ລັດຖະທຳມະນູນລາວອັບເກຣດ ເພີ່ມຄຳວ່າ ປັນຍາປະດິດ (AI) ເຂົ້າໃນສະບັບປັບປຸງ 2025

ໃນຍຸກທີ່ເຕັກໂນໂລຊີປັນຍາປະດິດ (Artificial Intelligence ຫຼື AI) ກຳລັງກາຍເປັນໃຈກາງຂອງການພັດທະນາໃນລະດັບໂລກ, ລາວໄດ້ປັບປຸງລັດຖະທຳມະນູນສະບັບໃໝ່ ເຊິ່ງໃນນັ້ນ ມີການເພີ່ມຄຳວ່າ “ປັນຍາປະດິດ” ເຂົ້າໄປ. ການປ່ຽນແປງນີ້ສະແດງໃຫ້ເຫັນເຖິງຄວາມສົນໃຈໃນການສົ່ງເສີມວິທະຍາສາດ, ເຕັກໂນໂລຊີ, ແລະນະວັດຕະກຳ ທີ່ເປັນເລື່ອງທີ່ຫຼາຍປະເທດໃນໂລກໃຫ້ຄວາມສຳຄັນໃນປັດຈຸບັນ.

ຕາມ ລັດຖະທຳມະນູນ ສະບັບປັບປຸງໃໝ່ 2025 ເຊິ່ງຫາກໍຖືກຮັບຮອງເອົາໂດຍກອງປະຊຸມສະພາແຫ່ງຊາດ ເມື່ອວັນທີ 20 ມີນາ 2025, ມາດຕາ 24 ກຳນົດວ່າ “ລັດເອົາໃຈໃສ່ສົ່ງເສີມ ສະຕິປັນຍາ, ຫົວຄິດປະດິດສ້າງ ໃນວຽກງານຄົ້ນຄວ້າ, ວິໄຈ ແລະ ນຳໃຊ້ວິທະຍາສາດ, ເຕັກໂນໂລຊີ, ນະວັດຕະກຳ, ປັນຍາປະດິດ, ພ້ອມທັງປົກປ້ອງຊັບສິນທາງປັນຍາ ໄປຄຽງຄູ່ກັບການບຳລຸງ ແລະ ສ້າງນັກວິທະຍາສາດ ເພື່ອການຫັນເປັນອຸດສາຫະກຳ ແລະ ທັນສະໄໝ.”

ການເພີ່ມຄຳວ່າ “ປັນຍາປະດິດ” ໃນມາດຕານີ້ ບໍ່ພຽງແຕ່ສະແດງເຖິງການຮັບຮູ້ທ່າແຮງຂອງ AI ເທົ່ານັ້ນ, ແຕ່ຍັງສະທ້ອນເຖິງການຮັບຮູ້ບົດບາດຂອງເຕັກໂນໂລຊີນີ້ໃນການພັດທະນາປະເທດ.

ການນຳ AI ເຂົ້າມາເປັນສ່ວນໜຶ່ງຂອງລັດຖະທຳມະນູນ ຖືເປັນກ້າວສຳຄັນທີ່ສອດຄ່ອງກັບເທຣນຂອງໂລກ, ທີ່ຫຼາຍປະເທດກຳລັງແຂ່ງຂັນກັນພັດທະນາເຕັກໂນໂລຊີນີ້ ເພື່ອຍົກລະດັບເສດຖະກິດ, ສັງຄົມ ແລະ ການບໍລິຫານງານພາກລັດ.

AI ບໍ່ແມ່ນພຽງເຄື່ອງມືທີ່ຊ່ວຍເພີ່ມປະສິດທິພາບໃນການເຮັດວຽກເທົ່ານັ້ນ, ແຕ່ຍັງເປັນພະລັງຂັບເຄື່ອນທີ່ສາມາດປ່ຽນແປງໂຄງສ້າງອຸດສາຫະກຳ ແລະ ສ້າງໂອກາດໃໝ່ໃຫ້ແກ່ປະຊາຊົນ, ໂດຍສະເພາະໃນດ້ານການສຶກສາ, ການຄົ້ນຄວ້າ, ແລະການພັດທະນາຊັບພະຍາກອນມະນຸດ.

ນອກຈາກນັ້ນ, ການລະບຸເຖິງການປົກປ້ອງຊັບສິນທາງປັນຍາໃນມາດຕາດຽວກັນ ຍັງສະແດງໃຫ້ເຫັນວ່າ ລັດຖະທຳມະນູນເຫັນດີວ່າ ການພັດທະນາເຕັກໂນໂລຊີຕ້ອງມາພ້ອມກັບການຄຸ້ມຄອງຜົນງານສ້າງສັນ, ເພື່ອສ້າງແຮງຈູງໃຈໃຫ້ເກີດນະວັດຕະກຳຢ່າງຕໍ່ເນື່ອງ. ສ່ວນການເນັ້ນໃສ່ການສ້າງນັກວິທະຍາສາດ ແລະ ມຸ່ງສູ່ອຸດສາຫະກຳທີ່ທັນສະໄໝ ກໍສະແດງເຖິງເປົ້າໝາຍໄລຍະຍາວໃນການພັດທະນາບຸກຄະລາກອນ ແລະ ເສດຖະກິດທີ່ເພິ່ງພາດ້ານເຕັກໂນໂລຊີເປັນຫຼັກ.

ການປັບປຸງລັດຖະທຳມະນູນຄັ້ງນີ້ຂອງລາວ ບໍ່ພຽງແຕ່ເປັນການກ້າວທັນເທຣນຂອງໂລກເທົ່ານັ້ນ, ແຕ່ຍັງເປັນການວາງພື້ນຖານໃຫ້ປະເທດກ້າວເຂົ້າສູ່ຍຸກດິຈິຕອນອີກຂັ້ນໜຶ່ງ, ໂດຍມີ AI ເປັນຕົວຊ່ວຍການພັດທະນາ, ເຊິ່ງອາດສົ່ງຜົນດີຕໍ່ການແຂ່ງຂັນໃນພາກພື້ນ ແລະ ການປັບປຸງຊີວິດຂອງພວກເຮົາໃຫ້ດີຂຶ້ນ.