຄືລາວມີຄວາມສຸກດີ, ແຕ່ໃນເວລາດຽວກັນກໍອາດຈະບໍ່ຮູ້ໄດ້ວ່າ ຕ້ອມ ກໍມີຊ່ວງເວລາທີ່ຮູ້ສຶກເມື່ອຍ ແລະ ທໍ້ໃຈໃນການເຮັດເນື້ອຫາສາຍທ່ອງທ່ຽວບໍ່ຕ່າງຈາກນັກສ້າງເນື້ອຫາສາຍອື່ນໆເລີຍ.

“ການທີ່ຖານຄົນເບິ່ງອາດຈະບໍ່ສູງ ແລະ ຄົນໆໜຶ່ງຈະເສຍເວລາມາເບິ່ງຂ້ອຍທ່ຽວ ເປັນຫຍັງທີ່ຈິນຕະນາການອອກຍາກອີ່ຫຼີສຳລັບຂ້ອຍຕອນນີ້ ເພາະປະເທດເຮົາມີຈຳນວນໂຕເລກປະຊາກອນບໍ່ສູງຖ້າທຽບໃສ່ປະເທດເພື່ອນບ້ານອ້ອມຂ້າງ. ຖ້າເກີດວ່າ Keyword (ຄຳຄົ້ນຫາທີ່ຜູ້ໃຊ້ອິນເຕີເນັດໃຊ້ຄົ້ນຫາໃນອອນລາຍແພລັດຟອມ) ເຮົາບໍ່ດີ, ການຖືກຄົ້ນພົບແຮງຈະໜ້ອຍລົງ ແລະ ມັນກໍສົ່ງຜົນເຖິງຄົນທີ່ເຮັດສື່ບັນເທີງອອນລາຍຫຼາຍໆຄົນ ບໍ່ແມ່ນມີແຕ່ສາຍທ່ອງທ່ຽວທີ່ຫັນໄປໃຊ້ພາສາເພື່ອນບ້ານເພື່ອຖານຄົນເບິ່ງທີ່ສູງຂຶ້ນ” ຕ້ອມ ກ່າວ.

ປະສົບການທີ່ບໍ່ຄາດຝັນໃນການເດີນທາງ

ຕ້ອມ ໄດ້ເລົ່າໃຫ້ ມ່ວນ ຟັງສິ່ງທີ່ລາວມັກຈະເຈິໃນການອອກເດີນທາງ “ສຳລັບຂ້ອຍແລ້ວ, ເຫດການທີ່ບໍ່ຄາດຝັນໃນລະຫວ່າງການເດີນທາງຕອນນີ້ ຍັງເປັນສະພາບເສັ້ນທາງທີ່ບໍ່ສາມາດພາເຮົາໄປບ່ອນທີ່ຢາກໄປໄດ້ ໂດຍສະເພາະໃນຊ່ວງທີ່ເງື່ອນໄຂສະພາບອາກາດບໍ່ເປັນໃຈເຊັ່ນ ‘ຝົນຕົກ’ ເສັ້ນທາງທີ່ເຮົາໝັ້ນໃຈ ແລະ ວາງແຜນໄວ້ວ່າໄປໄດ້ ແຕ່ກໍຕ້ອງຖືກຍົກເລີກ ເຮັດໃຫ້ໄດ້ປັບແຜນລະຫວ່າງການເດີນທາງ ຫຼື ອາດຈະເຮັດໃຫ້ໄລຍະທາງອີກຫຼາຍກິໂລແມັດທີ່ເດີນທາງໄປເສຍລ້າ”.

ສະຖານທີ່ທ່ອງທ່ຽວທີ່ປະທັບໃຈທີ່ສຸດ ແລະ ຕ້ອງກັບໄປອີກແນ່ນອນ

“ສ່ວນໂຕຂ້ອຍ, ຕອນນີ້ຍັງຍົກໃຫ້ເປັນສະຖານທີ່ທ່ອງທ່ຽວທາງທຳມະຊາດຂອງແຂວງອັດຕະປື ທີ່ ເຊປອງໄລ. ຢ່າງທີ່ເລົ່າໄປກ່ອນນໜ້ານີ້ວ່າ ພື້ນຖານຂ້ອຍແມ່ນຢູ່ສະຫວັນນະເຂດ ແລະ ນ້ຳຕົກຂອງແຂວງທີ່ໄປເບິ່ງງ່າຍແມ່ນຫາໄດ້ຍາກ, ການທີ່ໄດ້ມາພົບນ້ຳຕົກເຊປອງໄລທີ່ໃຫຍ່ແບບນັ້ນຍັງເປັນຊ່ວງເຫດການທີ່ປະທັບໃຈບໍ່ລືມ. ກ່ອນໜ້າໄດ້ແຕ່ຖ່າຍຮູບໄວ້ ແຕ່ຖ້າມີໂອກາດໄດ້ກັບໄປອີກເທື່ອ ອາດຈະໄດ້ເຫັນເປັນງານວິດີໂອມາເຜີຍແຜ່ໃຫ້ເບິ່ງນຳກັນອີກ” ຕ້ອມ ເລົ່າດ້ວຍຄວາມປະທັບໃຈ.

ຄວາມແຕກຕ່າງຂອງການທ່ຽວແບບສ່ວນໂຕ ແລະ ການທ່ຽວເພື່ອເຮັດ Content

“ທ່ຽວແບບສ່ວນໂຕຮູ້ສຶກວ່າມັນສະບາຍກວ່າຫຼາຍ ເພາະພຽງແຕ່ເປັນການຫຼິ້ນ, ກິນ, ທ່ຽວ ຫຼື ຖ່າຍຮູບ ພຽງສ່ຳນັ້ນ. ພໍຕ້ອງໄດ້ເຮັດເປັນວຽກ, ມັນໜັກຂຶ້ນຄ້າຍຄືການອອກກອງຖ່າຍໜັງນອກສະຖານທີ່ຢູ່ຕະຫຼອດ ແຕ່ກໍດີຢູ່ທີ່ບ່ອນໄດ້ຄົ້ນຫາຂໍ້ມູນສະຖານທີ່ ເຮັດໃຫ້ຮັບຮູ້ເລື່ອງລາວກ່ຽວກັບບ່ອນທີ່ໄປຫຼາຍຂຶ້ນກວ່າການໄປທ່ຽວແບບສ່ວນໂຕ” ຕ້ອມ ກ່າວ.

ຕ້ອມ ຍັງເລົ່າເສີມກ່ຽວກັບແຜນການທີ່ຈະອອກໄປທ່ຽວນອກປະເທດວ່າ “ສະຖານທີ່ທ່ອງທ່ຽວຂອງຕ່າງປະເທດຍັງບໍ່ມີໃນຫົວຫຼາຍເທື່ອ ແຕ່ຖ້າໄປໄດ້ກໍຢາກໄປໜຶ່ງໃນສະຖານທີ່ມໍດົກໂລກຈາກ UNESCO ຂອງປະເທດອີຕາລີ ທີ່ ປອມເປອີ (Pompeii). ຢາກໄປເຫັນເມືອງໂຣມັນບູຮານທີ່ເຄີຍຮຸ່ງເຮືອງເມື່ອ 2000 ປີກ່ອນ, ເມືອງເກົ່ານັ້ນໄດ້ຖືກໄພທໍາມະຊາດຢ່າງເຖົ່າຖ່ານພູເຂົາໄຟທັບຖົມແບບກະທັນຫັນ”.

ເປົ້າໝາຍ ຫຼື ສິ່ງທີ່ຝັນທີ່ຢາກປະສົບຜົນສຳເລັດຂອງ tomotom

ກ່ອນທີ່ຈະຈົບບົດສຳພາດນີ້ໄປ ມ່ວນ ກໍໄດ້ຖາມເຖິງເປົ້າໝາຍຂອງ ຕ້ອມ ວ່າໃນອະນາຄົດລາວມີແຜນແນວໃດຕໍ່ໄປແດ່? ເຊິ່ງລາວກໍໄດ້ແບ່ງປັນໃນສິ່ງທີ່ລາວຄິດໃຫ້ຟັງວ່າ “ຂ້ອຍຢາກອອກເດີນທາງໃຫ້ໄດ້ 148 ເມືອງ ທົ່ວປະເທດລາວ ພ້ອມທັງການໄດ້ແບ່ງປັນປະສົບການທີ່ດີເຫຼົ່ານັ້ນໃຫ້ທຸກຄົນໄດ້ເຫັນນຳກັນ ບໍ່ວ່າຈະເປັນສະຖານທີ່ທ່ອງທ່ຽວຂອງເມືອງນັ້ນໆ ຫຼື ເລື່ອງລາວຕ່າງໆ, ເລື່ອງເລົ່າທີ່ໜ້າສົນໃຈຕ່າງໆຂອງແຕ່ລະເມືອງ” .

ຕ້ອມ ເລົ່າເສີມຕໍ່ອີກວ່າ “ການເວົ້າສິ່ງນີ້ໃນຕອນນີ້, ອາດເປັນສິ່ງທີ່ໄກໂຕເກີນໄປ ແລະ ອາດຈະໃຊ້ເວລາຫຼາຍປີ ແຕ່ການເລີ່ມເທື່ອລະໜ້ອຍກໍເປັນສິ່ງທີ່ດີ ເຊິ່ງຕອນນີ້ຂ້ອຍກໍໄປມາແລ້ວ 6 ຕົວເມືອງ (ເຫຼືອພຽງ 2 ເມືອງ ກໍໄປຄົບ 1 ແຂວງທີ່ ສາລະວັນ) ຖືວ່າສາມາດບັນລຸໄດ້ແລ້ວ 4.05% ໃນ 148 ເມືອງທົ່ວປະເທດ. ເຮັດໃຫ້ມັນໃກ້ຫຼັກກິໂລແມັດທີ່ຂ້ອຍຕັ້ງໄວ້ຕື່ມອີກກ້າວໜຶ່ງ”.

“ໃນອະນາຄົດ, ຂ້ອຍຢາກເລີ່ມເດີນທາງຈາກປະເທດໂຕເອງກ່ອນ ຖ້າເກີດວ່າການເຮັດວຽກສາຍນີ້ສາມາດປະຄອງຊີວິດໂຕເອງໄດ້ ຈຶ່ງຈະຄ່ອຍເລີ່ມອອກເດີນທາງໃນຕ່າງປະເທດຕໍ່” ຕ້ອມ ກ່າວປິດທ້າຍ.