Gadzila

ລວມ 5 ເລື່ອງທີ່ຄວນຮູ້ ກຽມຕົວເຮັດບັດປະຈຳຕົວແບບໃໝ່ ຕຸລາ 2025 ນີ້

ໂດຍ: Chanthasone Insixiangmai

24 September 2025● 539

ພ້ອມແລ້ວບໍ່? ເດືອນຕຸລາ (10) 2025 ນີ້ ເຮົາຈະສາມາດເຮັດບັດປະຈຳຕົວແບບໃໝ່ໄດ້ແລ້ວ ເຊິ່ງເປັນບັດແບບອັບເກຣດມີຟີເຈີໃໝ່ເພີ່ມເຂົ້າມາເພື່ອຄວາມປອດໄພ ບໍ່ວ່າຈະເປັນຊິບ ແລະ QR Code.

ມີຫຍັງແດ່ທີ່ເຮົາຄວນຮູ້ ເພື່ອກຽມຕົວໄປເຮັດບັດປະຈຳຕົວແບບໃໝ່ນີ້? ນ້ອງກັອດຈິສະຫຼຸບມາໃຫ້ທຸກຄົນແລ້ວ.

ບັດແບບໃໝ່ມີຫຍັງດີ?

ສຳລັບບັດແບບໃໝ່ນີ້ ໄດ້ຍົກເຄື່ອງການອອກແບບໃໝ່ ໂດຍມີຂະໜາດທີ່ກະທັດຮັດ, ນໍ້າໜັກເບົາ, ສີສັນສວຍງາມ, ບໍ່ປ່ຽນສີເມື່ອໃຊ້ໄປດົນ ແລະ ຍັງມີ QR Code ແລະ Chip ໃນຕົວ.

ອາຍຸການນຳໃຊ້ບັດ

ອາຍຸການນຳໃຊ້ບັດໄດ້ມີການອັບເດດໃໝ່ ຈາກເມື່ອກ່ອນທີ່ເຮົາຕ້ອງໄດ້ຕໍ່ອາຍຸບັດໃໝ່ໃນທຸກໆ 5 ປີໃຫ້ກາຍເປັນໄລຍະທີ່ຕອບໂຈດ ແລະ ເໝາະສົມຫຼາຍຂຶ້ນເຊັ່ນ:

• ຕັ້ງແຕ່ເກີດຈົນຮອດ 6 ປີ ແລະ 6 ປີ ຫາ 15 ປີ
• ຜູ້ມີອາຍຸ 15 ປີ – 20 ປີ: ອາຍຸນຳໃຊ້ບັດ 5 ປີ ແລະ ຜູ້ມີອາຍຸ 20 ປີຂຶ້ນໄປ ອາຍຸນຳໃຊ້ບັດ 10 ປີ
• ຜູ້ມີອາຍຸ 60 ປີຂຶ້ນໄປ: ບັດບໍ່ມີວັນໝົດອາຍຸ

ສາມາດໄປເຮັດບັດປະຈຳຕົວຢູ່ໃສໄດ້ແດ່?

ບັດປະຈຳຕົວແບບໃໝ່ນີ້ຈະແຕກຕ່າງຈາກບັດປະຈຳຕົວແບບເກົ່າ ເນື່ອງຈາກເຮົາຈະສາມາດໄປເຮັດຢູ່ໃສກໍໄດ້ ອີງຕາມທີ່ເຮົາສະດວກ ໂດຍບໍ່ຂຶ້ນກັບວ່າສຳມະໂນຄົວຂອງເຮົາຂຶ້ນກັບເມືອງໃດ ແຂວງໃດ. ເຮົາສາມາດເດີນທາງໄປເຮັດບັດປະຈຳຕົວແບບໃໝ່ນີ້ໄດ້ຕາມສະຖານທີ່ຕໍ່ໄປນີ້:

• ຂັ້ນສູນກາງ: ສາມາດໄປເຮັດໄດ້ທີ່ ກົມຄຸ້ມຄອງພົນລະເມືອງ, ກະຊວງປ້ອງກັນຄວາມສະຫງົບ (ປກສ) ທີ່ ນະຄອນຫຼວງວຽງຈັນ
• ຂັ້ນແຂວງ/ນະຄອນຫຼວງ: ສາມາດໄປເຮັດໄດ້ທີ່ ກອງບັນຊາການປ້ອງກັນຄວາມສະຫງົບແຂວງ ຫຼື ນະຄອນຫຼວງ
• ຂັ້ນເມືອງ/ນະຄອນ: ສາມາດໄປເຮັດໄດ້ທີ່ ກອງບັນຊາການປ້ອງກັນຄວາມສະຫງົບເມືອງ ຫຼື ນະຄອນ

ເອກະສາທີ່ຕ້ອງກະກຽມໄປນຳເພື່ອໄປເຮັດບັດປະຈຳຕົວແບບໃໝ່

ຜູ້ທີ່ຈະເຮັດບັດປະຈຳຕົວແບບໃໝ່ຕ້ອງຖື ປຶ້ມສຳມະໂນຄົວທີ່ຕົວເອງມີໜ້າ, ບັດປະຈຳຕົວແບບເກົ່າ ຫຼື ໜັງສືຜ່ານແດນ (passport) ໄປນຳ ເພື່ອເປັນຫຼັກຖານຢັ້ງຢືນປະກອບການອອກບັດປະຈຳຕົວໃໝ່.

ຄ່າບໍລິການອອກບັດປະຈຳຕົວແບບໃໝ່

ອີງຕາມແຈ້ງການຈາກທາງການ, ຜູ້ທີ່ເຮັດບັດປະຈຳຕົວແບບໃໝ່ຈະຕ້ອງໄດ້ຈ່າຍຄ່າບໍລິການອອກບັດຈຳນວນ 30,000 ກີບ ເຊິ່ງຄ່າບໍລິການນີ້ແມ່ນມີຜົນຮອດວັນທີ 31 ທັນວາ 2026.