ເຄີຍບໍ່? ທີ່ພະຍາຍາມແລ່ນນຳໃຜບາງຄົນຈົນເມື່ອຍ… ແຕ່ເຂົາກໍບໍ່ເຄີຍຫັນມາເບິ່ງເລີຍຈັກໜ້ອຍ.

ຕົ້ນປີ 2026 ນີ້, ມ່ວນຊວນທຸກຄົນມາ Reset ຫົວໃຈໃໝ່ ດ້ວຍການຫັນມາ “ແລ່ນເພື່ອໂຕເອງ” ລອງເບິ່ງດີກວ່າບໍ? ເພາະເຮົາຈະໄດ້ບໍ່ຕ້ອງແລ່ນຕາມໃຜ, ບໍ່ຕ້ອງແຂ່ງກັບໃຜ, ແລ່ນຕາມຈັງຫວະຫົວໃຈ ແລະ ຄວາມໄຫວຂອງເຮົາເອງກໍພໍ.

ສະນັ້ນ ເຮົາຈຶ່ງຮວບຮວມເອົາ 4 ງານແລ່ນຕົ້ນປີ 2026 ທີ່ຈະພາທຸກຄົນໄປພົບກັບໂຕເອງໃນເວີຊັນທີ່ຟິດ ແລະ ມີຄວາມສຸກກວ່າເກົ່າ. ມີງານໃດແດ່ນັ້ນ ເລືອກໄດ້ຕາມຄວາມມັກ ແລະ ຄວາມໄຫວຂອງແຕ່ລະຄົນເລີຍເດີ.

1. Synesis Vientiane Half Marathon

ແລ່ນປົດປ່ອຍຄວາມເສົ້າ ເອົາຄວາມມ່ວນເຂົ້າສູ້ ກັບງານແລ່ນກາງຄືນ ເອົາໃຈຄົນຕື່ນເຊົ້າບໍ່ໄຫວ. ແລ່ນແລ້ວເພິ່ນຍັງມີຄອນເສີດມ່ວນໆໃຫ້ປ່ອຍຈອຍຕອນທ້າຍນຳອີກ. ອ່ານຂໍ້ມູນເພີ່ມເຕີມໄດ້ທີ່ Synesis Vientiane Half Marathon ຊິນເນສິສ ວຽງຈັນ ແລ່ນເພື່ອສຸຂະພາບ

28 ກຸມພາ 2026 | ວຽງຈັນ (Night Run)

5 KM, 12 KM, 21 KM

2. Vang Vieng Half Plus Marathon

ແລ່ນສູດອາກາດບໍລິສຸດ ໃຫ້ປອດໄດ້ພັກຜ່ອນ ກັບງານແລ່ນຮັບເດືອນມີນາຢູ່ວັງວຽງ. ບໍ່ຕ້ອງຮີບຟ້າວ… ແລ່ນຊິວໆເບິ່ງວິວພູຜາປ່າໄມ້. ໃຫ້ທຳມະຊາດບຳບັດຫົວໃຈທີ່ເມື່ອຍລ້າ ກັບມາສົດໃສອີກຄັ້ງ. ເບິ່ງຂໍ້ມູນໄດ້ທາງ Vang Vieng Half Plus Marathon

1 ມີນາ 2026 | ວັງວຽງ

5 KM, 10 KM, 21 KM

3. Vientiane International Half Marathon

ແລ່ນທ້າທາຍໂຕເອງ ສ້າງສະຖິຕິໃໝ່ໃຫ້ຊີວິດ. ງານນີ້ແມ່ນເພື່ອຄົນທີ່ຢາກ “ເອົາຊະນະໃຈໂຕເອງ”. ບໍ່ໄດ້ແລ່ນເພື່ອໃຫ້ໃຜຍ້ອງ ແຕ່ແລ່ນເພື່ອພິສູດວ່າເຮົາກໍເກັ່ງ ແລະ ເຮັດໄດ້! ເບິ່ງຂໍ້ມູນເພີ່ມເຕີມໄດ້ທາງ Vientiane International Half Marathon

8 ມີນາ 2026 | ວຽງຈັນ

10 KM, 21 KM

4. V Trail (Vang Vieng Trail)

ລຸຍປ່າຝ່າດົງ ຊອກຫາຄວາມເຂັ້ມແຂງໃນໂຕເອງ. ທີ່ສຸດຂອງການຢູ່ກັບໂຕເອງ ໃນເສັ້ນທາງທີ່ທ້າທາຍ ທີ່ຈະເຮັດໃຫ້ເຮົາໄດ້ຍິນສຽງລົມຫາຍໃຈ ແລະ ສຽງຫົວໃຈໂຕເອງຊັດເຈນທີ່ສຸດ. ໃຜຢາກກ້າວຂ້າມຂີດຈຳກັດ ຕ້ອງມາງານແລ່ນນີ້ເລີຍ. ເບິ່ງຂໍ້ມູນເພີ່ມເຕີມໄດ້ທີ່ V Trail

15 ມີນາ 2026 | ວັງວຽງ

10 KM, 18 KM, 30 KM, 50 KM

ຢ່າລືມເດີທຸກຄົນ… ການແລ່ນທີ່ດີທີ່ສຸດ ຄືການແລ່ນທີ່ມີ “ຄວາມສຸກ”. ບໍ່ຈຳເປັນຕ້ອງແລ່ນໃຫ້ໄວເທົ່າໃຜ ພະຍາຍາມແລ່ນໃຫ້ສະໝໍ່າສະເໝີໃນແບບຂອງເຮົາກໍພໍ. ເພາະຈຸດໝາຍປາຍທາງທີ່ແທ້ຈິງ ບໍ່ແມ່ນແຕ່ເສັ້ນໄຊ ແຕ່ແມ່ນ “ສຸຂະພາບ ແລະ ຫົວໃຈ” ທີ່ແຂງແຮງຂຶ້ນຂອງເຮົາເອງ.