ການຮັກໃນສິ່ງໃດສິ່ງໜຶ່ງ ແລະ ສາມາດປ່ຽນມັນເປັນອາຊີບຫຼັກໃນການຫາລາຍໄດ້, ບໍ່ແມ່ນທຸກຄົນຈະສາມາດເຮັດມັນໄດ້ງ່າຍ ແຕ່ ເປ່ເລ້ (ຫຼາຍຄົນອາດຈະຮູ້ຈັກລາວໃນບົດບາດຂອງ Trainer Pele) ສາມາດເຮັດໄດ້ຍ້ອນໃຈຮັກ ແລະ ທຸ່ມເທໃນການອອກກຳລັງກາຍ ຈຶ່ງໃຊ້ເງິນທຶນທີ່ສະສົມມາທັງໝົດສ້າງເປັນສູນອອກກຳລັງກາຍທີ່ທັນສະໄໝ ເພື່ອຕອບສະໜອງຄວາມຕ້ອງການໃຫ້ແກ່ລູກຄ້າ.

ມື້ນີ້ ມ່ວນ ກໍຈະມາເລົ່າອີກດ້ານໜຶ່ງທີ່ຫຼາຍຄົນອາດຈະບໍ່ຮູ້ວ່າ Trainer Pele ຫຼື ເປ່ເລ້ – ວັນປະເສີດ ວົງມາລາດ (Vanpaseuth Vongmalath) ປັດຈຸບັນອາຍຸ 38 ປີ, ນອກຈາກມັກອອກກຳລັງກາຍເປັນຊີວິດຈິດໃຈແລ້ວ ຍັງເປັນຄົນທີ່ມັກອາຫານແບບລາວໆຫຼາຍ ບໍ່ວ່າຈະເປັນລາບ, ແກງ, ຕົ້ມໄກ່, ປີ້ງໄກ່ ແລະ ຕຳໝາກຮຸ່ງ ຖືວ່າເມນູເຫຼົ່ານີ້ແມ່ນເປັນອາຫານໃນດວງໃຈເລີຍກໍວ່າໄດ້.

ເປ່ເລ້ ໄດ້ເຮັດອາຊີບທີ່ຮັກຄືການເປັນ Personal trainer Gym & fitness ພ້ອມທັງເປັນເຈົ້າຂອງສູນອອກກຳລັງກາຍ Pele Fitness Club ທີ່ເປີດມາໄດ້ 7 ປີແລ້ວ ແລະ ຕັ້ງຢູ່ທີ່ຊັ້ນ 5 ໄອເຕັກມໍ. ເລື່ອງປະສົບການເທຣນອອກກຳລັງກາຍກໍຖືວ່າລາວມີປະສົບການມາຫຼາຍກວ່າ 10 ປີ ເຊິ່ງລາວກໍໄດ້ຖ່າຍທອດຄວາມຮູ້ ແລະ ແຮງບັນດານໃຈໃຫ້ກັບຜູ້ຄົນທຸກເພດທຸກໄວມາຫຼາຍຮ້ອຍຄົນແລ້ວ. ນອກຈາກການເທຣນ (trainer) ແລ້ວ, ລາວຍັງດູແລດ້ານການຈັດຫາເຄຶ່ອງອອກກຳລັງກາຍໃຫ້ແກ່ສະຖານທີ່ຕ່າງໆເຊັ່ນ: ສູນອອກກຳລັງກາຍ, ໂຮງແຮມ ແລະ ອາພາດເມັ້ນ ລວມເຖິງລູກຄ້າທີ່ຕ້ອງການຈັດມຸມອອກກຳລັງກາຍສ່ວນໂຕຢູ່ບ້ານ.

ສະຖານທີ່ປະຈຳຂອງ ເປ່ເລ້ ທີ່ຈະພົບໄດ້ສະເໝີ

ໃນເວລາວ່າງ ເປ່ເລ້ ກໍຈະບໍ່ເຮັດໃຫ້ເວລາເສຍໄປຫຼ້າໆ ເພາະລາວມັກທີ່ຈະພະຍາຍາມຊອກຫາເຄຶ່ອງອອກກຳລັງກາຍໃໝ່ໆ-ຄັກໆ ຊື້ມາໃຫ້ລູກຄ້າ Pele Fitness ຂອງລາວໄດ້ໃຊ້ງານຄືກັນກັບຕ່າງປະເທດໃຫ້ທັນຍຸກທັນສະໃໝໃນທຸກໆປີ ເພື່ອລູກຄ້າຈະບໍ່ເບື່ອ ແລະ ປ່ຽນໃຈໄປບ່ອນໃໝ່.

ພາບ: Trainer Pele

ສະຖານທີ່ປະຈຳທີ່ຈະສາມາດພົບເຫັນລາວໄດ້ຕະຫຼອດເວລານັ້ນກໍຄື Pele Fitness Club ນັ້ນເອງ ແລະ ລາວໄດ້ບອກກັບມ່ວນວ່າ: “ປົກກະຕິ ຂ້ອຍໄດ້ເຮັດວຽກເກືອບທຸກມື້ ຄິວແໜ້ນສຸດໆ, ແຕ່ກໍຈະໄດ້ພັກໃນບາງຄັ້ງຍ້ອນລູກຄ້າຂໍພັກ ແລະ ຈະພັກທຸກວັນເສົາ-ອາທິດ ເຊິ່ງມື້ທີ່ພັກນັ້ນກໍຈະຫາເວລາໄປເບິ່ງໜັງທີ່ມັກຢູ່ Major ຫຼື ໄປທ່ຽວສະຖານທີ່ມີທຳມະຊາດງາມໆກັບຄົນຮັກ” ເປ່ເລ້ ກ່າວ.

ຈຸດເລີ່ມຕົ້ນຂອງການເປັນ Trainer Gym

ເປ່ເລ້ ເປັນຄົນທີ່ມັກອອກກຳລັງກາຍມາແຕ່ນ້ອຍ ໂດຍກີລາທີ່ລາວມັກ ແລະ ເລີ່ມຫຼິ້ນທຳອິດກໍຄື ກີລາບານເຕະ, ພໍຫຼິ້ນກີລາປະເພດນີ້ໄປເລື້ອຍໆລາວກໍໄດ້ມາສັງເກດວ່າ ໂຕເອງຈ່ອຍຫຼາຍ ເມື່ອເຕະບານຕະຫຼອດ. ຫຼັງຈາກນັ້ນ, ລາວໄດ້ເບິ່ງໜັງ Superman ຫຼື Super-hero ຂອງຕ່າງປະເທດທີ່ພະເອກຫຼໍ່-ເທ່ ແລະ ຫຸ່ນດີ ເຮັດໃຫ້ລາວກໍ່ເກີດແຮງບັນດານໃຈ ເລີຍປ່ຽນມາອອກກຳລັງກາຍຢູ່ທີ່ Gym ໂດຍທີ່ໃຊ້ເວລາໃນການປັ້ນຫຸ່ນໂຕເອງເປັນເວລາຫຼາຍປີ ພ້ອມທັງຮຽນຮູ້ຈາກລຸ້ນອ້າຍ, ຮຽນຮູ້ຈາກ Trainer ມືອາຊີບຢູ່ຕ່າງປະເທດທີ່ໄປຮຽນຮູ້ມາ ແລະ ຮຽນຮູ້ຈາກສື່ອອນລາຍ.

ລາວໄດ້ສະສົມປະສົບການສອນມາຫຼາຍປີຈົນມີຖານລູກຄ້າປະຈຳ, ດ້ວຍຄວາມຮັກ ແລະ ມັກໃນການອອກກຳລັງກາຍຈຶ່ງທຸ່ມເທເອົາເງິນທີ່ສະສົມທີ່ມີທັງໝົດ ແລະ ຕັດສິນໃຈສ້າງ Pele Fitness Club ຂຶ້ນມາຕັ້ງແຕ່ປີ 2018 ຈົນຮອດປະຈຸບັນ 2025 ກໍຄົບຮອບ 7 ປີແລ້ວ.

ປຽບທຽບການອອກກຳລັງກາຍຢູ່ Gym ເປັນຈັງຫວະເພງທີ່ມັກ?

ຈາກສິ່ງທີ່ລາວໄດ້ເວົ້າມາຂ້າງເທິງນັ້ນ ເຮັດໃຫ້ ມ່ວນ ຮູ້ເລີຍວ່າລາວຮັກ ແລະ ຫຼົງໃຫຼໃນສາຍອາຊີບນີ້ຫຼາຍ. ມ່ວນ ເລີຍຖາມລາວຕື່ມວ່າ ຖ້າຫາກລອງປຽບທຽບການອອກກຳລັງກາຍຢູ່ Gym ເປັນເພງແມ່ນລາວຈະເລືອກຈັງຫວະແບບໃດ? ແລະ ລາວກໍໄດ້ຕອບວ່າ: “ແນ່ນອນ ຂ້ອຍຕ້ອງຄິດຮອດຈັງຫວະເພງໄວ ແລະ ຈັງຫວະຄຶກຄັກ ເພາະມັນຈະເຮັດໃຫ້ລູກຄ້າຢູ່ໃນ Gym Active ມີພະລັງໃນການອອກກຳລັງກາຍ ແລະ ບໍ່ເຫົງານອນ”.

ພາບ: Trainer Pele

Trainer ບໍ່ໄດ້ເປັນຕາຢ້ານຢ່າງທີ່ຄິດ?

“ມີຫຼາຍຄົນມັກຢ້ານເທຣນເນີ (trainer) ເພາະວ່າພວກເຂົາເຂັ້ມງວດສຸດໆແມ່ນບໍ? ສຳລັບຂ້ອຍເອງຂໍອີງຈາກປະສົບການສອນລູກຄ້າມາຫຼາຍຄິດວ່າ ເທຣນເນີກໍຄືກັບໝໍສັນຍະກຳຫຸ່ນທີ່ລູກຄ້າມາຫາເພຶ່ອຈະໃຫ້ແກ້ໄຂບັນຫາໃຫ້ ຊ່ວຍໃຫ້ພວກເຂົາຮອດເປົ້າໝາຍໄວຄືການຢາກຫຸ່ນດີ ແລະ ເທຣນເນີເເຕ່ລະຄົນກໍຈະຄິດບໍ່ຄືກັນ ເພາະບາງຄົນກໍຕ້ອງກົດເປັນກົດ, ຫ້າມມາຊ້າຫ້າມຂາດ ແລະ ຕ້ອງມີວິໄນເຮັດຕາມກົດລະບຽບທຸກຢ່າງ ເພາະຖ້າຢາກຫຸ່ນດີ, ລູກຄ້ານັດແລ້ວບໍ່ມາ ກາຍໂມງກໍໝາຍຂາດທັນທີ, ຖ້າມາຊ້າກາຍ 30 ນາທີ ກໍສອນພຽງແຕ່ 30 ນາທີ ໂດຍບໍ່ມີອ່ອນຂໍ້ໃຫ້ ພໍລູກຄ້າເຮັດບໍ່ໄດ້ຕາມທີ່ວາງແຜນໄວກໍຮ້າຍເວົ້າໃຫ້. ດັງນັ້ນ, ຈຶ່ງເຮັດໃຫ້ລູກຄ້າຢ້ານ ແລະ ອຶດອັດເວລາມາເທຣນນຳ ນັ້ນເອງ” ເປ່ເລ້ ກ່າວ.

ນອກຈາກນີ້, ລາວຍັງໄດ້ເລົ່າເສີມເພື່ອແບ່ງປັນໃຫ້ ມ່ວນ ຟັງວ່າ: “ສ່ວນໂຕຄິດວ່າ ການມີກົດລະບຽບວິໄນກໍດີຈະໄດ້ຮອດເປົ້າໝາຍໄວ ແຕ່ບາງຄັ້ງ, ຖ້າເຮົາເຂັ້ມງວດຈົນເກີນໄປກໍຈະເຮັດໃຫ້ລູກຄ້າຫຼາຍຄົນບໍ່ພໍໃຈ ແລະ ເຮັດຕາມກົດບໍ່ໄດ້ ເຊິ່ງອາດສົ່ງຜົນກະທົບທີ່ລູກຄ້າບໍ່ຄິດຈະເທຣນກັບຄົນນັ້ນອີກ. ສະນັ້ນ, ເຮົາຄວນໃຫ້ລູກສິດ ຫຼື ລູກຄ້າປັບປ່ຽນພຶດຕິກຳເທື່ອລະໜ້ອຍ ບໍ່ວ່າຈະເປັນການກິນ ຫຼື ການອອກກຳລັງກາຍ ເພຶ່ອໃຫ້ເຂົາເຈົ້າປັບໂຕໃຫ້ດີຂຶ້ນທຸກມື້ ເພາະແຕ່ລະຄົນມີອາຊີບ ແລະ ແຮງບໍ່ຄືກັນ, ການທີ່ລູກຄ້າຈະມາອອກກຳລັງກາຍຕໍ່ເນື່ອງໄດ້ຈົນຫຸ່ນດີຂຶ້ນນັ້ນ ມັນກໍຂຶ້ນກັບປະສົບການຂອງເທຣນເນີຄົນນັ້ນວ່າຈະໃຊ້ກົນລະຍຸດ ຫຼື ວິທີໃດໃຫ້ລູກຄ້າອອກກຳລັງກາຍຕໍ່ເນື່ອງຈົນຫຸ່ນດີໄດ້”.

ຄວາມທ້າທ້າຍ ແລະ ອຸປະສັກໃນການເທຣນຂອງ ເປ່ເລ້

ໃຜຈະຄິດວ່າ ເປ່ເລ້ ຈະມີລູກຄ້າທີ່ມີອາຍຸ 60 ປີ ມາເທຣນອອກກຳລັງກາຍກັບລາວ ເຊິ່ງ ມ່ວນ ເອງກໍແອບຕື່ນຕົກໃຈຢູ່ໜ້ອຍໜຶ່ງ ຫຼັງຈາກໄດ້ຍິນກ່ຽວກັບຄວາມທ້າທາຍນີ້ ໂດຍລາວໄດ້ເລົ່າໃຫ້ຟັງວ່າ:

ການເທຣນລູກຄ້າທີ່ສູງໄວອາຍຸປະມານ 60 ປີ ຂຶ້ນໄປ ແມ່ນໄດ້ທ້າທາຍຫຼາຍ, ເພາະມີໂລກປະຈຳໂຕ, ກະດູກທີ່ບໍ່ແຂງແຮງ ເຮັດໃຫ້ເວລາເທຣນຕ້ອງໃຊ້ປະສົບການ ແລະ ຕ້ອງເລືອກທ່າອອກກຳລັງກາຍທີ່ບໍ່ເຮັດໃຫ້ສ່ຽງຕໍ່ການເກີດອັນຕະລາຍ ເຮັດໃຫ້ກ້າມຊີ້ນຄ່ອຍໆແຂງແຮງ ແລະ ແໜ້ນຂຶ້ນບໍ່ຢ້ອນຍານ.

ເປ່ເລ້ ກ່າວເສີມຕໍ່ “ສິ່ງສຳຄັນທີ່ຂາດບໍ່ໄດ້ເລີຍຄືການການໃຫ້ກຳລັງໃຈຈົນກວ່າພວກເຂົາຈະຕິດ ແລະ ຢາກມາອອກກຳລັງກາຍເປັນປະຈຳດ້ວຍໂຕເອງ”.

ການອອກກຳລັງກາຍສຳລັບມືໃໝ່ທີ່ຢາກເຂົ້າ Gym

ສຳລັບມືໃໝ່ ຫຼື ຄົນທີ່ບໍ່ມີປະສົບການໃນການອອກກຳລັງກາຍທີ່ຢາກເຂົ້າ Gym, ຢາກໃຫ້ທຸກຄົນລອງຕັ້ງຄຳຖາມກັບໂຕເອງກ່ອນວ່າ ເຮົາຢາກໃຫ້ຫຸ່ນເຮົາເປັນແບບໃດ? ເປັນຄື ຫຸ່ນເທ່-ແບບນາຍແບບ, ຫຸ່ນນາງງາມ-ເຊັກຊີ ຫຼື ມັກຫຸ່ນໃຫຍ່ແບບນັກກີລາທີ່ມີກ້າມຊັດເຈນ. ຫຼັງຈາກທີ່ທຸກຄົນໄດ້ຄຳຕອບແລ້ວໃຫ້ຫາຂໍ້ມູນຕໍ່ຢູ່ໃນ YouTube ທີ່ເຮົາຢາກໄດ້ຫຸ່ນແບບນັ້ນ ຫຼື ໃຫ້ລອງຖາມ Chat GPT ທຸກຄົນຈະຮູ້ຄຳຕອບໃນດ້ານທິດສະດີ ແຕ່ສິ່ງທີ່ດີທີ່ສຸດຄືການຖາມຄູສອນອອກກຳລັງຢູ່ທີ່ Gym ວ່າມືໃໝ່ຄວນເລີ່ມຈາກການອອກລັງກາຍຫຍັງກອ່ນ.

“ຂ້ອຍ ຂໍແນະນຳໃຫ້ເລີ່ມຈາກການອົບອຸ່ນຮ່າງກາຍ (Warm-up), ຍ່າງຢູ່ເຄື່ອງແລ່ນໄຟຟ້າໃຫ້ຮ່າງກາຍອຸ່ນ ໂດຍການຍ່າງປະມານ 20-30 ນາທີ. ຫຼັງຈາກນັ້ນ, ໃຫ້ອອກກຳລັງກາຍກັບເຄື່ອງອອກກຳລັງກາຍອື່ນໆ ຈະດີທີ່ສຸດສຳລັບມືໃໝ່ ເພາະເຄື່ອງອອກກຳລັງກາຍອອກແບບມາຫຼິ້ນງ່າຍໆ ແລະ ປອດໄພ” ເປ່ເລ້ ກ່າວ.

ພາບ: Trainer Pele

ເປັນຫຍັງຕ້ອງອອກກຳລັງກາຍ?

ຄົນທົ່ວໄປມັກຕັ້ງຄຳຖາມວ່າ ຈ່ອຍແລ້ວໄປອອກກຳລັງກາຍເຮັດຫຍັງ? ເຊິ່ງຫຼາຍຄົນບໍ່ເຂົ້າໃຈ ແລະ ບໍ່ເຫັນເຖິງຄວາມສຳຄັນຂອງເລື່ອງນີ້ ເພາະຄວາມຈິງແລ້ວຄົນຈ່ອຍຕ້ອງການເພີ່ມກ້າມຊີ້ນໃຫ້ໃຫຍ່ ແລະ ແໜ້ນ. ຕົວຢ່າງ ຜູ້ຊາຍຈ່ອຍຮູບຮ່າງບາງ ມີຄວາມສູງ 170 cm, ນ້ຳໜັກ 50 kg ຊາຍຄົນນັ້ນອອກກຳລັງກາຍຢູ່ Gym ກໍເພື່ອຫວັງຢາກສ້າງກ້າມຊີ້ນໃຫ້ໃຫຍ່ຂຶ້ນ ແລະ ປ່ຽນແປງໂຕເອງໃຫ້ກາຍເປັນຄົນໃໝ່ ທີ່ ຫຸ່ນໃຫຍ່-ຫຸ່ນດີແຂງແຮງຂຶ້ນ ເຊິ່ງຕ້ອງໃຊ້ເວລາ 3-6 ເດືອນ ຫຼື 1 ປີ, ຈຶ່ງຈະເຫັນຄວາມແຕກຕ່າງວ່າກາຍເປັນຄົນລະຄົນ ໂດຍສະເພາະຜູ້ຍິງທີ່ຈ່ອຍ ສ່ວນຫຼາຍພວກເຂົາຕ້ອງການອອກກຳລັງກາຍໃຫ້ກົ້ນໃຫຍ່, ຫຸ່ນເຕັມ ຈະໄດ້ຫຸ່ນດີ-ເຊັກຊີ ແຕ່ຕ້ອງໃຊ້ເວລາ 6 ເດືອນຂຶ້ນໄປຈຶ່ງຈະເຫັນຜົນ.

“ເຄັດລັບການສ້າງແຮງບັນດານໃຈທີ່ຂ້ອຍແນະນຳໃຫ້ລອງ ເພື່ອສ້າງແຮງກະຕຸ້ນໃນການອອກກຳລັງກາຍຄື ການຕິດຮູບນາຍແບບ ຫຼື ນາງແບບທີ່ເປັນ idol ຂອງເຮົາ, ໃຫ້ຕິດຢູ່ໜ້າປະຕູຫ້ອງນອນ ຫຼື ຕິດຝາບ້ານ ເພາະຈະເຮັດໃຫ້ເຮົາເຫັນທຸກມື້ ແລະ ຊ່ວຍກະຕຸ້ນໃຫ້ເຮົາຢາກໄດ້ຫຸ່ນແບບ Idol ຂອງເຮົາ ເຊິ່ງມັນເປັນແຮງຊຸກດັນ ແລະ ແຮງຈູງໃຈທີ່ດີແກ່ທຸກຄົນ” ເປ່ເລ້ ກ່າວ.

ສຸຂະພາບເປັນສິ່ງທີ່ສຳຄັນຫຼາຍ

ມ່ວນ ໄດ້ລົມກັບ ເປ່ເລ້ ໄປເລື້ອຍໆ ພ້ອມທັງໄດ້ຕັ້ງຄຳຖາມເລື່ອງສຸຂະພາບວ່າ ມັນຈຳເປັນຫຼາຍເທົ່າໃດທີ່ຕ້ອງອອກກຳລັງກາຍ ແລະ ລາວກໍໄດ້ຕອບກັບທັນທີວ່າ: “ຂ້ອຍຢາກຝາກບອກຄົນທີ່ກຳລັງເລີ່ມຕົ້ນວ່າ ເວລາບໍ່ເຄີຍຖ້າໃຜ ສຸຂະພາບເຮົາກໍຄືກັນ ໃຫ້ເລີ່ມຕົ້ນການອອກກຳລັງກາຍໃນຕອນທີ່ເຮົາຍັງແຂງແຮງຈະດີທີ່ສຸດ ຈະໄດ້ບໍ່ເສຍໃຈໃນຕອນທີ່ຢາກອອກກຳລັງກາຍໃນຕອນທີ່ເຂົ້າໂຮງໝໍແລ້ວ, ການອອກກຳລັງກາຍຈະເຮັດໃຫ້ເຮົາອ່ອນໄວຂຶ້ນບໍ່ແກ່ໄວ ແລະ ສຸຂະພາບກໍຈະດີບໍ່ເຈັບປ່ວຍງ່າຍ ໃຫ້ທຸກຄົນເຊົາຫາຂໍ້ອ້າງວ່າບໍ່ມີເວລາ ຫຼື ສຸຂະພາບບໍ່ສຳຄັນພໍສຳລັບເຈົ້າ ໃຫ້ທຸກຄົນເລີ່ມອອກກຳລັງກາຍເລີຍໂດຍບໍ່ມີຂໍ້ອ້າງໃດໆທັງນັ້ນ”.

ພາບ: Trainer Pele

ຄວາມພູມໃຈທີ່ ເປ່ເລ້ ມີຕໍ່ກັບສິ່ງທີ່ຮັກ

ການເຮັດໃນສິ່ງທີ່ຮັກ ແລ້ວປະສົບຜົນສຳເລັດ ນອກຈາກຈະເຮັດໃຫ້ມີຄວາມສຸກແລ້ວມັນຍັງໄດ້ສ້າງຄວາມປະທັບໃຈໃຫ້ກັບຄົນອ້ອມຂ້າງທີ່ໄດ້ຟັງເລື່ອງລາວທັງໝົດ ແລະ ເປ່ເລ້ ກໍໄດ້ກ່າວເສີມຈາກທີ່ ມ່ວນ ໄດ້ຖາມກ່ຽວກັບຄວາມພູມໃຈທີ່ມີ.

ສິ່ງທີ່ເຮັດໃຫ້ຂ້ອຍຮູ້ສຶກພູມໃຈທີ່ສຸດແມ່ນສາມາດປ່ຽນສິ່ງທີ່ຮັກມາເປັນອາຊີບ ແລະ ເຮັດໃຫ້ມັນເປັນລາຍໄດ້ຫຼັກ ໂດຍສູນອອກກຳລັງກາຍ Pele Fitness Club ເຮັດໃຫ້ຂ້ອຍສາມາດລ້ຽງດູໂຕເອງ, ພໍ່-ແມ່ ແລະ ຄົນຮັກ ພ້ອມທັງສາມາດສ້າງສູນອອກກຳລັງກາຍເປັນຂອງໂຕເອງ.

“ສຸດທ້າຍ ຢາກບອກວ່າ ຂ້ອຍໄດ້ພະຍາຍາມຫຼາຍ ແລະ ເລີ່ມຕົ້ນມາຈາກການເປັນພະນັກງານທຳມະດາຄົນໜຶ່ງ, ກາຍເປັນເທຣນເນີ ແລ້ວຜັນໂຕມາເປັນເຈົ້າຂອງສູນອອກກຳລັງກາຍໃນປັດຈຸບັນ ເຊິ່ງເປັນທຸລະກິດທີ່ສ້າງຂຶ້ນມາຄົນດຽວໂດຍບໍ່ໄດ້ຮວ່ມທືນກັບຄົນອື່ນ” ເປ່ເລ້ ກ່າວປິດທ້າຍ.