ໃນ ເທດສະການຄຳລາວ 2025 ທີ່ຈັດຂຶ້ນໃນລະຫວ່າງວັນທີ 5-7 ກັນຍາ 2025 ທີ່ຜ່ານມາ ໄດ້ສ້າງປະຫວັດສາດໃໝ່ໃຫ້ກັບວົງການຄຳຂອງລາວ ດ້ວຍການປະກວດອອກແບບເຄື່ອງປະດັບຄຳຄັ້ງທຳອິດ ເພື່ອຍົກລະດັບອຸດສາຫະກຳຄຳຂອງລາວໃຫ້ທຽບເທົ່າກັບມາດຕະຖານສາກົນ, ພ້ອມທັງອະນຸລັກເອກະລັກວັດທະນະທຳດັ່ງເດີມ.
ການປະກວດຄັ້ງນີ້ຖືເປັນເວທີສຳຄັນທີ່ເປີດໂອກາດໃຫ້ນັກອອກແບບ ແລະ ຊ່າງຝີມືຄຳລາວໄດ້ສະແດງຄວາມສາມາດ ແລະ ແນວຄິດສ້າງສັນ. ຈຸດປະສົງຫຼັກແມ່ນການປະຍຸກຄວາມທັນສະໄໝເຂົ້າກັບລວດລາຍວັດທະນະທຳລາວ, ເພື່ອຍົກລະດັບການຜະລິດໃຫ້ແຂ່ງຂັນໄດ້ໃນຕະຫຼາດໂລກ, ສ້າງເຄືອຂ່າຍລະຫວ່າງຜູ້ປະກອບການ ແລະ ປູກຝັງຄວາມພາກພູມໃຈໃນມໍລະດົກຂອງຊາດ.
ຜົນງານຜູ້ຊະນະທີ່ເຕັມໄປດ້ວຍເລື່ອງລາວ
ຫຼັງຈາກການແຂ່ງຂັນຂອງຮ້ານຄຳຕ່າງໆ ກໍໄດ້ຜົນອອກມາກໍມີຮ້ານຄຳທີ່ໄດ້ຮັບລາງວັນດັ່ງນີ້:
ລາງວັນທີ 1: “ດອກຈຳປາ” ດອກໄມ້ປະຈຳຊາດລາວ ຈາກ: ຮ້ານຄຳ ສຳລານ – Samlane Jewelry
ແນວຄິດ: ຜົນງານນີ້ໄດ້ນຳເອົາດອກຈຳປາ, ສັນຍາລັກແຫ່ງຄວາມຮຸ່ງເຮືອງ ແລະ ຄວາມພາກພູມໃຈຂອງຊາດ, ມາປະຍຸກເຂົ້າກັບລວດລາຍທ້ອງຖິ່ນແລະສີທອງອັນອົບອຸ່ນ, ເພື່ອສະທ້ອນຄວາມສົມບູນຂອງຊຸມຊົນລາວ.
ລາງວັນທີ 2: “ສະເໜ່ລາຍນາກ” ຕຳນານມໍລະດົກໂລກ ຈາກ: ຮ້ານຄຳພູວົງ Phouvong Jewelry
ແນວຄິດ: ຜົນງານທີ່ໄດ້ຮັບແຮງບັນດານໃຈຈາກລາຍນາກ ເຊິ່ງໄດ້ຂຶ້ນທະບຽນໂດຍ UNESCO, ໄດ້ຖືກນຳມາສ້າງສັນໃຫ້ເປັນເຄື່ອງປະດັບລະດັບໂລກ ໂດຍການຖ່າຍທອດຄວາມເຊື່ອ ແລະ ອັດຕະລັກທາງວັດທະນະທຳທີ່ເປັນເອກະລັກ.
ລາງວັນທີ 3: “ພວງມາໄລດອກຈຳປາລາວ” ຈາກ: ຮ້ານ ບຸນເຕັມວັດຖຸມີຄ່າ – Bountem Gold & Jewelry, since1994
ແນວຄິດ: ການອອກແບບທີ່ສື່ເຖິງຄວາມເຄົາລົບ ແລະ ຄວາມກະຕັນຍູທີ່ສະແດງອອກຜ່ານການມອບພວງມາໄລໃນພິທີກຳຕ່າງໆຂອງລາວ ຖືກນຳມາປະຍຸກໃນຮູບແບບໃໝ່ເພື່ອສະແດງເຖິງຄວາມງາມ ແລະ ສາຍສຳພັນອັນແໜ້ນແຟ້ນໃນຊຸມຊົນ.
ການປະກວດໃນຄັ້ງນີ້ຖືເປັນຈຸດເລີ່ມຕົ້ນທີ່ສຳຄັນໃນການພັດທະນາອຸດສາຫະກຳຄຳຂອງລາວ. ທະນາຄານຄຳລາວ ແລະ ສະມາຄົມຄຳ ແລະ ເຄື່ອງປະດັບລາວ ຈະມີບົດບາດສຳຄັນໃນການສົ່ງເສີມກິດຈະກຳຕ່າງໆ ທີ່ກ່ຽວຂ້ອງກັບຄຳ ໃຫ້ມີການມີສ່ວນຮ່ວມຂອງຊຸມຊົນຫຼາຍຂຶ້ນ ເພື່ອສ້າງການເຕີບໂຕທີ່ຍືນຍົງ ແລະ ຂັບເຄື່ອນອຸດສາຫະກຳຄຳຂອງປະເທດໃຫ້ໝັ້ນຄົງໃນອະນາຄົດ.
