ຈີນ່າ ແຊຣ໌ປະສົບການຕິດຢູ່ໃນບົດບາດທີ່ສະແດງ ຕົວລະຄອນ ເນດ ໃນສຸກໃຈ It’s Okay the series
ມື້ນີ້ມ່ວນຈະພາມາຮູ້ຈັກກັນໃຫ້ຫຼາຍຂຶ້ນກັບນັກສະແດງສາວ “ທິດາວັນ ອຸດົມວິໄລ ຫຼື ຈີນ່າ” ປັດຈຸບັນ ອາຍຸ 23 ປີ, ຮັບບົດເປັນ ເນດ ໃນເລື່ອງ ສຸກໃຈ It’s Okay the series. ຈີນ່າ ຖືວ່າເປັນອີກຄົນໜຶ່ງທີ່ມີຄວາມສາມາດຫຼາກຫຼາຍເພາະລາວເປັນທັງນັກສະແດງ, ນັກຮ້ອງປະຈຳຮ້ານ Berlin, ພາສາລາວ,ໂກດັງ ແລະ ຍັງເຮັດວຽກປະຈຳຢູ່ທີ່ Hope Vison Laos.
ບົດບາດຕົວລະຄອນ ເນດ ທີ່ຈີນ່າໄດ້ສະແດງແມ່ນຖືກກົດດັນຈາກຜູ້ເປັນພໍ່ໃນເລື່ອງຂອງການຮຽນ, ຕ້ອງເສັງເອົາທຶນພື່ອໄປຮຽນຕໍ່ຕ່າງປະເທດໃຫ້ໄດ້ຕາມຄວາມຄາດຫວັງຂອງພໍ່ ແລະ ໃນເລື່ອງນັ້ນລາວກໍໄດ້ຮັບບົດສະແດງເປັນຄົນທີ່ມີສະພາວະຂອງໂລກຊຶມເສົ້າ.
ພໍຈີນ່າຮູ້ວ່າໄດ້ຖືກເລືອກໃຫ້ສະແດງບົດບາດນີ້ກໍມີວິທີກຽມຕົວໃນການຮັບບົດບາດຂອງຄົນເປັນໂລກຊຶມເສົ້າໂດຍການໄດ້ເຮັດວຽກບ້ານເລີ່ມທີ່ຈະຫາເບິ່ງຊີຣີສ໌, ອະນິເມຊັ່ນຂອງຕ່າງປະເທດກ່ຽວກັບສຸຂະພາບຈິດ ແລະ ພະຍາຍາມເຂົ້າໃຈໂຕລະຄອນເນດວ່າ: “ຖ້າຈີ່້ນ້າເປັນເນດເອງນັ້ນຈີນ້າຈະຮູ້ສຶກແນວໃດ?”
ມັນເປັນໂອກາດທີ່ດີ ແລະ ທີ່ ຈີນ່າ ໄດ້ສະແດງບົດນີ້ເພາະຈີນ່າເຊື່ອວ່າຕົວເອງນັ້ນກໍອາດຈະເປັນຄົນໜຶ່ງທີ່ມີສະພາວະຊຶມເສົ້າ, ເຊິ່ງມີມາຕັ້ງແຕ່ກ່ອນສະແດງເກືອບ 2 ປີ ແຕ່ບໍ່ເຄີຍໄປກວດເທື່ອແຕ່ເຊື່ອວ່າມີເພາະກໍມັກສັງເກດອາລົມຕົວເອງ, ບາງເທື່ອກໍເກີດການຄວບຄຸມໄດ້ ແລະ ບາງເທື່ອກໍຄວບຄຸມບໍ່ໄດ້.
“ ການທີ່ໄດ້ຮັບບົດບາດນີ້, ຈີນ່າກໍຄິດວ່າມັນເປັນໂອກາດທີ່ຈະໄດ້ຖ່າຍທອດມັນອອກໄປ, ແລ້ວທຸກສິ່ງທຸກຢ່າງທີ່ຮູ້ສຶກຄຽດ, ຮູ້ສຶກບໍ່ດີຜິດຫວັງເສຍໃຈ ແລະ ຄິດຫຼາຍ ເຮົາຈະຂໍຝາກໄວ້ກັບຕົວລະຄອນນີ້ບໍ່ໃຫ້ຫຼົງເຫຼືອໄວ້ກັບຕົວຈີນ່າເລີຍຫຼັງຈາກສະແດງຈົບສາກການ ‘ຂ້າຕົວຕາຍຂອງເນດ’. ພໍຈີນ່າກັບຮອດບ້ານກໍມີຊ່ວງໜຶ່ງທີ່ຄິດຢາກຈະເຮັດແບບເນດແທ້ທັງໆທີ່ເປັນຄົນທີ່ຫົວເດັດຕີນຂາດກະຊິບໍ່ຍອມຄິດຂ້າຕົວເອງ.
ຈີນ່າ ບໍ່ເຄີຍຄິດເລີຍວ່າຊ່ວງເວລານັ້ນມັນຈະມີຄວາມຮູ້ສຶກໜຶ່ງທີ່ຖືກດຶງລົງໄປແລ້ວບອກຕົວເອງວ່າ ‘ຕາຍເບາະເລື່ອງຈະໄດ້ຈົບ’ ຮ່າງກາຍໄດ້ເຄື່ອນຕົວໄປຈັບຄັດເຕີແຕ່ມັນກໍເໝືອນມີສຽງຮ້ອງໃສ່ວ່າ ‘ບ້າຕີ້ ແນະ! ຮູ້ເດີ້ອັນນີ້ບໍ່ແມ່ນຈີນ່າ, ຈີນ່າບໍ່ແມ່ນຄົນແນວນີ້ບໍ່ໄດ້ຄິດແນວນີ້’ ແລ້ວກໍຄິດໃນໃຈຕໍ່ວ່າ ‘ເນດແມ່ນບໍ? ໂອເຄ ພໍແລ້ວ, ສະແດງຈົບແລ້ວເນາະຢູ່ໃນທີ່ຂອງເຈົ້າສະ ຂ້ອຍເຮັດໜ້າທີ່ຂ້ອຍເຕັມທີ່ໃຫ້ເຈົ້າພໍແລ້ວ ຂ້ອຍຂໍຊີວິດຂ້ອຍຄືນ’ “ ຈີນ່າໄດ້ເວົ້າກ່ຽວກັບຈິດໃຕ້ສຳນຶກໃນຊ່ວງໜຶ່ງທີ່ມີຕົວລະຄອນເນດວາບຂຶ້ນມາໃນຫົວ.
ການເລົ່າເລື່ອງກ່ຽວກັບໂລກຊຶມເສົ້າໃນໜັງ ຫຼື ຊີຣີສ໌ມັນມີຄວາມສຳຄັນຫຼາຍເພື່ອປູກຈິດສຳນຶກໃນສັງຄົມລາວເພາະມັນສາມາດສ້າງຄວາມເຫັນອົກເຫັນໃຈຂອງຄົນໃກ້ຊິດໄດ້ຫຼາາຍຂຶ້ນ, ເພາະການທີ່ມີພາບແສງສີສຽງອາລົມເລື່ອງລາວທີ່ສາມາດສື່ໃຫ້ເຫັນເລື່ອງລະອຽດອ່ອນພາຍໃນສັງຄົມຄອບຄົວ ແລະ ພາຍໃນໃຈທີ່ບາງຄັ້ງຕົວພວກເຮົາເອງໍອາດຈະບໍ່ຮູ້ທັນໃຈຂອງເຮົາເອງ, ມັນຊ່ວຍໃຫ້ພວກເຮົາໄດ້ກັບມາໃຫ້ຄວາມສຳຄັນຕັ້ງຄຳຖາມກັບຕົວເອງ ແລະ ຜູ້ອື່ນຄືນວ່າຈິດໃຈເຮົາ ແລະ ເຂົາຍັງໂອເຄແທ້ໆບໍ ຫຼື ທີ່ບອກວ່າໂອເຄຍ້ອນທີ່ຜ່ານມາບໍ່ໄດ້ຮັບຮູ້ວ່າມັນບໍ່ໂອເຄ.
ໃນຊີວິດປະຈໍາວັນເຈົ້າມັກເຮັດຫຍັງເພື່ອຜ່ອນຄາຍຈາກວຽກທີ່ເຄັ່ງຄຽດ ຫຼື ວິທີລົດອາການ ຫຼື ການອອກຈາກຕົວລະຄອນທີ່ຍັງຕິດຢູ່ໃນການສະແດງ?
ກິດຈະກຳໃນແຕ່ລະມື້ທີ່ຊ່ວຍຜ່ອນຄາຍຈາກການເຮັດວຽກຂອງຈີນ່າແມ່ນການຫຼິ້ນກັບແມວ, ການພັກຜ່ອນໃຫ້ພຽງພໍ, ການໄດ້ໂອ້ລົມກອດກັບຄົນທີ່ຮັກແພງ ແລະ ໄວ້ໃຈ. ສິ່ງສຳຄັນໃນການຫຼຸດອອກຈາກຕົວລະຄອນທີ່ຍັງຕິດຢູ່ໃນການສະແດງແມ່ນ “ໝັ່ນມີສະຕິ, ໝັ່ນເອີ້ນຊື່ໂຕເອງອອກມາ ແລະ ຄິດໃນໃຈສະເໝີວ່ານີ້ຄືຕົວເຮົາເອງຫ້າມໄປເອົາໃຜເຂົ້າມາເປັນເຮົາ, ເຮົາມີຄົນດຽວ ແລະ ເປັນຄົນແບບນີ້ ແທ້ບໍ ຫຼື ແບບນັ້ນ”. ຖ້າຈັບໄດ້ວ່າມັນບໍ່ແມ່ນຕົວເອງ, ຈີນ່າຈະເອີ້ນຊື່ຕົວເອງກັບມາ ແລະ ທວນຄືນກັບວ່າຕົວເອງເປັນຄົນແນວໃດ? ມັກກິນຫຍັງ? ມັກເຮັດຫຍັງ? ຢາກເປັນຫຍັງ?
ກິດຈະກຳທີ່ມັກເຮັດໃນເວລາວ່າງແມ່ນການອະນາໄມບ້ານ, ຟັງເພງ, ພອດແຄສ, ແຕ່ງກິນ, ພາແມວອອກໄປຍ່າງ, ການນອນພັກຜ່ອນ ແລະ ການໄດ້ອອກໄປໃຊ້ເວລາຫາກິດຈະກຳຫຼິ້ນກັບໝູ່ເພື່ອນ. ສ່ວນລາຍການທີ່ມັກເບິ່ງກໍມີ: Inside out ທັງ 2 ພາກ (animation), ຊີຣີສ໌ເກົາຫຼີ It’s okay to Not Be Okay (2020), The Gifted (ຊີຣີສ໌ໄທ).
ສຳລັບສະໄຕລ໌ການແຕ່ງຕົວທີ່ສື່ເຖິງຕົວຕົນແມ່ນຖືວ່າເປັນເລື່ອງຍາກທີ່ຈະບອກ ແລະ ຖ້າບໍ່ນັບເລື່ອງການແຕ່ງຕົວທີ່ຕ້ອງໃຫ້ກຽດສະຖານທີ່ກັບຖືກຕາມສະຖານະການ, ຈີນ່າເປັນຄົນທີ່ມັກຈະແຕ່ງຕົວແນວໃດກໍໄດ້ທີ່ເຮັດໃຫ້ຮ່າງກາຍຕົວເອງຮູ້ສຶກສະບາຍ ແລະ ຜ່ອນຄາຍທີ່ສຸດ.
ຖ້າມີເວລາວ່າງມື້ດຽວ ແລະ ກິດຈະກຳທີ່ຢາກເຮັດເພື່ອເພີ່ມຄວາມສຸກໃນຊີວິດໃນສິ່ງທຳອິດທີ່ຢາກຈະເຮັດແມ່ນ: ຢາກກັບບ້ານໄປກິນເຂົ້າຝີມືແມ່, ກັບໄປສູດກິ່ນຜັກດົມກິ່ນປາ, ແລ່ນຢູ່ທົ່ງນາ ແລະ ອາບນ້ຳສ້າງກາງເຕັ້ນເບິ່ງດາວຕອນກາງຄືນຢູ່ບ້ານ.
ສຸດທ້າຍແລ້ວ ຈີນ່າຢາກຝາກເຖິງໃຜທີ່ມັກຄິດວ່າຕົວເອງຢູ່ຄົນດຽວ ຢາກໃຫ້ລອງໄປເບິ່ງຊີຣີສ໌ “ສຸກໃຈ it’s okay the series’ “ ລອງເບິ່ງແລ້ວຈະຮູ້ວ່າເຈົ້າບໍ່ໄດ້ຢູ່ຄົນດຽວ ແລະ ຜົນງານໃນອະນາຄົດແມ່ນອາດຈະຍັງບໍ່ທັນມີຫຍັງພິເສດແຕ່ລອງເບິ່ງໄປນຳກັນອີກວ່າສາວຈີນ່າ ໃນອາຍຸ 23 ປີ ຜູ້ນີ້ທີ່ມັກຄົ້ນຫາຄວາມສາມາດ ແລະ ຕົວຕົ້ນໃນດ້ານຕ່າງໆຈະເປັນຫຍັງໄດ້ອີກນອກຈາກນັກສະແດງ, ນັກຮ້ອງ ແລະ ນັກແຕ້ມ.
ໂດຍ: ທີມບັນນາທິການ Muan