ອານິຕ້າ ຢາການາກິ ນັກສະແດງ-ນາງແບບສາວ ຈາກຄ້າຍ Firstmodelinglao ຮ່ວມສະແດງຊີຣີສ໌ອີສານແນວສືບສວນສວນ “ສາຍລັບລົດແຫ່ (สายลับรถแห่)” ຂອງຊ່ອງ TrueVision ແລະ ກຳລັງຈະສາຍໃຫ້ເບິ່ງກັນໃນໄວໆນີ້.
ຜົນງານທີ່ຜ່ານມາ
ປະສົບຜົນສຳເລັດໄປອີກໜຶ່ງກ້າວສຳລັບ ອານິຕ້າ ຢາການາກິ ທີ່ໄດ້ພັດທະນາທາງດ້ານການສະແດງ ຈົນໄດ້ຂ້າມຝັ່ງໄປສະແດງຊີຣີສ໌ຢູ່ປະເທດໄທ. ອານິຕ້າ ຖືວ່າເປັນນັກສະແດງສາວທີ່ມີຜົນງານຫຼາກຫຼາຍບໍ່ວ່າຈະເປັນງານພຣີເຊັນເຕີ, ການສະແດງໃນວິດີໂອເພງ, ຊີຣີສ໌ ແລະ ຍັງສະແດງເປັນນາງເອກໜັງລາວ “ແສງອາລຸນທີ່ປາຍຂອບຟ້າ” ອີກດ້ວຍ.
ຊີຣີສ໌ໄທເລື່ອງ ສາຍລັບລົດແຫ່
ເອົາເປັນວ່າ ມ່ວນ ຈະຂໍກັບມາທີ່ຜົນງານເລື່ອງຫຼ້າສຸດຂອງລາວກັນກ່ອນ. ອານິຕ້າ ຮັບບົດເປັນຄຸນໜູ ນ້ຳຕານ ຢູ່ໃນຊີຣີສ໌ເລື່ອງ ສາຍລັບລົດແຫ່ (สายลับรถแห่) ໂດຍທີ່ເລື່ອງໄດ້ເລົ່າເຖິງໝູ່ບ້ານ ແສນສຸກ ທີ່ມີເລື່ອງໜ້າສົງໄສ ຈົນເຮັດໃຫ້ມີກຸ່ມຕຳຫຼວດໃໝ່ໄຟແຮງ ຈະເຂົ້າໄປສືບຂໍ້ມູນຢູ່ໝູ່ບ້ານແຫ່ງນີ້ ແລະ ແຜນປະຕິບັດການລົດແຫ່ກໍເກີດຂຶ້ນ.
ຊີຣີສ໌ເລື່ອງນີ້ເປັນທີ່ໜ້າຈັບຕາເບິ່ງ ເພາະມີການນຳເອົາວັດທະນະທຳ “ລົດແຫ່” ທີ່ເປັນເອກະລັກຂອງທ້ອງຖິ່ນມາປະສົມປະສານກັບແນວສືບສວນ ເຮັດໃຫ້ເປັນຜົນງານທີ່ແຟນໆທັງໃນລາວ ແລະ ໄທ ລໍຖ້າເບິ່ງນຳກັນ.
ຍັງບໍ່ໝົດແຕ່ພຽງເທົ່ານີ້, ເຮົາຍັງຈະໄດ້ເຫັນບົດບາດການສະແດງໃໝ່ໆຂອງ ອານິຕ້າ ຢາການາກິ ເປັນແນວໃດແດ່ ພວກເຮົາມາລໍຖ້າຕິດຕາມນຳກັນເດີທຸກຄົນ.
