ສ້າງປະຫວັດສາດ “Golden” ຈາກ KPop Demon Hunters ກາຍເປັນເພງເຄປັອບທຳອິດທີ່ຄວ້າລາງວັນ Grammys
ກາຍເປັນປາກົດການຄັ້ງສຳຄັນ ເມື່ອສຽງເພງ “Golden” ບົດເພງປະກອບແອນິເມຊັນສັນຊາດເກົາຫຼີ “KPop Demon Hunters” ສາມາດເອົາຊະນະໃຈຄະນະກຳມະການ ແລະ ສ້າງປະຫວັດສາດເປັນ ເພງເຄປັອບ (K-Pop) ເພງທຳອິດ ທີ່ຄວ້າລາງວັນຈາກເວທີ Grammy Awards ມາຄອງໄດ້ຢ່າງສົມສັກສີ ໃນການປະກາດລາງວັນຄັ້ງທີ 68 ປະຈຳປີ 2026.
ເພງ “Golden” ໄດ້ຮັບການປະກາດຊື່ໃຫ້ເປັນຜູ້ຊະນະໃນສາຂາ Best Song Written for Visual Media (ເພງດີເດັ່ນທີ່ຂຽນຂຶ້ນສຳລັບ Visual Media) ເຊິ່ງເປັນສາຂາທີ່ລວມເອົາເພງປະກອບຮູບເງົາ, ຊີຣີ ແລະ ແອນິເມະຊັນລະດັບໂລກມາປະເຊີນໜ້າກັນ.
ການໄດ້ຮັບລາງວັນນີ້ບໍ່ພຽງແຕ່ເປັນໄຊຊະນະຂອງທີມງານເທົ່ານັ້ນ ແຕ່ຍັງເປັນການຢືນຢັນວ່າ ດົນຕີເຄປັອບໄດ້ກາຍເປັນສ່ວນໜຶ່ງທີ່ສຳຄັນຂອງວັດທະນະທຳປັອບລະດັບສາກົນຢ່າງແທ້ຈິງ.
ຄວາມສຳເລັດຂອງ “Golden” ບໍ່ໄດ້ມາດ້ວຍຄວາມບັງເອີນ, ແຕ່ເປັນຜົນງານຈາກການຮ່ວມມືຂອງນັກຂຽນເພງ ແລະ ໂປຣດິວເຊີສີມືດີ ນຳໂດຍ Teddy Park ເຈົ້າພໍ່ເພງຮິດຈາກ THEBLACKLABEL ທີ່ແຟນໆ ຮູ້ຈັກກັນດີ. ນອກຈາກນີ້ຍັງມີທີມງານຄຸນນະພາບອີກ ເຊັ່ນ: Ejae, Joong Gyu Kwak, Yu Han Lee, Hee Dong Nam, Mark Sonnenblick ແລະ Jeong Hoon Seo.
ທີມງານຊຸດນີ້ໄດ້ອອກແບບດົນຕີທີ່ປະສົມປະສານລະຫວ່າງຄວາມທັນສະໄໝຂອງ K-Pop ບວກກັບຈັງຫວະທີ່ຕື່ນເຕັ້ນ ເພື່ອໃຫ້ສອດຄ່ອງກັບເນື້ອເລື່ອງຂອງແອນິເມະຊັນ KPop Demon Hunters ທີ່ໂດ່ງດັງໄປທົ່ວໂລກຕະຫຼອດປີ 2025.
ນອກຈາກນີ້, ໜຶ່ງໃນປັດໄຈທີ່ເຮັດໃຫ້ເພງນີ້ກາຍເປັນທີ່ຮູ້ຈັກໃນວົງກວ້າງ ຄືເນື້ອຮ້ອງວັກ Hook ສຸດຕິດຫູທີ່ວ່າ “We’re going Up Up Up”, ດ້ວຍຄວາມໄວຣໍ, ເຮັດໃຫ້ເດັກນ້ອຍ ແລະ ແຟນເພງຫຼາຍຄົນໄດ້ຍິນຜິດເປັນ “ເວໂກເວລັອບ” ຈົນກາຍເປັນ Meme ດັງໃນໂລກໂຊຊຽວ.