ກຸຫຼາບປາກຊັນ ຊື່ນີ້ຫຼາຍຄົນຄົງຄຸ້ນຫູກັນດີ ເພາະຖືວ່າເປັນອີກຜົນງານໜຶ່ງທີ່ເປັນອຳມະຕະໃນຕຳນານເພງລາວ, ເພງນີ້ຖືກແຕ່ງຂຶ້ນໂດຍ ຈຳປາ ລັດຕະນະສະຫວັນ ຫຼື ນາມປາກກາ ສຸລິວັດ (ອາຈານ ຄຳພູ ທະວີວັນ) ແລະ ດ້ວຍເຫດຜົນທີ່ເພງນີ້ມີການໃຊ້ຄຳໃນເນື້ອຮ້ອງທີ່ສວຍງາມກິນໃຈ ເລີຍຖືກນຳໄປຮ້ອງຄືນໃໝ່ໃນຫຼາຍເວີຊັນທັງລາວ ແລະ ໄທ.
ອະທິບາຍມາຍາວແບບນີ້ແລ້ວ, ຫຼາຍຄົນຄົງເຂົ້າໃຈເຖິງທີ່ມາທີ່ໄປຂອງເພງ ກຸຫຼາບປາກຊັນ ໃນເວີຊັນຕົ້ນສະບັບກັນແລ້ວເນາະ ແລະ ມື້ນີ້ ມ່ວນ ຈະພາທຸກຄົນໄປຟັງເພງທີ່ມີຊື່ຄືກັນ ແຕ່ເນື້ອຫາບໍ່ຄືກັນເລີຍ, ນັ້ນກໍຄືເພງ Paksan Rose (ກຸຫຼາບປາກຊັນ) ທີ່ແຕ່ງ ແລະ ຮ້ອງໂດຍ GEMI9PK.
ເນື້ອຫາຂອງເພງນີ້ແມ່ນເລົ່າເຖິງຄວາມຮັກທີ່ບໍລິສຸດ ແລະ ມີແຕ່ຄວາມປາຖະໜາດີຈາກໃຈຈິງທີ່ສະແດງອອກມາໃຫ້ຍິງຄົນຮັກ ເຖິງລາວຕ້ອງການທີ່ຈະຢູ່ຄູ່ກັນກັບສາວງາມຄົນນັ້ນຫຼາຍເທົ່າໃດ ກໍຕ້ອງຝືນໃຈຍອມປ່ອຍໃຫ້ຄົນທີ່ຮັກໄປຢູ່ກັບຄົນອື່ນ ໂດຍບໍ່ຕ້ອງການຄອບຄອງ ເພາະຍ້ອນຄິດວ່າເຂົາຄົງມີຄວາມສຸກ ແລະ ມີອະນາຄົດທີ່ດີຂຶ້ນຖ້າໄດ້ໄປຢູ່ກັບຄົນທີ່ພ້ອມທີ່ຈະດູແລຫຼາຍກວ່າ.
ເພງນີ້ໄດ້ເລົ່າເຖິງມຸມມອງເລື່ອງລາວຄວາມຮັກທີ່ເຕັມໄປດ້ວຍຄວາມເສຍສະຫຼະຂອງຜູ້ຊາຍຄົນໜຶ່ງ ໂດຍການປຽບຄົນທີ່ຕົນຮັກເປັນດັ່ງ “ກຸຫຼາບທີ່ຢູ່ຕົວເມືອງປາກຊັນ” ທີ່ທັງງົດງາມ ແລະ ສູງຄ່າ, ສ່ວນຕົນເອງນັ້ນກໍເປັນພຽງ “ແມງໄມ້” ທີ່ພຽງແຕ່ບິນເຂົ້າໄປດົມກິ່ນຫອມຫວານ ແຕ່ບໍ່ສາມາດຄອບຄອງກຸຫຼາບດອກນັ້ນໄດ້.
GEMI9PK ໄດ້ຢືມຄຳວ່າ “ກຸຫຼາບ” ໃນເພງຕົ້ນສະບັບ ແລະ ຄຳວ່າ “ປາກຊັນ” ກໍໝາຍເຖິງຄວາມຮູ້ສຶກທີ່ມີຕໍ່ສາວປາກຊັນ ທີ່ເປັນແຮງບັນດານໃຈໃນການແຕ່ງເພງ ກຸຫຼາບປາກຊັນ ໃນແບບຂອງລາວເອງ.
ຫຼັງຈາກທີ່ ມ່ວນ ໄດ້ຟັງເພງນີ້ ແມ່ນຮູ້ສຶກວ່າຄວາມຮັກເປັນສິ່ງທີ່ຄາດເດົາບໍ່ໄດ້ ບໍ່ແມ່ນທຸກຄວາມສຳພັນຈະສົມຫວັງ ແລະ ນີ້ແມ່ນເພງຄວາມຮັກທີ່ມີແຕ່ຄວາມເສຍສະຫຼະ, ມີເສົ້າ, ຊຶ້ງໃຈ ແລະ ຕ້ອງຍອມເຈັບປວດ ເພື່ອເຫັນຄົນທີ່ຮັກມີຄວາມສຸກທີ່ສຸດ ແລະ ໄດ້ແຕ່ຂໍໃຫ້ເຂົາໂຊກດີ.
